តើប្រព័ន្ធ QR កូតថ្មីនេះ នឹងអាចជួយអ្វីខ្លះដល់វិស័យលក់រាយនៅកម្ពុជា?
ជាមួយនឹងការកើនឡើងនៃវិស័យសំណង់ដ៏គួរអោយកត់សម្គាល់ ក្នុងនោះក៏មានគម្រោងផ្សារទំនើបលក់រាយជាច្រើនកំពុងរីកលូតលាស់ដូចផ្សិតផងដែរ ដូចេ្នះកម្ពុជានឹងមានប្រព័ន្ធ QR កូត ដែលជាលេខកូដ សម្រាប់ទូទាត់សាច់ប្រាក់នៅពេលទិញទំនិញអ្វីមួយនៅតាមផ្សារទំនើបទាំងអស់នោះ។
បច្ចុប្បន្ននេះមានការផ្គត់ផ្គង់លក់រាយមានទំហំប្រមាណ ៣០០,០០០ ម៉ែត្រការ៉េ នៅក្នុងប្រទេសកម្ពុជា។ របាយការណ៍របស់ CBRE បង្ហាញថានៅឆ្នាំ ២០២៤ ផ្សារទំនើបនឹងកើនឡើងដល់ ៤៩៦,៨៥៧ ម៉ែត្រការ៉េ រីថែរផូឌេមនឹងកើនឡើងដល់ ១៤៣,៩៥៦ ម៉ែត្រការ៉េ ហើយផ្សារសហគមន៍ក៏នឹងពង្រីកដល់ប្រមាណ ១០០,០០០ ម៉ែត្រការ៉េផងដែរ។
លោក James Hodge នាយកក្រុមហ៊ុន CBRE Cambodia បានមានប្រសាសន៍ថា“ទីផ្សារលក់រាយនៅភ្នំពេញកំពុងមានការរីកចម្រើនយ៉ាងឆាប់រហ័ស មិនត្រឹមតែទំហំអគារដែលត្រូវបានសាងសង់សម្រាប់ទីផ្សារលក់រាយប៉ុណ្ណោះទេ ប៉ុន្តែថែមទាំងអតិថិជនមានការរំពឹងទុកខ្ពស់ក្នុងការដើរទិញទំនិញបែបទំនើបផងដែរ” ។
លោក Hodge ក៏បានមានប្រសាសន៍ថា “ប្រព័ន្ធទូទាត់សាច់ប្រាក់តែងតែត្រូវបានស្វាគមន៍បន្ថែម ព្រោះថាវាអាចផ្តល់នូវភាពបត់បែនកាន់តែច្រើន និងផ្តល់ព័ត៌មានជាច្រើនទៀតដែលអាចប្រមូលយកមកប្រើប្រាស់ដើម្បីជាប្រយោជន៍ដល់អ្នកលក់រាយនិងអ្នកប្រើប្រាស់ជាបន្តបន្ទាប់។”
កាលពីខែកុម្ភៈ ធនាគារកណ្តាលកម្ពុជានិងថៃបានចុះហត្ថលេខាលើអនុស្សារណៈយោគយល់គ្នាស្តីពីកិច្ចសហប្រតិបត្តិការក្នុងគម្រោងទូទាត់ប្រាក់ដោយផ្អែកលើ QR កូដ និងការអភិវឌ្ឍន៍ផ្នែកហិរញ្ញវត្ថុ បើយោងតាមសេចក្តីថ្លែងការណ៍របស់ធនាគារជាតិនៃកម្ពុជា។
កម្មវិធីទូរស័ព្ទដៃនៃការគិតលុយQRកូតនេះ នឹងជួយជំរុញការប្រើប្រាស់រូបិយប័ណ្ណក្នុងស្រុករវាងប្រទេសនីមួយៗ។ លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេសធនាគារជាតិនៃកម្ពុជា បាននិយាយកាលពីខែសីហាថា ជាមួយនឹងកម្មវិធីទូរស័ព្ទដៃនៃការគិតលុយQRកូតនេះ ប្រជាជនកម្ពុជានឹងអាចប្រើប្រាក់រៀលដើម្បីទិញទំនិញនៅប្រទេសថៃខណៈពេលដែលជនជាតិថៃធ្វើដំណើរមកកម្ពុជានឹងអាចបង់ជាប្រាក់បាត។
លើសពីនេះទៀត ប្រព័ន្ធទូទាត់ប្រាក់ទាំងនេះអាចផ្តល់នូវដំណោះស្រាយប្រកបដោយភាពច្នៃប្រឌិត សម្រាប់ការកាត់បន្ថយការចាយក្រដាសប្រាក់ក្នុងប្រទេសកម្ពុជា។
លោក Hodge ក៏បានមានប្រសាសន៍ថា ការប្រើប្រាស់ប្រព័ន្ធទូទាត់ប្រាក់នឹងផ្តល់នូវគុណសម្បត្តិដូចជា សុវត្ថិភាព ភាពងាយស្រួលក្នុងការទទួលបានប្រាក់សម្រាប់ប្រើប្រាស់ និងភាពបត់បែននៃហិរញ្ញវត្ថុ។ ប្រទេសកម្ពុជានឹងងាយស្រួលក្នុងការប្រែប្រួលមកប្រើប្រព័ន្ធទូទាត់ប្រាក់ ហេតុដូច្នេះហើយបានជានៅពេលអភិវឌ្ឍប្រព័ន្ធធនាគារ មានតែធនាគារមួយចំនួនប៉ុណ្ណោះទទួលបានជោគជ័យ។ ជាមួយនឹងក្របខ័ណ្ឌច្បាប់ត្រឹមត្រូវ ការអប់រំផ្នែកហិរញ្ញវត្ថុ ការប្រើប្រាស់ប្រព័ន្ធទូទាត់ដើម្បីមើលឃើញភាពវិជ្ជមាននៅក្នុងវិស័យលក់រាយគឺមានច្រើនណាស់៕
Photo Credit link: http://www.packwebasia.com/
- Video Advertisement -
English 
ខ្មែរ 
