ធនាគារពិភពលោក ប្រកាសទម្លាក់ការព្យាករកំណើនសេដ្ឋកិច្ចកម្ពុជាមកត្រឹម ៤% ក្នុងឆ្នាំ២០២៥
នៅក្នុងការផ្លាស់ប្តូរដ៏សំខាន់មួយទាក់ទងនឹងទស្សនវិស័យសេដ្ឋកិច្ចរបស់ប្រទេសកម្ពុជា ធនាគារពិភពលោក (World Bank_WB) បានធ្វើការព្យាករណ៍សារជាថ្មីនៅថ្ងៃទី១១ ខែមិថុនា ឆ្នាំ២០២៥នេះថា កំណើនសេដ្ឋកិច្ចរបស់កម្ពុជាសម្រាប់ឆ្នាំ២០២៥ ត្រូវបានកែសម្រួល ដោយការកាត់ទម្លាក់អត្រាព្យាករពី ៥,៥% មកនៅត្រឹម ៤%ប៉ុណ្ណោះ។ ការកែសម្រួលនេះធ្វើឡើងបន្ទាប់ពីមានការប្រកាសស្រដៀងគ្នាដោយរដ្ឋាភិបាលកម្ពុជា និងការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ដែលបានបង្ហាញពីនិន្នាការពាក់ព័ន្ធដែលជំរុញដោយបញ្ហាប្រឈមនានាទាំងសកល និងក្នុងស្រុកផងដែរ។
យោងតាមបច្ចុប្បន្នភាពសេដ្ឋកិច្ចកម្ពុជា របស់ធនាគារពិភពលោក ដែលមានចំណងជើងថា «ពុះពារ ភាពមិនប្រាកដប្រជា និង ការពង្រឹងចំណូលសម្រាប់អនាគតកម្ពុជា» បានលើកឡើងពីកត្តាជាច្រើនដែលបានរួមចំណែកដល់ការធ្លាក់ចុះនេះ។ របាយការណ៍នេះបានចង្អុលបង្ហាញពីភាពមិនប្រាកដប្រជានៃសេដ្ឋកិច្ចសកល ការផ្លាស់ប្តូរគោលនយោបាយពាណិជ្ជកម្ម ការជាប់គាំងក្នុងវិស័យអចលនទ្រព្យ និងការរិតបន្តឹងនៃវដ្តឥណទាន ដែលបានជះឥទ្ធិពលយ៉ាងខ្លាំងទៅលើការព្យាករណ៍នេះ។ យោងតាមធនាគារដដែលបានបន្ថែមថា កំណើននេះត្រូវបានគេរំពឹងថានឹងនៅតែមានកំណើនទាបសម្រាប់ឆ្នាំ២០២៦ គឺអាចកើនបានត្រឹមតែ ៤,៥%ប៉ុណ្ណោះ ដែលនេះជាការឆ្លុះបញ្ចាំងពីបញ្ហាប្រឈមដែលនៅតែបន្ត។
WB បន្តថា ដើម្បីរក្សាបាននូវកំណើននៅក្នុងបរិការណ៍នេះ កម្ពុជាចាំបាច់ត្រូវផ្តោតលើការប្រឹងប្រែងធ្វើឱ្យសេដ្ឋកិច្ចកាន់តែមានភាពសម្បូរបែប និងការបង្កើតបរិយាកាសអំណោយផលសម្រាប់ការវិនិយោគក្នុងវិស័យឯកជន និងបង្កើតឱកាសការងារ។
