កម្ពុជានាំចូលអគ្គិសនី១៣០មេហ្គាវ៉ាត ពីវារីអគ្គិសនីដូនសាហុង

• 26 ខែ​មីនា 2020
• Uncategorized
• 8 មើល

ទំនប់វារីអគ្គិសនីដូនសាហុង នៅក្នុងទឹកដីឡាវ ជាប់ព្រំដែនកម្ពុជា ចាប់ផ្តើមបញ្ជូនថាមពលអគ្គិសនី មកកម្ពុជា តាមការគ្រោងទុក ដើម្បីឆ្លើយតបទៅនឹងតម្រូវការប្រើប្រាស់ថាមពលកើនឡើង នៅកម្ពុជា ជាពិសេសនៅក្នុងរដូវប្រាំងឆ្នាំនេះ។

“ក្នុងជំហានដំបូង កម្ពុជានាំចូលថាមពល ១៣០ មេហ្គាវ៉ាត ប៉ុណ្ណោះ ដែលជាតម្រូវការជាក់ស្តែង” នេះបើតាមការបញ្ជាក់ របស់ លោក វ៉ិចទ័រ ហ្សូណា អគ្គនាយកនៃអគ្គនាយកដ្ឋានថាមពល និងជាអ្នកនាំពាក្យក្រសួងរ៉ែ និងថាមពល។

លោក វ៉ិចទ័រ ហ្សូណា បានឲ្យដឹងថា ឡាវបានបញ្ជូនថាមពលតាមខ្សែបញ្ជូនមកព្រំដែនកម្ពុជា នៅត្រង់ខេត្តស្ទឹងត្រែង រួចបន្តបញ្ជូនមករាជធានីភ្នំពេញ។

លោក វ៉ិចទ័រ ហ្សូណា ថ្លែងថា៖ “វាអាស្រ័យទៅនឹងតម្រូវការ បើតម្រូវការយើងទាប យើងមិនអាចយកខ្ពស់បានដែរ ព្រោះវាសល់ភ្លើង។ ព្រោះយើងមិនទិញតែពីឡាវតែមួយឯណា យើងមានផលិតកម្មអគ្គិសនីដែលយើងផលិតក្នុងស្រុកផង និងយើងនាំចូលពីក្រៅប្រទេសផង”។

ការនាំចូលថាមពលនេះ ធ្វើឡើងនៅក្រោមកិច្ចព្រមព្រៀងទិញ-លក់ រវាងក្រុមហ៊ុនវិនិយោគវារីអគ្គិសនី ដូនសាហុង (Don Sahong Dam) និងអគ្គិសនីកម្ពុជា (EDC)។

បើតាមលោក វ៉ិចទ័រ ហ្សូណា តម្លៃថាមពលទិញពីវារីអគ្គិសនីដូនសាហុង មានតម្លៃ ៧៣ សេន (ដុល្លារ)ក្នុងមួយគីឡូវ៉ាត់ម៉ោង។

គួរបញ្ជាក់ថា វារីអគ្គិសនីដូនសាហុង មានអានុភាពផលិតថាមពល២៤០មេហ្គាវ៉ាត ត្រូវបានសាងសង់នៅឆ្នាំ២០១៦ ស្ថិតនៅប្រមាណ២គីឡូម៉ែត្រ ពីព្រំដែនកម្ពុជា-ឡាវ ក្នុងខេត្តចម្ប៉ាសាក់។

ស្ថានីយវារីអគ្គិសនីនេះ វិនិយោគដោយក្រុមហ៊ុនម៉ាឡេស៊ី Mega First Corporation Berhad និងក្រុមហ៊ុនអគ្គិសនីរដ្ឋប្រទេសឡាវ EDL-Generation Public Company ក្នុងទំហំវិនិយោគប្រមាណ៥០០លានដុល្លារ៕

• ថាមពល និងបរិស្ថាន
• Energy and Environment
• ថាមពល និងបរិស្ថាន