ក្រុមហ៊ុនថ្មីចំនួន៣ ត្រូវបានជ្រើសរើសជាសមាជិកក្រុមប្រឹក្សាភិបាលសម្រាប់អាណត្តិទី៣

• 15 ខែ​មករា 2018
• ព័ត៌មានក្នុងស្រុក
• 3 មើល

សមាគមអ្នកសាងសង់កម្ពុជា (CCA) ដែលបានដំណើរការជាសមាគមអ្នកម៉ៅការសាងសង់គ្រប់គ្រងដោយឯកជនក្នុងប្រទេសកម្ពុជាអស់រយៈពេល០៦ឆ្នាំ បានជ្រើសរើសសមាជិកគណៈកម្មាធិការប្រតិបត្តិរបស់ខ្លួនសម្រាប់អាណត្តិទី៣របស់ខ្លួន ដែលពន្យារអាណត្តិរបស់សមាគមសម្រាប់រយៈពេលបីឆ្នាំបន្ថែមទៀត។

 

សម្រាប់អាណត្តិថ្មីនេះ អ្នកឧកញ៉ា ពុង ឃាវសែ អគ្គនាយកក្រុមហ៊ុនវិនិយោគទុនអណិកជនកម្ពុជា (OCIC) ត្រូវបានតែងតាំងជាថ្មីជាប្រធានសមាគម CCA ។

នៅក្នុងការជួបជុំកន្លះថ្ងៃដែលមានសមាជិកជាង ១០០នាក់ នាថ្ងៃទី២១ ខែតុលា ឆ្នាំ២០១៧ នៅសណ្ឋាគារ Dara Airport សមាគម CCA បានរៀបចំការប្រជុំនេះដើម្បីជម្រាបឱ្យសមាជិករបស់ខ្លួនចូលរួមយ៉ាងសកម្មក្នុងការលើកកម្ពស់សមាគម និងជ្រើសរើសសមាជិកក្រុមប្រឹក្សាភិបាលថ្មីតាមរយៈការបោះឆ្នោតពីសមាជិក CCA ដែលបានចូលរួមទាំងអស់។

យោងតាមបទបញ្ញត្តិរបស់ CCA សមាជិកទាំងអស់ដែលមានបំណងចង់ក្លាយជាបេក្ខជនសម្រាប់បេក្ខភាពប្រធានត្រូវមានសញ្ជាតិខ្មែរ។ លើសពីនេះទៀត មានតែអ្នកដឹកនាំឬម្ចាស់ក្រុមហ៊ុនប៉ុណ្ណោះដែលត្រូវបានអនុញ្ញាតឱ្យធ្វើជាបេក្ខជន ដោយត្រូវមានសមត្ថភាពខ្ពស់និងមានបទពិសោធន៍ការងារច្រើនឆ្នាំនៅក្នុងការសាងសង់។

សំខាន់ជាងនេះទៅទៀត លក្ខន្តិកៈចែងថាបេក្ខជនត្រូវមានឆន្ទៈទទួលខុសត្រូវ​ និងជួយចែករំលែកគំនិតល្អៗ ក៏ដូចជាចំណាយលុយផ្ទាល់ខ្លួនដើម្បីអភិវឌ្ឍន៍ស្ថាប័ន។

ចាប់តាំងពីសមាគមនេះត្រូវបានបង្កើត ចំនួនសមាជិកភាពរបស់សមាគមមានការកើនឡើងយ៉ាងខ្លាំងពីចំនួន២៣ ក្នុងឆ្នាំ២០១២ មកចំនួន ៥០ ក្នុងឆ្នាំ២០១៣ ចំនួន៨០ ក្នុងឆ្នាំ២០១៤ ចំនួន១១០ ក្នុងឆ្នាំ២០១៥ និងចំនួន១២០ ក្នុងឆ្នាំ២០១៦ ហើយឥឡូវនេះមានចំនួន១៣១។ សមាជិក CCA រួមមានក្រុមហ៊ុនម៉ៅការសាងសង់ក្នុងស្រុកនិងអន្តរជាតិ ក្រុមហ៊ុនអភិវឌ្ឍន៍ អ្នកផ្គត់ផ្គង់សម្ភារសំណង់ ក្រុមហ៊ុនទិញលក់អចលនទ្រព្យ ធនាគារ និងក្រុមហ៊ុនធានារ៉ាប់រងជាដើម។

ដូចដែលបានចែងនៅក្នុងបទបញ្ញត្តិរបស់ CCA សមាជិកទាំងអស់ត្រូវបានអនុញ្ញាតឱ្យចុះឈ្មោះជាបេក្ខជនសម្រាប់សមាជិកក្រុមប្រឹក្សាភិបាល។

ក្រុមហ៊ុនសរុបចំនួន ១៥ ដែលជាសមាជិករបស់ CCA បានចុះឈ្មោះជាបេក្ខជនសម្រាប់សមាជិកក្រុមប្រឹក្សាភិបាលនៅអាណត្តិទី៣ ក្នុងនោះក្រុមហ៊ុនចំនួន៧ ត្រូវបានជ្រើសរើសក្នុងការជម្រុះ ហើយបេក្ខជនចុងក្រោយចំនួន៣ នឹងត្រូវបានតែងតាំងជាសមាជិកក្រុមប្រឹក្សាភិបាលរបស់ CCA នៅក្នុងអាណត្តិថ្មី។

ក្រុមហ៊ុន បុរីសែន សុខ ខូអិលធីឌី ជាអ្នកនាំមុខគេក្នុងបញ្ជីដោយមានសម្លេងឆ្នោត៣៦ បន្ទាប់មកគឺក្រុមហ៊ុន K.E Steel Industry Co. Ltd ដោយមានសម្លេងឆ្នោត៣១ និងក្រុមហ៊ុន SIKA (Cambodia) Ltd ដោយមានសម្លេងឆ្នោត២៨។ សមាជិកក្រុមប្រឹក្សាភិបាលដែលជាប់ឆ្នោតថ្មីបានធ្វើការប្តេជ្ញាយ៉ាងមុតមាំក្នុងការខិតខំប្រឹងប្រែងយ៉ាងខ្លាំងក្លាដើម្បីជួយឱ្យសមាគមរីកចម្រើន និងបន្តឆ្ពោះទៅរកការអភិវឌ្ឍយ៉ាងវិជ្ជមាន។

• កិច្ចការសង្គម និងការចូលរួម