ក្រុមហ៊ុនអាកាសចរណ៍ដ៏ធំ១ ប្រកាសបើកការហោះត្រង់មកកម្ពុជាផ្ទាល់ នៅខែធ្នូខាងមុខនេះ

• 22 ខែ​កញ្ញា 2025
• Uncategorized
• 11 មើល

ក្រុមហ៊ុនអាកាសចរណ៍អន្តរជាតិដ៏ធំ Turkish Airlines ដែលកំពុងមានប្រតិបត្តិការហោះហើរទៅកាន់គោលដៅជាង ៣៥០កន្លែង ជុំវិញពិភពលោក នឹងចាប់ផ្តើមហោះហើរត្រង់ និងផ្ទាល់ពីទីក្រុង Istanbul នៃសាធារណរដ្ឋតួកគីយ៉េ មកកាន់រាជធានីភ្នំពេញចាប់ពីថ្ងៃទី១០ ខែធ្នូ ឆ្នាំ២០២៥ ខាងមុខនេះ។

នេះបើយោងតាមជំនួបពិភាក្សារវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ជាមួយលោកស្រី ÜLKÜ KOCAEFE ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋតួកគីយ៉េ ដឹកនាំប្រតិភូពីក្រុមហ៊ុនអាកាសចរណ៍តួកគីយ៉េ Turkish Airlines ដែលមានលោក UMIT Develi ជាអនុប្រធាន កាលរសៀលថ្ងៃទី១៦ ខែកញ្ញា ឆ្នាំ២០២៥។

ក្នុងជំនួបនោះ ឯកឧត្តមរដ្ឋមន្រ្តី បានចាត់ទុកថា ការតភា្ជប់ប្រទេសកម្ពុជាទៅកាន់ពិភពលោកតាមរយៈក្រុមហ៊ុន Turkish Airlines គឺបានមើលឃើញពីសក្តានុពលទេសចរណ៍ដ៏ខ្លាំងក្លាដែលជាទីផ្សារទើបនឹងរះ ស្របពេលដែលអាកាសយានដ្ឋានអន្តរជាតិតេជោដ៏ទំនើប និងទាន់សម័យដែលជាសមិទ្ធិផលដ៏ធំធេងរបស់រាជរដ្ឋាភិបាលកម្ពុជាមានវត្តមាននាពេលថ្មីៗនេះ។

ឯកឧត្តម រំពឹងថា ការសម្រេចបើកការហោះហើរត្រង់នេះ នឹងជួយឱ្យកំណើនអ្នកដំណើរ និងភ្ញៀវទេសចរអន្តរជាតិមកកម្ពុជាកាន់តែច្រើនឡើងបន្ថែមទៀត តាមរយៈការតភ្ជាប់ជាមួយក្រុមហ៊ុនអាកាសចរណ៍ដែលហោះហើរដល់គោលដៅជាង៣៥០កន្លែងដល់ប្រទេសចំនួន១៣០ប្រទេសជុំវិញពិភពលោកមួយនេះ។

សូមរម្លឹកដែរថា ក្នុងរយៈពេល៧ខែនេះ (ដោយគិតចាប់ពីខែមករា ដល់ខែកក្កដា ឆ្នាំ២០២៥) កម្ពុជាទទួលបានភ្ញៀវទេសចរបរទេសសរុបចំនួន ៦១៨.៧៧១នាក់ បានទិញបណ្ណចូលទស្សនារមណីយដ្ឋានអង្គរ បើគិតជាទឹកប្រាក់មានចំនួន ២៨.៦៤៣.៤០៧ដុល្លារ កើន ៥,៣៩% ធៀបនឹងរយៈពេលដូចគ្នាកាលពីឆ្នាំ២០២៤។ (អានបន្ថែម)

• Tourism and Travelling