ប្រធាន EIA៖ អាស៊ានគួរធ្វើពិពិធកម្មថាមពល ដោយរៀនពីវិបត្តិថាមពលនៅអ៊ឺរ៉ុប

28 ខែតុលា 2022
Uncategorized
5 មើល

ប្រធានទីភ្នាក់ងារថាមពលអន្តរជាតិ (IEA) បានព្រមានថា អាស៊ីអាគ្នេយ៍ងាយរងគ្រោះដោយវិបត្តិថាមពលដោយសារតែកំណើនយ៉ាងឆាប់រហ័សនៃតម្រូវការក្នុងតំបន់ហើយគួរតែធ្វើពិពិធកម្មប្រភពថាមពល ដែលមានន័យថាត្រូវពឹងផ្អែកលើប្រភពថាមពលផ្សេងៗគ្នា។ នេះបើតាមលោក Fatih Birol បានថ្លែងប្រាប់សារព័ត៌មានសិង្ហបុរី CNA កាលពីថ្ងៃអង្គារទី ២៥ ខែតុលា ឆ្នាំ២០២២។

លោក Birol បានបន្ថែមថា អាស៊ីអាគ្នេយ៍គួររៀនពីវិបត្តិដែលកំពុងកើតឡើងនៅអឺរ៉ុប ដោយសារតែការពឹងផ្អែកខ្លាំងលើថាមពលរបស់រុស្ស៊ី ដែលធ្វើឱ្យខ្លួនប្រឈមមុខនឹងការចំណាយខ្ពស់ និងបញ្ហាផ្គត់ផ្គង់លើថាមពល។

លោកបានបន្តថា «អឺរ៉ុបបានធ្វើកំហុសមួយ ទោះបីជា IEA បានគូសបញ្ជាក់ និងព្រមានជាច្រើនឆ្នាំមកហើយថា មិនគួរពឹងផ្អែកលើប្រភពផ្គត់ផ្គង់ដ៏សំខាន់តែមួយ សម្រាប់អ្វីក៏ដោយ។ ហ្គាស និងប្រេងភាគច្រើន [ដែលអឺរ៉ុបនាំចូល] មានប្រភពសំខាន់តែមួយគត់ គឺរុស្ស៊ី»។

ក្នុងការថ្លែងនេះផងដែរ លោក Birol ក៏បានជំរុញឱ្យអាស៊ីអាគ្នេយ៍គួរតែវិនិយោគបន្ថែមទៀតលើវិស័យថាមពលស្អាត ដើម្បីកាត់បន្ថយការពឹងផ្អែករយៈពេលវែងរបស់ខ្លួនលើឥន្ធនៈហ្វូស៊ីល ដែលងាយនឹងបង្កើតបញ្ហាប្រឈម ដោយសារតែការប្រែប្រួលនៃតម្លៃ និងឥទ្ធិពលអាក្រក់លើសេដ្ឋកិច្ច។

លោកបានយល់ឃើញថា « វា (ឥន្ធនៈហ្វូស៊ីល) គ្រប់គ្រងដោយក្រុមហ៊ុននាំចេញថាមពលធំៗមួយចំនួន ហើយដោយសារតែហេតុផលនយោបាយ ឬហេតុផលផ្សេងទៀត ក្រុមហ៊ុនទាំងនោះអាចនឹងផ្លាស់ប្តូរចិត្តរបស់ពួកគេ ដោយបង្កើនតម្លៃ។ ហើយសេដ្ឋកិច្ចរបស់អ្នក នឹងងាយរងគ្រោះទាំងស្រុងនៅពេលតម្លៃឡើងខ្ពស់»។

លោកបានផ្តល់ជាអនុសាសន៍បន្ថែមថា ដំណោះស្រាយដ៏ល្អបំផុតក្នុងកាលៈទេសៈបែបនេះ គឺការងាកទៅរកជម្រើសថាមពលស្អាត ដូចជាថាមពលពន្លឺព្រះអាទិត្យ ថាមពលវារីអគ្គិសនី និងជីវថាមពល និងការប្រើប្រាស់យានយន្តដូចជារថយន្តអគ្គិសនីជាដើម។

គួរបញ្ជាក់ថា ការប្រើប្រាស់ថាមពលស្អាត មិនត្រឹមតែជួយលើការផ្គត់ផ្គត់ប្រភពថាមពលប៉ុណ្ណោះទេ ប៉ុន្តែវាក៏ជួយដល់ការប្តេជ្ញាចិត្តប្រយុទ្ធប្រឆាំងនឹងការប្រែប្រួលអាកាសធាតុ និងជំរុញដំណោះស្រាយថាមពលស្អាតសម្រាប់ហេតុផលគោលនយោបាយឧស្សាហកម្មផងដែរ។

- Video Advertisement -