កម្ចីក្នុងវិស័យសំណង់ និងអចលនទ្រព្យកើនឡើង ១៤ពាន់លានដុល្លារ ក្នុងឆមាសទី១-២០២២

1 ខែសីហា 2022
Uncategorized
8 មើល

គិតត្រឹមខែមិថុនា ឆ្នាំ ២០២២ ប្រាក់កម្ចីសរុបដែលផ្តល់ដល់វិស័យឯកជនបានកើនឡើងដល់ជាង ៥១,៥ពាន់លានដុល្លារ ដែលកើនឡើងជាង ២៣% បើធៀបនឹងពេលដូចគ្នានៅឆ្នាំមុន។

ក្នុងចំណោមវិស័យទាំងអស់ កម្ចីផ្តល់ឱ្យវិស័យសំណង់ និងអចលនទ្រព្យស្រូបយកច្រើនជាងគេ ដល់ទៅជាង ៣២% ឬប្រមាណ ១៤ ពាន់លានដុល្លារ។

យោងតាមរបាយការណ៍របស់ធនាគារជាតិនៃកម្ពុជា (NBC) ដែលបានចេញផ្សាយកាលពីថ្ងៃទី ២៥ ខែកក្កដា សម្រាប់គ្រឹះស្ថានធនាគារ ប្រាក់កម្ចីទិញផ្ទះផ្ទាល់ខ្លួនស្រូបយក ១៣,៧% នៃកម្ចីសរុប ខណៈដែលវិស័យសំណង់ និងការជួញដូរអចលនទ្រព្យ ស្រូបយក ៩,៣% រៀងៗគ្នា។

របាយការណ៍បានបន្ថែមថា ប្រាក់កម្ចីដែលផ្តល់ដល់វិស័យទាំង២ នេះនៅតែបន្តកើនឡើង ទោះបីជាមានការរីករាលដាលនៃជំងឺកូវីដ១៩ ក៏ដោយ។

ក្នុងឆមាសនេះ វិស័យសំណង់កើនឡើងបន្ដិចបន្ដួច ដោយសារការកើនឡើងនៃការវិនិយោគពីបរទេស និងកំណើននៃប្រាក់ចំណូលក្នុងស្រុក ដែលបណ្តាលឱ្យតម្រូវការរីកធំធាត់។

យ៉ាងណាក្ដី គម្រោងសាងសង់ដែលបានអនុម័ត ទាំងតម្លៃវិនិយោគ ផ្ទៃក្រឡា និងចំនួនគម្រោង នៅតែធ្លាក់ចុះប្រមាណ ៣៣% ៣២% និង២១% រៀងៗគ្នា ក្នុងឆមាសនេះ។

សម្រាប់វិស័យអចលនទ្រព្យ តម្លៃលំនៅឋានក្នុងទីក្រុងភ្នំពេញនៅតែមានស្ថិរភាពក្នុងរយៈពេល៦ ខែ នេះ ប៉ុន្តែព្យាករថានឹងកើនឡើង៣,៥% បើធៀបនឹងឆ្នាំមុន ខណៈតម្លៃនៅតាមបណ្តាខេត្តផ្សេងទៀតក៏កើន ១,៧% ផងដែរ។

ប្រតិបត្តិការទិញផ្ទះត្រូវបានព្យាករថានឹងកើនឡើង១២,៥ នៅឆ្នាំនេះ ខណៈដែលប្រតិបត្តិការសម្រាប់ខុនដូនឹងធ្លាក់ចុះ ៤៤% ។

របាយការណ៍ដដែលបន្ដថា ប្រព័ន្ធធនាគាររបស់កម្ពុជាជារួម នៅតែរឹងមាំ ជាមួយនឹងទ្រព្យសម្បត្តិសកម្មជាង ៧៥ ពាន់លានដុល្លារ ខណៈកម្ចីមិនដំណើរការ (កម្ចីដែលអ្នកខ្ចីគ្មានលុយសង) មានត្រឹមជាង ២% ប៉ុណ្ណោះ។

គួរបញ្ជាក់ថា បច្ចុប្បន្ន ប្រទេសកម្ពុជាមានធនាគារពាណិជ្ជចំនួន ៥៨ ធនាគារឯកទេសចំនួន ៩ និងគ្រឹះស្ថានមីក្រូហិរញ្ញវត្ថុចំនួន ៨៦ ដែលមានការិយាល័យកណ្តាល និងសាខាសរុបចំនួន ២,៦១៤ នៅទូទាំងប្រទេស។

- Video Advertisement -