ធនាគារជាតិ៖ ដង្ហើមវិស័យសំណង់និងអចលនទ្រព្យ អាស្រ័យថាតើរដ្ឋគ្រប់គ្រងកូរីដបានកម្រិតណា

• 4 ខែ​មិថុនា 2021
• Uncategorized
• 13 មើល

វិស័យសំណង់ និងអចលនទ្រព្យ ធ្លាប់ត្រូវបានព្យាករណ៍ថានឹងងើបឡើងវិញជាបណ្តើរៗ ក្នុងឆ្នាំ ២០២១ នេះ ទន្ទឹមនឹងលំហូរការវិនិយោគពីបរទេស។ ប៉ុន្តែ ក្រោយព្រឹត្តិការណ៍សហគមន៍ខែកុម្ភៈ ការព្យាករណ៍បានប្រែប្រួល ហើយកំណើនគឺអាស្រ័យទាំងស្រុងថាតើរដ្ឋាភិបាលទប់ទល់នឹងជំងឺកូវីដបានល្អកម្រិតណា ហើយតើសកម្មភាពសេដ្ឋកិច្ចពិភពលោក និងក្នុងតំបន់នឹងរីកចម្រើនកម្រិតណា។

នេះបើយោងតាមរបាយការណ៍ស្ថិរភាពហិរញ្ញវត្ថុប្រចាំឆ្នាំ២០២០ របស់ធនាគារជាតិនៃកម្ពុជា ដែលចេញផ្សាយនៅថ្ងៃទី ៣១ ឧសភា។

របាយការណ៍ដដែលបានឱ្យដឹងទៀតថា គម្រោងសំណង់ដែលត្រូវបានអនុម័តនៅឆ្នាំ ២០២០ បានកើនឡើងត្រឹមតែ ១% ប៉ុណ្ណោះ តម្លៃទុនវិនិយោគវិញ គឺធ្លាក់ចុះដល់ទៅ ៣២,១%។

លើសពីនេះ ផ្ទៃគម្រោងសាងសង់សរុបដែលបានអនុម័តក្នុងឆ្នាំ ២០២០ ក៏បានធ្លាក់ចុះ ២៦,៩% ផងដែរ (សល់ត្រឹម១៧ លានម៉ែត្រការ៉េ)។ កត្តានេះ បានធ្វើឱ្យវិស័យសំណង់ បង្អាក់កំណើនសេដ្ឋកិច្ច -០,២% នៅឆ្នាំ ២០២០។

របាយការណ៍ដដែល បានបន្ថែមទៀតថា ការធ្លាក់ចុះនៅក្នុងវិស័យទាំង ២ នេះ គឺដោយសារតែចំនួនការផ្អាកគម្រោង ការវិនិយោគថយចុះ និងការធ្លាក់ចុះនូវការនាំចូលសម្ភារៈសំណង់ ដែលភាគច្រើនបណ្ដាលមកពីវិបត្តិកូវីដ។

ដូច្នេះ សង្ឈឹមធំបំផុតរបស់វិស័យទាំង ២ នេះ គឺស្ថិតក្នុងដៃរបស់រដ្ឋាភិបាលថាអាចគ្រប់គ្រងស្ថានភាពកូវីដបានកម្រិតណា។

យ៉ាងណាក្ដី របាយការណ៍នេះបានបន្ថែមទៀតថា ជាមួយកំណើនសេដ្ឋកិច្ចសកល និងក្នុងតំបន់ បូកនឹងការប្រសើរឡើងនៃទំនុកចិត្តទីផ្សារ នៅឆមាសទី ២ នៃឆ្នាំ២០២១ កម្ពុជាអាចនឹងទាក់ទាញលំហូរវិនិយោគផ្ទាល់ពីបរទេសបន្ថែម ដែលនឹងធ្វើឱ្យវិស័យទាំងពីរនេះ រីកចម្រើនជាបណ្តើរៗ ផងដែរ។

• អត្ថបទវិភាគ
• Analysis
• អត្ថបទវិភាគ
• Economy and Finance