ប្រតិភូកាណាដា កំពុងចាប់អារម្មណ៍ពីសក្តានុពលវិនិយោគលើវិស័យធំៗចំនួន៦ នៅកម្ពុជា

• 8 ខែ​មិថុនា 2024
• ព័ត៌មានក្នុងស្រុក
• 14 មើល

គណៈប្រតិភូធុរកិច្ចនៃការិយាល័យតំណាងសភាពាណិជ្ជកម្មកម្ពុជាប្រចាំទីក្រុង Montreal ប្រទេសកាណាដា បានជួបពិភាក្សាការងារជាមួយក្រុមប្រឹក្សាអភិវឌ្ឍន៍កម្ពុជា ដើម្បីស្វែងយល់ពីកាលានុវត្តភាព និងសក្តានុពលវិនិយោគនៅកម្ពុជា ពិសេសលើវិស័យធំៗចំនួន ៦ គឺវិស័យកសិកម្មនិងការកែច្នៃ វិស័យទេសចរណ៍ សុខាភិបាល អចនទ្រព្យ សេវាកម្ម និងឧស្សាហកម្ម។

នេះបើតាមជំនួបពិភាក្សាការងាររវាងឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា និងគណៈប្រតិភូធុរកិច្ចនៃការិយាល័យតំណាងសភាពាណិជ្ជកម្មកម្ពុជាប្រចាំទីក្រុង Montreal តំណាងដោយ លោក Kelvin Mo ប្រធានសភាពាណិជ្ចកម្មកាណាដា នៅថ្ងៃទី៥ ខែមិថុនា ឆ្នាំ២០២៤ ។

នាឱកាសនោះ ឯកឧត្តម នុត អ៊ុនវ័ណរ៉ា បានលើកបង្ហាញនូវបរិយាកាសវិនិយោគនៅកម្ពុជាដែលមានលក្ខណៈបើកចំហ និងងាយស្រួលសម្រាប់ការបណ្តាក់ទុនវិនិយោគលើគ្រប់វិស័យ ជាពិសេសការគាំទ្ររបស់រដ្ឋាភិបាលដល់ប្រព័ន្ធសេដ្ឋកិច្ចទីផ្សារតាមរយៈការធានានូវក្របខ័ណ្ឌច្បាប់ ការដាក់ចេញនូវក្របខ័ណ្ឌគោលនយោបាយ និងការលើកទឹកចិត្តដល់ការវិនិយោគជាដើម។

រីឯ លោក Kelvin Mo ប្រធានសភាពាណិជ្ជកម្មកាណាដាក៏បានសម្តែងនូវសុទិដ្ឋិនិយមអំពីព័ត៌មានដែលទទួលបានពីដំណើរទស្សនកិច្ចមកកាន់ប្រទេសកម្ពុជា និងសក្តានុពលរបស់ខ្លួនក្នុងការផ្តល់អត្ថប្រយោជន៍ដល់សហគមន៍ធុរកិច្ចកាណាដាដែលកំពុងស្វែងរកការពង្រីកការវិនិយោគ និងសកម្មភាពអាជីវកម្មនៅកម្ពុជា។

គួរកត់សម្គាល់ថា ប្រទេសកាណាដា គឺជាដៃគូពាណិជ្ជកម្មធំជាងគេទីប្រាំបីរបស់កម្ពុជា ដោយការវិនិយោគផ្ទាល់ពីកាណាដាមកកម្ពុជាឈានដល់ ២,០២៦ពាន់លានដុល្លារក្នុងឆ្នាំ២០២២។ លើសពីនេះ កាណាដាផ្តល់កូតាដោយមិនគិតពន្ធដល់កម្ពុជាលើទំនិញដូចជាសម្លៀកបំពាក់ ស្បែកជើង និងវាយនភណ្ឌ។

• Cooperation and networking