ក្រុមហ៊ុនដែលសិក្សាគម្រោងប្លង់និងសាងសង់ បានកើនឡើងដល់ទៅជាង២ពាន់ក្រុមហ៊ុន

• 3 ខែ​មករា 2019
• Uncategorized
• 10 មើល

វិស័យសំណង់នៅកម្ពុជាបាននិងកំពុងបង្ហាញសក្តានុពលរបស់ខ្លួនដោយការស្រូបយកក្រុមហ៊ុនសិក្សាគម្រោងប្លង់និងសាងសង់ជាច្រើនរហូតដល់ទៅជាង២ពាន់ក្រុមហ៊ុន។

យោងតាមរបាយការណ៍បូកសរុបលទ្ធផលការងារប្រចាំឆ្នាំ ២០១៨ របស់ក្រសួងរៀបចំដែនដី នគរូបនីយកម្ម និងសំណង់ចេញផ្សាយកាលពីចុងឆ្នាំ ២០១៨ ចំនួនក្រុមហ៊ុនសិក្សាគម្រោងប្លង់និងសាងសង់នៅកម្ពុជាដែលបានចុះបញ្ជីក្នុងរយៈពេលជាង ១០ ឆ្នាំកន្លងមកនេះគឺមានការកើនឡើងដល់ទៅ២៣០០ ក្រុមហ៊ុន។

ក្នុងចំណោមនោះដែរ សម្រាប់ឆ្នាំ ២០១៨ ចំនួនក្រុមហ៊ុនសិក្សាគម្រោងប្លង់ និងសាងសង់ដែលបានចុះបញ្ជីថ្មីគឺមានចំនួនរហូតដល់ទៅ ៣០១ ក្រុមហ៊ុន ដែលចំនួននេះគឺមានការកើនឡើងរហូតដល់ទៅ ៩,៤៥ ភាគរយ ឬស្មើទៅនឹង ២៦ ក្រុមហ៊ុន បើប្រៀបធៀបទៅនឹងរយៈពេលដូចគ្នាក្នុងឆ្នាំ ២០១៧ដែលមានត្រឹមតែ ២៧៥ ក្រុមហ៊ុន។

ក្នុងចំណោមក្រុមហ៊ុនទាំងនេះ មានក្រុមហ៊ុនសាងសង់ចំនួន ១៨០ ក្រុមហ៊ុន និងក្រុមហ៊ុនសិក្សាគម្រោងប្លង់ចំនួន០៦ក្រុមហ៊ុនដែលជាក្រុមហ៊ុនក្នុងស្រុក។ ដោយឡែក ក្រុមហ៊ុនបរទេសវិញមានចំនួនសរុប ១១៥ ក្រុមហ៊ុនដែលក្នុងនោះក្រុមហ៊ុនសាងសង់មានចំនួន ១១១ ក្រុមហ៊ុន និងក្រុមហ៊ុនសិក្សាគម្រោងប្លង់មានចំនួន ០៤ ក្រុមហ៊ុន។

ក្រៅពីការផ្តល់វិញ្ញាបនបត្រដល់ក្រុមហ៊ុនខាងលើ ក្រសួងរៀបចំដែនដី នគរូបនីយកម្ម និងសំណង់ក៏បានចេញវិញ្ញាបនបត្រដល់រូបវន្តបុគ្គលសិក្សាគម្រោងប្លង់ចំនួន ២៩ នាក់ក្នុងឆ្នាំ ២០១៨ផងដែរដែលក្នុងនោះស្ថាបត្យករមានចំនួន ២២ នាក់ និងវិស្វករចំនួន ០៧ នាក់។ ទិន្នន័យនេះ គឺមានការកើនឡើងចំនួន ១៦ នាក់ ឬ ៣៥,៥៥ ភាគរយបើធៀបទៅនឹងរយៈពេលដូចគ្នាក្នុងឆ្នាំ ២០១៧។

• ធុរកិច្ច និងទីផ្សារ
• Business and Market
• ធុរកិច្ច និងទីផ្សារ