ធនាគារពិភពលោកគ្រោងវិនិយោគអភិវឌ្ឍន៍គម្រោងសេដ្ឋកិច្ចខៀវ (Blue Economy) នៅកោះកុង

• 28 ខែ​ធ្នូ 2020
• Uncategorized @km
• 8 មើល

ធនាគារពិភពលោក គ្រោងនឹងវិនិយោគអភិវឌ្ឍន៍គម្រោងសេដ្ឋកិច្ចខៀវ ឬ Blue Economy នៅប្រទេសកម្ពុជា ដោយខេត្តកោះកុងអាចនឹងត្រូវជ្រើសរើសជាគោលដៅមួយក្នុងចំណោមគោលដៅដទៃនៃការអនុវត្តគម្រោងនេះ។

នេះបើតាមលទ្ធផលកិច្ចប្រជុំស្តីពីពីវឌ្ឍនភាព យុទ្ធសាស្រ្ត និងផែនការគ្រប់គ្រងធនធានតំបន់ឆ្នេរតាមបែបសមាហរណកម្ម នៅខេត្តកោះកុង កាលពីថ្ងៃទី ២៨ ធ្នូ កន្លងមកនេះ។

លោក អ៊ុក ភ័ក្ត្រា អភិបាលរងខេត្តកោះកុង បានឱ្យដឹងថាបច្ចុប្បន្នអាជ្ញាធរកំពុងពិនិត្យលទ្ធភាពក្នុងការជ្រើសរើសខេត្តកោះកុង ជាខេត្តគោលដៅវិនិយោគសម្រាប់គម្រោងសេដ្ឋកិច្ចខៀវ។

យោងតាមរបាយការណ៍របស់ធនាគាពិភពលោកចុះថ្ងៃទី ២០ ខែមេសាឆ្នាំ ២០២០ ធនាគាពិភពលោក បានស្នើសុំទឹកប្រាក់ប្រមាណ ៤,៤២ លានដុល្លារអាមេរិក សម្រាប់ជាជំនួយដល់គម្រោង«តំបន់បរិស្ថានចម្រុះពិភពលោក» របស់កម្ពុជា។

គួរបញ្ជាក់ផងដែរថា សេដ្ឋកិច្ចខៀវ ឬ Blue Economy គឺជាការធ្វើអាជីវកម្មផង និងថែរក្សាបរិស្ថានសមុទ្រផង។ គម្រោងនេះត្រូវបានអនុម័តដោយក្រសួងបរិស្ថាន និងក្រសួងអភិវឌ្ឍន៍ជនបទ កាលពីថ្ងៃទី ៣០ មេសា ឆ្នាំ ២០១៩ មកម្ល៉េះ ដោយគ្រោងបញ្ចប់គម្រោងនៅថ្ងៃទី ៣១ ធ្នូ ឆ្នាំ ២០២៥។

សូមរម្លឹកថា ខេត្តកោះកុង មានឆ្នេរវែងជាងគេ (២៣៧ គីឡូម៉ែត្រ) ដោយលាតសន្ធឹង ចាប់ពីចំណុចចាំយាម ព្រំប្រទល់ខេត្តត្រាតប្រទេសថៃ ដល់ស្រុកស្រែអំបិលព្រំប្រទល់ខេត្តព្រះសីហនុ។

លើសពីនេះ ខេត្តកោះកុងបាន និងកំពុងទាក់ទាញគម្រោងអភិវឌ្ឍន៍ធំៗជាច្រើន ជាមួយនឹងទុនវិនិយោគតម្លៃរាប់ពាន់លានដុល្លារ ឧទាហរណ៍ដូចជា គម្រោងតារាសាគរ ព្រលានយន្តហោះថ្មី គម្រោងវារីអគ្គិសនី និងគម្រោងរោងចក្រថាមពលធ្យូងថ្មជាដើម។ (អានបន្ថែម និងបន្ថែម)

• ថាមពល និងបរិស្ថាន
• គម្រោងអភិវឌ្ឍន៍
• គម្រោងអភិវឌ្ឍន៍
• ថាមពល និងបរិស្ថាន