សម្តេចតេជោ៖ រដ្ឋចំណាយលើការខាតបង់អគ្គិសនីប្រមាណ ១០០លានដុល្លារ ក្នុងឆ្នាំនេះ

• 6 ខែ​កក្កដា 2022
• ព័ត៌មានសំណង់
• 5 មើល

រដ្ឋាភិបាលកម្ពុជា បានប៉ាន់ប្រមាណថា ក្នុងឆ្នាំ២០២២នេះ កម្ពុជាអាចនឹងខាតបង់ថវិកាជាតិប្រមាណជា ១០០លានដុល្លារ លើថាមពលអគ្គិសនី នេះគឺដោយសារតែការឡើងថ្លៃនៃតម្លៃប្រេងឥន្ធនៈ ដែលបណ្តាលមកពីវិបត្តិសង្គ្រាមរុស្សុី-អ៊ុយក្រែន ។

សម្តេចតេជោ ហ៊ុន សែន បានលើកឡើងកាលទី០៦ កក្កដា ថាការវិនិយោគលើថាមពលអគ្គិសនីបានឈានចូលដល់ការខាតបង់ហើយ តែរាជរដ្ឋាភិបាលមិនបានដំឡើងថ្លៃទេ ព្រោះមិនចង់ឱ្យប៉ះពាល់ដល់ការចំណាយរបស់ប្រជាពលរដ្ឋ។

«បើគ្មានការទប់ទល់របស់រដ្ឋចំពោះអគ្គិសនីកម្ពុជាទេ ម៉្លេះតម្លៃអគ្គិសនីនៅកម្ពុជា មានតម្លៃគុណនឹង២រួចបាត់ទៅហើយ ម្យ៉ាងទៀតរដ្ឋក៏បានត្រៀមទុនដើម្បីជួយការខាតបង់អគ្គិសនីកម្ពុជាថែមទៀតផង» សម្តេចបានបន្ថែម។

ជាមួយគ្នានេះដែរ សម្ដេចក៏បានស្នើឲ្យប្រជាពលរដ្ឋទូទាំងប្រទេសទាំងអស់នាំគ្នាជួយសន្សំសំចៃការប្រើប្រាស់ភ្លើង ពិសេសត្រូវតែចាប់ផ្តើមពីស្ថាប័នរដ្ឋមុនគេ ដែលប្រើប្រាស់ដោយចំណាយថវិកាជាតិ ព្រោះបើមិនចឹងទេ កម្ពុជានឹងខាតបង់កាន់តែធ្ងន់ធ្ងរជាងនេះទៅទៀត។

គួររម្លឹកដែរថា សម្តេច ហ៊ុន សែន ក៏បានបង្ហាញក្តីបារម្ភមួយគឺ បើវិបត្តិនេះកើតឡើងពីបញ្ហាសង្គ្រាមរុស្ស៊ី-អ៊ុយក្រែន និងការដាក់ទណ្ឌកម្មលើរុស្ស៊ី ជាមូលហេតុដែលធ្វើឱ្យមានវិបត្តិថាមពលអគ្គីសនីអាចនឹងអូសបន្លាយដល់ឆ្នាំក្រោយទៀត អញ្ចឹងវិបត្តិនេះនឹងរឹតតែធ្ងន់ធ្ងរទៅទៀត៕

• ថាមពល និងបរិស្ថាន
• Energy and Environment
• ថាមពល និងបរិស្ថាន