English 
ខ្មែរ 
ក្រុមហ៊ុន ម៉េង ឡេងអ៊ីវ បើកសម្ពោធអគារតាំងបង្ហាញផលិតផលបែបថ្មី
ជាមួយនឹងអគារតាំងបង្ហាញផលិតផលបែបថ្មី របស់ក្រុមហ៊ុន ម៉េង ឡេងអ៊ីវ គ្រុប អតិថិជន និងអ្នកទស្សនា នឹងទទួលបានបទពិសោធន៍គួរជាទីពេញចិត្ដ និងការចាប់អារម្មណ៍ច្រើនឡើងៗ នៅពេលពួកគេធ្វើការជ្រើសរើសអ្វីដែលគេត្រូវការពីក្រុមហ៊ុនផ្គត់ផ្គង់ឧបករណ៍ប្រើប្រាស់អគ្គិសនី គ្រឿងបរិក្ខារកសិកម្ម និងវិស្វកម្ម ដ៏ធំបំផុតនៅក្នុងប្រទេសកម្ពុជា។
អាគារនេះមានទីតាំងស្ថិតនៅតាមបណ្តោយមហាវិថីម៉ៅសេទុងខាងមុខស្ថានទូតចិន និងមាន ៣ ជាន់ ហើយត្រូវបានដាក់ឲ្យដំណើរការជាផ្លូវការនៅថ្ងៃទី ២៦ ខែកុម្ភៈ។ អគារនេះមិនត្រឹមតែបង្កើតឡើងដើម្បីលើកកេរ្តិ៍ឈ្មោះក្រុមហ៊ុននៅក្នុងទីផ្សារវិស្វកម្មសំណង់នោះទេ ប៉ុន្តែវាក៏រួមបញ្ចូលផងដែរនូវផលិតផលដែលជាម៉ាករបស់ខ្លួន មជ្ឈមណ្ឌលធ្វើតេស្តផលិតផល និងកន្លែងផ្តល់សេវាកម្មនៅក្នុងទីតាំងតែមួយ។
ជាន់ទីមួយត្រូវបានរចនាឡើងជាមជ្ឈមណ្ឌលពាណិជ្ជកម្មទំនើប ដែលមានដាក់លក់នូវឧបករណ៍ប្រើប្រាស់ថាមពលអគ្គិសនី ឧបករណ៍ប្រើប្រាស់ដោយដៃ និងឧបករណ៍បន្ទាប់បន្សំផ្សេងទៀត ព្រមទាំងជាមជ្ឈមណ្ឌលថែទាំ និងកន្លែងគិតលុយផងដែរ។ ជាន់នេះក៏មានកន្លែងពិសេសមួយ សម្រាប់ឲ្យអតិថិជនអាចធ្វើការសាកល្បងនូវគំរូផលិតផលដែលពួកគេចូលចិត្តផងដែរ។
ជាន់ទីពីរ និងទីបីគឺជាការិយាល័យតាំងបង្ហាញ ដែលក្នុងនោះនៅជាន់ទីពីរ គឺដាក់តាំងបង្ហាញនូវឧបករណ៍សម្អាតផ្ទះ និងម៉ាស៊ីនបូមគ្រប់ប្រភេទរួមទាំងម៉ាក Tsurumi ផងដែរ។ ចំណែកជាន់ទីបី ដាក់តាំងបង្ហាញប្រដាប់ប្រដា ឧបករណ៍ ម៉ាស៊ីន និងម៉ាស៊ីនភ្លើង ដែលបំរើឲ្យវិស័យកសិកម្ម ។
គួរបញ្ជាក់ថា ក្រុមហ៊ុន ម៉េង ឡេងអ៊ីវ ចាប់ផ្តើមជាក្រុមហ៊ុនពាណិជ្ជកម្មតូចនៅក្នុងឆ្នាំ ១៩៩៩ បន្ទាប់ពីធ្វើការផ្គត់ផ្គង់ឧបករណ៍ប្រើថាមពលអគ្គិសនី និងឧបករណ៍កសិកម្មពីប្រទេសថៃ នៅក្នុងខេត្តបន្ទាយមានជ័យ បាត់ដំបង និងរាជធានីភ្នំពេញចាប់តាំងពីដើមទសវត្សឆ្នាំ ១៩៩០។ សព្វថ្ងៃនេះ ក្រុមហ៊ុនធ្វើការចែកចាយផ្តាច់មុខនូវផលិតផលជាង ១០ ម៉ាក និងចែកចាយមិនផ្តាច់មុខនូវផលិតផល ៥ ម៉ាក សរុបគឺមានផលិតផល និងឧបករណ៍ជាង ៦០ ម៉ាក នៅក្នុងប្រទេសកម្ពុជា។ ក្នុងនោះក៏រួមមានឧបករណ៍ប្រើប្រាស់ថាមពលអគ្គិសនីរបស់ក្រុមហ៊ុន Robert Bosch(បន្ទាប់ពីការចុះហត្ថលេខាលើកិច្ចសហប្រតិបត្តិការក្នុងភាពជាដៃគូក្នុងឆ្នាំ ២០១៤)ឧបករណ៍កសិកម្ម Nikatech ពីប្រទេសជប៉ុន ឧបករណ៍ប្រើប្រាស់ថាមពលអគ្គិសនី Nikita, Makita, Maktec, Skill និងឧបករណ៍ឯកទេសសំណង់ Mikasa ម៉ាស៊ីន និងទុយោទឹក Tsurumi និងផលិតផលជាច្រើនទៀត។
ដើម្បីរក្សាភាពជាអ្នកនាំមុខក្នុងទីផ្សារ ក្រុមនេះបានពង្រីកបណ្តាញរបស់ខ្លួននៅទូទាំងប្រទេស ដែលរួមមានមជ្ឈមណ្ឌលលក់ និងអ្នកទទួលលក់បន្តនៅទូទាំងប្រទេស ដូចជា រាជធានីភ្នំពេញ ខេត្តសៀមរាប បាត់ដំបង កំពង់ចាមក្រចេះ និងខេត្តព្រះសីហនុ។ លោក ម៉េង រស្មី អ្នកគ្រប់គ្រងទូទៅរបស់ក្រុមហ៊ុននេះបានឱ្យដឹងថា ក្រុមហ៊ុនបាននឹងកំពុងរៀបចំឃ្លាំង និងសេវាថែទាំរបស់ខ្លួន ឲ្យកាន់តែប្រសើរឡើង ដើម្បីបម្រើសេចក្តីត្រូវការរបស់អតិថិជនដែលកាន់តែមានច្រើនខ្លាំងឡើង។
ក្នុងឱកាសចូលរួមជាគណៈអធិបតី ក្នុងពិធីបើកសម្ពោធអាគារតាំងបង្ហាញ ឯកឧត្តម ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម បានសម្តែងនូវមោទនភាព ដែលក្រុមហ៊ុនរបស់កម្ពុជាបានពង្រីកខ្លួនឲ្យធំឡើង និងកាន់កាប់ចំណែកទីផ្សារកាន់តែធំឡើងនៅក្នុងវិស័យនៃមុខជំនួញរបស់ខ្លួន។ ឯកឧត្តម ក៏បានលើកឡើងផងដែរថា ការចូលរួមចំណែករបស់ក្រុមហ៊ុននេះនៅក្នុងសង្គម បានឆ្លុះបញ្ចាំងឱ្យឃើញពីភាពជាដៃគូយ៉ាងរឹងមាំរវាងរដ្ឋាភិបាល និងវិស័យឯកជន។
ឯកឧត្តមបានថ្លែងនៅក្នុងពិធីថា ភាពរីកចំរើនរបស់ប្រទេសកម្ពុជា មិនអាចសម្រេចបានដោយគ្មានការចូលរួមចំណែកពីវិស័យឯកជននោះទេ ហើយក្រុមហ៊ុន ម៉េង ឡេងអ៊ីវ គឺជាឧទាហរណ៍មួយស្រាប់។ បន្ថែមលើនេះទៀត ឯកឧត្តមចង់ឲ្យក្រុមហ៊ុន ម៉េង ឡេងអ៊ីវ គ្រុប នៅតែរីកចម្រើន ដើម្បីអាចចូលរួមជាមួយរដ្ឋាភិបាលក្នុងការអភិវឌ្ឍប្រទេស។