ក្រុមហ៊ុន Huawei នឹងពង្រីកទីផ្សារថាមពលពន្លឺព្រះអាទិត្យបែបឆ្លាតវៃ (Smart PV) នៅកម្ពុជា

• 8 ខែ​កក្កដា 2020
• Uncategorized
• 11 មើល

ក្រុមហ៊ុន Huawei កាលពីថ្មីៗនេះ បានចុះហត្ថលេខាធ្វើជាដៃគូសហការ ជាមួយនឹងJJ-LAPP ដើម្បីពង្រីកវិសាលភាពនៃការផ្គត់ផ្គង់ឧបករណ៍បំលែងថាមពលពន្លឺព្រះអាទិត្យបែបឆ្លាតវៃ ឬ Smart PV សម្រាប់បណ្ដាប្រទេសចំនួន ៦ រួមមាន កម្ពុជា ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន និងថៃ។ នេះបើយោងតាមការផ្សព្វផ្សាយព័ត៌មានលើគេហទំព័រផ្លូវការ PVtime កាលពីថ្មីៗនេះ។

ការចុះហត្ថលេខាធ្វើជាដៃគូសហកាវាង ក្រុមហ៊ុន Huawei ជាមួយនឹងក្រុមហ៊ុន JJ-LAPP ដែលជាក្រុមហ៊ុនបណ្តាញបច្ចេកវិទ្យាខ្សែកាបធំបំផុតនៅអាស៊ាន នឹងជួយជម្រុញដល់ការលក់ ចែកចាយ និងគាំទ្រ ដល់ឧបករណ៍បំលែងថាមពលពន្លឺព្រះអាទិត្យរបស់ក្រុមហ៊ុន Huawei នៅក្នុងតំបន់អាស៊ានទាំងមូល។

បច្ចុប្បន្ន ក្រុមហ៊ុនទាំងពីនេះ បានផ្គត់ផ្គង់ថាមពលពន្លឺព្រះអាទិត្យនៅប្រទេសចំនួន បីហើយ រួមមាន កម្ពុជា មីយ៉ាន់ម៉ា និងឡាវ និងប្ដេជ្ញាខិតខំផ្គត់ផ្គង់ទីផ្សារសម្រាប់អតិថិជនដែលមានស្រាប់ ក៏ដូចជាពង្រីកទីផ្សារបន្ថែមទៀតទៅប្រទេសក្នុងតំបន់។

លោក Li Yaohui អគ្គនាយកក្រុមហ៊ុន Smart PV Business APAC របស់ក្រុមហ៊ុន Huawei បានឱ្យដឹងក្នុងគេហទំព័រផ្លូវការ PVtime ថា៖ «យើងរំភើបចំពោះភាពជាដៃគូនេះណាស់ ហើយយើងនឹងបន្តវត្តមានរបស់យើងក្នុងតំបន់នេះ។ យើងជឿជាក់ថា តាមរយៈបទពិសោធន៍របស់ក្រុមហ៊ុន JJ-LAPP ក្នុងការពង្រីកវិសាលភាពនៅអាស៊ីអាគ្នេយ៍ និងជាអ្នកជំនាញទីផ្សារផ្នែកថាមពលកកើតឡើងវិញ នឹងផ្ដល់នូវការរីកចម្រើន និងជោគជ័យសម្រាប់ក្រុមហ៊ុនទាំងពីរផងដែរ។»

គួរបញ្ជាក់ផងដែរថា Smart PV ឬ FusionSolar គឺជាការរួមបញ្ចូលគ្នានៃប្រព័ន្ធបន្ទះសូឡាធម្មតា ជាមួយបច្ចេកវិទ្យាច្នៃប្រឌិតថ្មីៗដូចជា smart invertor និង ប្រព័ន្ធAI ដើម្បីបង្កើតប្រព័ន្ធគ្រប់គ្រងថាលពលសូឡាដ៏ឆ្លាតវៃ និងមានមុខងារពេញលេញ។

• ថាមពល និងបរិស្ថាន
• បច្ចេកវិទ្យា និងវិស្វកម្ម
• Energy and Environment
• Technology and Engineering
• ថាមពល និងបរិស្ថាន