កម្ពុជា-កូរ៉េ កំពុងរួមគ្នារកយុទ្ធសាស្រ្តជំរុញសហប្រតិបត្តិការពាណិជ្ជកម្ម និងការវិនិយោគទ្វេភាគី

• 1 ខែ​កក្កដា 2025
• ព័ត៌មានក្នុងស្រុក
• 11 មើល

កម្ពុជា-កូរ៉េ បានបើកកិច្ចពិភាក្សារួមគ្នា ដើម្បីស្វែងរកដំណោះស្រាយសមស្របលើបញ្ហាប្រឈមនានា សំដៅពង្រឹង និងជំរុញកិច្ចសហប្រតិបត្តិការ ពាណិជ្ជកម្ម និងការវិនិយោគរវាងប្រទេសទាំងពីរ។នេះបើយោងតាមកិច្ចសន្ទនាលើកទី២ រវាងរដ្ឋ និងវិស័យឯកជន កម្ពុជា-កូរ៉េ ដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា រួមជាមួយ ឯកឧត្តម Park Jung Wook ឯកអគ្គរដ្ឋទូតកូរ៉េប្រចាំកម្ពុជា នៅថ្ងៃទី២៥ ខែមិថុនា ឆ្នាំ២០២៥ ដោយមានការចូរួមពីទីភ្នាក់ងារជំរុញពាណិជ្ជកម្ម និងវិនិយោគកូរ៉េ (KOTRA), ទីភ្នាក់ងារសហប្រតិបត្តិការអន្ដរជាតិកូរ៉េ (KOICA), សភាពាណិជ្ជកម្មកូរ៉េនៅកម្ពុជា (KOCHAM) និងវិស័យឯកជនជាច្រើន។

ក្នុងកិច្ចពិភាក្សានោះ ភាគីទាំងពីរ បានផ្តល់ឱកាសដល់វិនិយោគិនកូរ៉េ ដែលកំពុងវិនិយោគនៅកម្ពុជាបានលើកឡើងពីបញ្ហាប្រឈមនានា ធានាដល់ការតាមដាន និងស្វែងរកដំណោះស្រាយសមស្រប សំដៅពង្រឹង និងជំរុញកិច្ចសហប្រតិបត្តិការសេដ្ឋកិច្ច, ពាណិជ្ជកម្ម, និងការវិនិយោគ ដើម្បីកសាងជំនឿទុកចិត្តពីសំណាក់សហគមន៍ធុរកិច្ចកូរ៉េខាងត្បូង ព្រមទាំងជំរុញការវិនិយោគបន្ថែមទៀតមកកម្ពុជា។

ទន្ទឹមនឹងនេះ ឯកអគ្គរដ្ឋទូតកូរ៉េ បានបង្ហាញក្តីរីករាយជាមួយសុឆន្ទៈក្នុងការរួមគ្នាស្វែងរកដំណោះស្រាយសមស្របសម្រាប់បញ្ហាប្រឈមនានាដែលវិនិយោគិនកូរ៉េបានលើកឡើង សំដៅចូលរួមចំណែកក្នុងការលើកម្ពស់បរិយាកាសវិនិយោគ និងបរិស្ថានធុរកិច្ចនៅកម្ពុជា ក៏ដូចជាពង្រឹង និងពង្រីកវត្តមានរបស់សហគ្រាសកូរ៉េឱ្យមកបណ្តាក់ទុនវិនិយោគនៅលើទឹកដីកម្ពុជាបន្ថែមទៀត។ ឯកឧត្តម មានជំនឿថា តាមរយៈកិច្ចសន្ទនានេះ កិច្ចសហប្រតិបត្តិការទ្វេភាគី កម្ពុជា-កូរ៉េ នឹងកាន់តែល្អប្រសើរថែមមួយកម្រិតទៀត។

កិច្ចសន្ទនាខាងលើនេះ បានបញ្ជាក់ដែរថា តាមរយៈព្រឹត្តិការណ៍ “ពិព័រណ៍ម៉ាកយីហោ និងការកម្សាន្តរបស់កូរ៉េ ឆ្នាំ២០២៥” (Korea Brand and Entertainment Expo 2025)នៅកម្ពុជា កាលពីថ្ងៃទី២០-២១ ខែមិថុនាកន្លងទៅថ្មី បានស្រូបទាញអ្នកចូលទស្សនាសរុបចំនួន ៥.៣៦០នាក់ ក្នុងនោះមានក្រុមហ៊ុនកូរ៉េចំនួន ៥៥ក្រុមហ៊ុន និងអ្នកបញ្ជាទិញចំនួន ១៣៨នាក់ បានចូលរួម។ ភាគីកូរ៉េ បាបចាត់ទុកថា នេះជាព្រឹត្តិការណ៍ពាណិជ្ជកម្មធំបំផុតរបស់កូរ៉េនៅកម្ពុជាដែលមិនធ្លាប់មានពីមុនមក ហើយបានស្តែងឱ្យឃើញនូវសក្តានុពលនៃទីផ្សារកម្ពុជាកាន់តែច្បាស់៕

• Cooperation and networking