ក្រុមហ៊ុន Royal Railway ចុះបញ្ជីលក់មូលបត្របំណុល ក្នុងទំហំទឹកប្រាក់ប្រមាណ ១០លានដុល្លារ

31 ខែតុលា 2022
Uncategorized
10 មើល

ក្រុមហ៊ុន រ៉ូយ៉ាល់ រេលវេ ម.ក ដែលជាក្រុមហ៊ុនផ្តល់សេវាកម្មដឹកជញ្ជូនតាមផ្លូវដែក រថភ្លើងដឹកអ្នកដំណើរ ការជួលឃ្លាំងទំនិញ និងសេវាកម្មពន្ធ-គយ បានចុះបញ្ជីលក់មូលបត្របំណុលក្នុងផ្សារមូលបត្រកម្ពុជា ក្នុងទំហំទឹកប្រាក់សរុប ៤១ប៊ីលានរៀល ប្រមាណជា ១០លានដុល្លារអាមេរិក។

ក្នុងពិធីចុះបញ្ជីលក់សញ្ញាបណ្ណសាជីវកម្មជាផ្លូវការរបស់ក្រុមហ៊ុន រ៉ូយ៉ាល់ រេលវេ ម.ក នៅថ្ងៃទី៣១ ខែតុលា ឆ្នាំ ២០២២ ដោយមានវត្តមានអ្នកឧកញ៉ា គិត ម៉េង ប្រធានក្រុមហ៊ុនរ៉ូយ៉ាល់គ្រុប, ឯកឧត្តម ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលទីផ្សារមូលបត្រកម្ពុជា, ឯកឧត្តម ហុង សុខហួរ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិនៃផ្សារមូលបត្រកម្ពុជា និងឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនិយតករទីផ្សារមូលបត្រកម្ពុជា។

ថ្លែងក្នុងពិធីខាងលើនេះ អ្នកឧកញ៉ា គិត ម៉េង មានប្រសាសន៍ថា ការចុះបញ្ជីមូលបត្របំណុលជាផ្នែកមួយនៃការប្តេជ្ញាចិត្តរបស់អ្នកឧកញ៉ា និងការវិនិយោគបន្តទៅក្នុងផ្លូវដែករបស់ក្រុមហ៊ុន។

អ្នកឧកញ៉ា គិត ម៉េង មានប្រសាសន៍ថា៖ “មូលបត្របំណុលនេះ សម្រាប់ការវិនិយោគលើការរីកចម្រើននៃផ្លូវដែក បន្ថែមសេវាកម្មថ្មី សម្រាប់ប្រជាជនកម្ពុជា”។

ប្រធានក្រុមហ៊ុនរ៉ូយ៉ាល់គ្រុប បន្ថែមថា ការចុះបញ្ជីលក់មូលបត្របំណុលនេះ នឹងត្រូវបានប្រើដើម្បីធ្វើឱ្យប្រសើរឡើងនូវខ្សែផ្លូវដែក និងរទេះ និងក្បាលរថភ្លើង បូករួមទាំងឧបករណ៍ថ្មី ដែលនឹងធ្វើឱ្យផ្លូវដែកទំនើបបន្ថែមទៀត។

ក្រុមហ៊ុន គ្រោងចុះបញ្ជីលក់មូលបត្របំណុល ទីពីរ ដែលត្រូវបានចុះបញ្ជីនៅចុងឆ្នាំនេះចំនួន ២០លានដុល្លារ ។

- Video Advertisement -