ធនាគារជាតិ៖ កំណើនឥណទានវិស័យសំណង់ និងអចលនទ្រព្យថមថយមកត្រឹម ២៣% ក្នុងឆ្នាំ ២០២០

3 ខែមិថុនា 2021
Uncategorized
8 មើល

កំណើននៃកម្ចីសម្រាប់វិស័យសំណង់ និងអចលនទ្រព្យក្នុងឆ្នាំ ២០២០ ថមថយមកត្រឹមប្រមាណ ២៣% ដោយសារតែគម្រោងសំណង់មួយចំនួនត្រូវបានផ្អាកដោយសារវិបត្តិកូវីដ។ ប៉ុន្តែ ធនាគារជាតិវិភាគថា ការថយចុះនៃឥណទាននេះ ជាកត្តាវិជ្ជមានពោលគឺ ជាការជួយកាត់បន្ថយហានិភ័យកំណើនទីផ្សារអចលនទ្រព្យហួសកំណត់។

នេះ បើយោងតាមរបាយការណ៍ស្ថិរភាពហិរញ្ញវត្ថុរបស់ធនាគារជាតិនៃកម្ពុជាចេញផ្សាយនៅថ្ងៃទី ៣១ ឧសភា។

របាយការណ៍បានបន្តថា ក្នុងចំណោមកំណើនមធ្យម ២៣% នោះ វិស័យសំណង់មានអត្រាកំណើន ២៦,៣% ដែលជាការធ្លាក់ចុះបន្តិចបន្តួចបើធៀបនឹងកំណើនប្រមាណ ២៩,១% ក្នុងឆ្នាំ ២០១៩ ។

ដោយឡែក ឥណទានក្នុងវិស័យអចលនទ្រព្យវិញ មានអត្រាកំណើនត្រឹមតែ ២០,១% ដែលធ្លាក់ចុះខ្លាំងបើធៀបកំណើនប្រមាណ ៤០,៣% ក្នុងឆ្នាំ ២០១៩ ។

យោងតាមធនាគារជាតិ ការធ្លាក់ចុះនៃកំណើននេះ គឺជាការជួយកាត់បន្ថយហានិភ័យកំណើនទីផ្សារអចលនទ្រព្យហួសកំណត់ ដែលតែងតែជាកង្វល់របស់អ្នកវិភាគអន្តរជាតិដូចជា ADB, IMF, និង WorldBank ជាដើម។ (អានបន្ថែម)

គួរបញ្ជាក់ផងដែរ ក្នុងឆ្នាំ ២០២០ ឥណទានដែលផ្ដល់ឱ្យវិស័យសំណង់ និងអចលនទ្រព្យ នៅតែមានចំណែកច្រើនក្នុងកម្ចីសរុបទាំងអស់ ពោលគឺមានចំណែកប្រមាណ ៣២% នៃកម្ចីសរុប។ ក្នុងនោះ វិស័យសំណង់ស្រូបយក ១០,២% អចលនទ្រព្យស្រូបយក ៨,៧% ហើយកម្ចីទិញអចលនទ្រព្យរបស់បុគ្គលទូទៅស្រូបយកប្រមាណ ១៣,៧%។