រដ្ឋប្រកាសចាប់ផ្តើមជីកព្រែកហ្វូណនតេជោ នៅអំឡុងដើមខែធ្នូខាងមុខនេះ!

• 25 ខែ​តុលា 2025
• Uncategorized @km
• មើល

បើគ្មានអ្វីប្រែប្រួលទេ ព្រែកជីកហ្វូណនតេជោ នឹងចាប់ផ្តើមជីក នៅពេលទឹកស្រកខាងមុខ អាចចុងខែវិច្ឆិកា ឬយ៉ាងយូរដើមខែធ្នូ ឆ្នាំ២០២៥ ហើយគ្រោងនឹងបញ្ចប់នៅអំឡុងឆ្នាំ២០២៨ខាងមុខផងដែរ។នេះបើតាមឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងកាលថ្ងៃទី២២ ខែតុលា ឆ្នាំ២០២៥។

ឯកឧត្តម ផន រឹម បានបន្តថា បច្ចុប្បន្ន: គម្រោងកំពុងស្ថិតក្នុងដំណាក់កាល វាស់វែង និងដោះស្រាយផលប៉ះពាល់ ជូនប្រជាពលរដ្ឋ ដោយក្រុមការងារកំពុងធ្វើសកម្មភាពនៅកំណាត់ទី២ (ខេត្តកណ្តាល) ស្រុកកោះធំ។

ឯកឧត្តមបន្តថា សារៈសំខាន់: គម្រោងប្រវត្តិសាស្រ្តនេះ ជាជំហានសំខាន់ក្នុងការកែប្រែមុខមាត់កម្ពុជា លើវិស័យនាវាចរណ៍ និងការដឹកជញ្ជូនតាមផ្លូវទឹក និងសមុទ្រ ធានាឯករាជ្យភាព និងសុវត្ថិភាពនៃការដឹកជញ្ជូន។

បន្ថែមពីនេះ ឯកឧត្តមថា គម្រោងនេះ ក៏នឹងជួយលើកកម្ពស់ការតភ្ជាប់ផ្លូវទឹកក្នុងប្រទេសទៅសមុទ្រជាតិ និងអន្តរជាតិ កាត់បន្ថយចម្ងាយ និងតម្លៃដឹកជញ្ជូន ជំរុញវិស័យធនធានទឹក កសិកម្ម ទេសចរណ៍ និងរួមចំណែកដល់ចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។

គួររម្លឹកថា ព្រែកជីកហ្វូណនតេជោ បានបើកការដ្ឋានសាងសង់ ដោយសម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា កាលថ្ងៃទី៥ ខែសីហា ឆ្នាំ២០២៤។ គម្រោងនេះមានប្រវែង ១៨០គីឡូម៉ែត្រ (ទទឹងមុខកាត់ផ្នែកខាងលើប្រវែង ១០០ម៉ែត្រ ផ្នែកខាងក្រោម ៨០ម៉ែត្រ) តភ្ជាប់ពីព្រែកតាកែវ នៃទន្លេមេគង្គ រួចចូលតាមបណ្តាព្រែក នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ខេត្តកណ្តាល តាកែវ កំពត និងកែប៕ (អានបន្ថែម)

• infrastructure development
• water infrastructure