លោកស្រី Tania Meyer ប្រធានគ្រប់គ្រងធនាគារពិភពលោកប្រចាំកម្ពុជា ថ្លែងថា៖ «ការធ្វើពិពិធកម្មសេដ្ឋកិច្ចមានសារៈសំខាន់ណាស់សម្រាប់កម្ពុជាក្នុងការរក្សាកំណើនឱ្យមានចីរភាព និងការបង្កើតការងារចំពេលមានភាពមិនប្រាកដប្រជាបែបនេះ។ ជាងនេះទៅទៀត កម្ពុជាត្រូវពង្រីកមូលដ្ឋានសេដ្ឋកិច្ចរបស់ខ្លួនឱ្យលើសពីការពឹងផ្អែកតែលើវិស័យសំណង់ និងការនាំចេញសម្លៀកបំពាក់ ដោយត្រូវជំរុញបន្ថែមនូវការផលិត និងសេវាកម្មមានតម្លៃបន្ថែមខ្ពស់ថែមទៀត»។
យ៉ាងណាមិញ លោកស្រីក៏បានលើកឡើងពីតួនាទីដ៏សំខាន់នៃកំណែទម្រង់ប្រាក់ចំណូលក្នុងការជំរុញបរិយាកាសអាជីវកម្មមានស្ថានភាពកាន់តែប្រសើរជាងមុន ហើយអាចបង្កើតលំហសារពើពន្ធដ៏ចាំបាច់មួយសម្រាប់ការវិនិយោគសំខាន់ៗទៅលើមូលធនមនុស្ស និងហេដ្ឋារចនាសម្ព័ន្ធ។
ដើមឡើយ កាលពីចុងឆ្នាំ២០២៤ ធនាគារពិភពលោកធ្លាប់បានព្យាករណ៍ថា កំណើនសេដ្ឋកិច្ចរបស់កម្ពុជានឹងឈានដល់ ៥,៥% សម្រាប់ឆ្នាំ២០២៥ និង ២០២៦ រួមជាមួយការព្យាករណ៍ពីមុនកំណើន ៥,៣% សម្រាប់ឆ្នាំ ២០២៤ និង ៥% សម្រាប់ឆ្នាំ២០២៣។ (អានបន្ថែម)
នាពេលចុងក្រោយនេះដែរ រាជរដ្ឋាភិបាលកម្ពុជា និងអ្នកជំនាញរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ក៏ទើបតែបានលើកឡើងពីបញ្ហាប្រឈមនានាដែលបង្កជាផលប៉ះពាល់រហូតដល់បានទាញទម្លាក់អត្រាព្យាករណ៍របស់ពួកគេរៀងៗខ្លួនមកនៅត្រឹម ៥,២% និង ៤,៩% សម្រាប់ឆ្នាំ២០២៥ ផងដែរ។ (អានបន្ថែម និងបន្ថែម)
នៅពេលដែលប្រទេសកម្ពុជាកំពុងបន្តពុះពារជាមួយនឹងភាពមិនច្បាស់លាស់ទាំងអស់នេះ ការផ្តោតសំខាន់លើការបង្កើតបរិយាកាសអំណោយផលសម្រាប់ការវិនិយោគក្នុងវិស័យឯកជន និងការបង្កើតឱកាសការងារនៅតែជាកត្តាដ៏ចាំបាច់។ ភាគីពាក់ព័ន្ធទាំងត្រូវតែជំរុញឱ្យសហការគ្នារកយុទ្ធសាស្ត្រដែលអាចពង្រឹងភាពធន់នឹងសេដ្ឋកិច្ច និងជំរុញកំណើនប្រកបដោយនិរន្តរភាព ចំពេលដែលមានការប្រែប្រួលនៃទិដ្ឋភាពពិភពលោក។
តាមរយៈការប្រើប្រាស់វិធីសាស្រ្តរួម និងការបង្កើនការប្រុងប្រយ័ត្ន កម្ពុជាអាចដាក់ខ្លួនជាមូលដ្ឋានគ្រឹះសម្រាប់អនាគតសេដ្ឋកិច្ចដ៏រឹងមាំ និងចម្រុះជាងមុន ដោយធានាថាវានៅតែមានភាពធន់នឹងការប្រឈមមុខនឹងការវិវត្តនៃសក្ដានុពលសកល។
- Video Advertisement -
English 
ខ្មែរ 
