កម្ពុជាមានទីតាំងពិនិត្យគុណភាពខ្យល់ ៥១ទីតាំង ខណៈរាជធានីភ្នំពេញមាន ១៤ទីតាំង

2 ខែវិច្ឆិកា 2022
Uncategorized
5 មើល

មន្ត្រីជាន់ខ្ពស់ក្រសួងបរិស្ថានបានបញ្ជាក់ថា នៅទូទាំងប្រទេសកម្ពុជាមានទីតាំងត្រួតពិនត្យគុណភាពខ្យល់ចំនួន៥១ ទីតាំងក្នុងការប្រមូលនូវទិន្នន័យខ្យល់ប្រចាំថ្ងៃយកមកវាយតម្លៃដើម្បីគ្រប់គ្រងគុណភាពខ្យល់នៅកម្ពុជាប្រកបដោយសុក្រឹតភាព។

នេះបើតាមការបញ្ជាក់របស់ ឯកឧត្តម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ក្នុងសន្និបាតបូកសរុបលទ្ធផលការងារបរិស្ថានឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងបរិស្ថាន ចាប់ពីថ្ងៃទី៣១ ខែតុលា ដល់ថ្ងៃទី០១ ខែវិច្ឆកា ឆ្នាំ២០២២។

ឯកឧត្តមរដ្ឋលេខាធិការមានប្រសាសន៍ថា «យោងតាមអ្វីដែលជាការត្រួតពិនិត្យទៅលើគុណភាពខ្យល់នៅក្នុងប្រទេសកម្ពុជារបស់យើងនេះ គឺយើងបានរៀបចំនៅទីតាំងត្រួតពិនិត្យខ្យល់គឺចំនួន ៥១ទីតាំងនៅក្នុងប្រទេសកម្ពុជាក្នុងនោះគឺរាជធានីភ្នំពេញមានចំនួន ១៤ទីតាំង ហើយនៅតាមបណ្ដាខេត្តមានចំនួន ៣៧ទីតាំងដើម្បីយើងប្រមូលនូវទិន្នន័យប្រចាំថ្ងៃ»។

ជាមួយគ្នានេះផងដែរ ឯកឧត្តមរដ្ឋលេខាធិការ បានឱ្យដឹងបន្ថែមថា ប្រភពបំពុលខ្យល់សំខាន់ៗមាន ៥ គឺ ទី១-ការកើនឡើងនៃចំនួនយានយន្តនិងការដឹកជញ្ជូន, ទី២-ការឆេះនៅទីលានចាក់សំរាមឬការដុតសំរាមនៅទីវាល ,ទី៣ការដុតចោលនូវកាកសំណល់និងសំភារះដែលខូចគុណភាព ,ទី៤-ការដុតកាកសំណល់កសិកម្មក្រោយការប្រមូលផល, និងទី៥-ការដុតឥន្ធនៈកខ្វក់ក្នុងឡកំដៅឬក្នុងរោងចក្រជាដើម។

ក្នុងការទប់ស្កាត់ការបំពុលខ្យល់នេះ រាជរដ្ឋាភិបាល បានដាក់ចេញនូវវិធានការសំខាន់ៗចំនួន៧ រួមមាន៖

១_ការគ្រប់គ្រងការដ្ឋានសំណង់

២_ការគ្រប់គ្រងគុណភាពប្រេងឥន្ធនៈដែលមានផ្ទុកជាតិស្ពាន់ធ័រខ្ពស់

៣_ការគ្រប់គ្រងការបញ្ចេញសារធាតុបំពុលខ្យល់ពីយានយន្ត

៤_ការគ្រប់គ្រងការបញ្ចេញសារធាតុបំពុលខ្យល់ពីទីតាំងផលិតកម្ម

៥_ការគ្រប់គ្រងការដុតសំណល់នៅទីចំហ

៦_ការកែលម្អការគ្រប់គ្រង និងធ្វើឱ្យប្រសើរឡើងបរិស្ថានទីប្រជុំជន និង

៧_ការបង្កើតប្រព័ន្ធតាមដាន និងព្យាករណ៍ការបំពុលខ្យល់ ដើម្បីកាត់បន្ថយការបំពុលខ្យល់សាធារណៈ

- Video Advertisement -