ចិន ប្រកាសមានបំណងចង់វិនិយោគលើវិស័យគ្រឿងយន្តកសិកម្មនៅកម្ពុជា

• 3 ខែ​តុលា 2025
• Uncategorized
• 10 មើល

គណៈប្រតិភូចិន បានបង្ហាញពីបំណងចង់វិនិយោគលើវិស័យគ្រឿងយន្តកសិកម្មនៅកម្ពុជានាពេលខាងមុខ ខណៈបច្ចុប្បន្នក្រុមគណៈប្រតិភូ បានមកជួបពិភាក្សាជាមួយក្រសួងកសិកម្ម រុក្ខាប្រមាញ់ និងនេសាទអំពីរឿងនេះរួចរាល់ហើយ។

ថ្លែងក្នុងកិច្ចពិភាក្សាជាមួយក្រុមអ្នកប្រតិភូចិន នៅថ្ងៃទី២៦ ខែកញ្ញា ឆ្នាំ២០២៥ ឯកឧត្តមរដ្ឋមន្ត្រី ឌិត ទីណា រដ្ឋមន្ត្រីក្រសួងកសិកម្ម បានឱ្យដឹងថា​ គណៈប្រតិភូចិន បានមកពិភាក្សា និងស្វែងយល់លើការវិនិយោគគ្រឿងយន្តកសិកម្មក្នុងវិស័យកសិកម្មកម្ពុជា។

ក្នុងកិច្ចប្រជុំនេះ ឯកឧត្តមរដ្ឋមន្ត្រី បានស្វាគមន៍ដល់គណៈប្រតិភូចិនដែលមានបំណងចង់វិនិយោគក្នុងប្រទេសកម្ពុជា និងរួមចំណែកក្នុងការពង្រឹងកិច្ចសហប្រតិបត្តិការកម្ពុជា-ចិន តាមរយៈច្រករបៀងមច្ឆានិងអង្ករ និងការអភិវឌ្ឍទំនើបកម្មគ្រឿងយន្តកសិកម្មផ្សារភ្ជាប់នឹងសេដ្ឋកិច្ច។

ទន្ទឹមគ្នានេះ ឯកឧត្តមរដ្ឋមន្រ្តី ក៏បានលើកទឹកចិត្តដល់ភាគីចិនឱ្យកសាងទំនុកចិត្តផលិតផលក្នុងទីផ្សារកម្ពុជា ដោយផ្តល់នូវសេវាកម្មគ្រឿងយន្តល្អ បច្ចេកវិទ្យាខ្ពស់ ផ្តល់ដំណោះស្រាយបច្ចេកទេស និងភាពជឿជាក់ ជួយឱ្យកសិករទទួលបានប្រាក់ចំណេញ កាត់បន្ថយថ្លៃដើមផលិតកម្ម ចំណេញពេលវេលា និងមានប្រសិទ្ធភាពសេដ្ឋកិច្ចផងដែរ។

គួរបញ្ជាក់ថា គិតត្រឹមរយៈពេល ៨ខែ នៃឆ្នាំ២០២៥នេះ មានគម្រោងវិនិយោគចំនួន ៤៩១គម្រោងហើយ ដែលក្រុមប្រឹក្សាអភិវឌ្ឍន៍កម្ពុជាបានអនុម័តជូនវិនិយោគិន រួមទាំងអ្នកវិនិយោគចិនផងដែរ ដើម្បីបណ្ដាក់ទុនវិនិយោគនៅកម្ពុជា៕ (អានបន្ថែម)

• Investment and Funding