English 
ខ្មែរ 
សម្តេចហ៊ុនសែនចង់ឲ្យខេត្តព្រះសីហនុក្លាយជាមជ្ឈមណ្ឌលហិរញ្ញវត្ថុដូចខ្លាសេដ្ឋកិច្ចអាស៊ី
សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា កាលពីថ្ងៃទី១៦ ខែ វិច្ឆិកា បានបង្ហើបពីមហិច្ឆតាចង់ធ្វើឲ្យខេត្តព្រះសីហនុក្លាយទៅជាមជ្ឈមណ្ឌលហិរញ្ញវត្ថុ ដូចទៅនឹងបណ្តាខ្លាសេដ្ឋកិច្ចក្នុងតំបន់អាស៊ី។
ការលើកឡើងពីមហិច្ឆតានេះ ធ្វើឡើងក្នុងអំឡុងពេលដែលសម្តេច អញ្ជើញជាអធិបតិភាពក្នុងពិធីបើកការដ្ឋានសាងសង់ផ្លូវចំនួន ៣៤ ខ្សែក្នុងក្រុងព្រះសីហនុ ដែលនឹងត្រូវសាងសង់ឡើងស្របតាមស្តង់ដាបច្ចេកទេសតែមួយក្នុងទំហំទឹកប្រាក់ជា ២៩៤លានដុល្លារអាមេរិក។ (អានបន្ថែម)
សម្តេចតេជោ ហ៊ុន សែន ថ្លែងថា៖ “ពីដើមមានតំបន់ហុងកុង សិង្ហបុរី និងនៅកន្លែងមួយចំនួនដូចជា សៀងហៃ ក្លាយជាមជ្ឈមណ្ឌលហិរញ្ញវត្ថុ។ យើងក៏មានមហិច្ឆតាទៅដល់គោលដៅនោះដែរ ដែលទៅជាមជ្ឈមណ្ឌលហិរញ្ញវត្ថុ ដែលអាចជឿទុកចិត្ត មិនមែនគ្រាន់តែនៅក្នុងប្រទេសកម្ពុជាទេ តែឈានទៅដល់កម្រិតនៃស្ថានភាពហិរញ្ញវត្ថុតំបន់ និងអន្តរជាតិផងដែរ”។
យោងតាមការឲ្យនិយមន័យរបស់មូលនិធិរូបិយវត្ថុអន្តរជាតិ (IMF) “មជ្ឈមណ្ឌលហិរញ្ញវត្ថុ” មានន័យថា គឺជាទីក្រុង ឬតំបន់ដែលមានស្ថាប័នហិរញ្ញវត្ថុធំៗ និងច្រើនប្រភេទបានយកទីក្រុង ឬតំបន់ទាំងនោះ ធ្វើជាទីស្នាក់ការកណ្តាលរបស់ខ្លួន ដែលស្ថាប័នទាំងនេះ នឹងជួយសម្រួលដល់សកម្មភាពសេដ្ឋកិច្ច ដែលជាលទ្ធផលជួយបង្កើតចំណូលជូនជាតិបានកាន់តែច្រើន។
ក្នុងនោះ ដើម្បីសម្រេចបានមហិច្ឆតានេះ សម្តេចតេជោ ហ៊ុន សែន បានបញ្ជាក់ថា លុះត្រាតែកម្ពុជាធ្វើការអភិវឌ្ឍន៍ខេត្តព្រះសីហនុឲ្យបានត្រឹមត្រូវ តួយ៉ាង ដូចជាការសាងសង់ផ្លូវក្នុងខេត្តឲ្យមានគុណភាពល្អជាប់បានយូរជាដើម។ តាមការបញ្ជាក់ដដែលរបស់សម្តេច ការជ្រើសរើសខេត្តព្រះសីហនុ គឺដោយសារខេត្តនេះមានសក្តានុពលយ៉ាងខ្លាំងខ្លាក្នុងការរកប្រាក់ដើម្បីផ្គត់ផ្គង់ដល់ថវិកាជាតិ និងចែករំលែកទៅវិស័យដទៃតាមសេចក្តីត្រូវការនៃការអភិវឌ្ឍន៍ប្រទេសជាតិ។
សម្តេចថ្លែងថា៖ “ទីក្រុងមួយនេះ អាចថាជាទីក្រុងពហុបំណង ដែលមានស្ទើរគ្រប់វិស័យ ការដឹកជញ្ជូនក៏នៅទីនេះ កំពង់ផែទឹកជ្រៅក៏នៅទីនេះ ឧស្សាហកម្មក៏នៅទីនេះ សេវាកម្មក៏នៅទីនេះ ហើយអាចទៅថ្ងៃក្រោយឈានទៅជាតំបន់មូលដ្ឋានហិរញ្ញវត្ថុនៅក្នុងតំបន់ទៀត»។
ជាក់ស្តែង សម្តេចមានចក្ខុវិស័យធ្វើឲ្យខេត្តជាប់មាត់សមុទ្រមួយនេះ ក្លាយជាច្រកនៃសេដ្ឋកិច្ចជាតិតាំងពីទស្សវត្ត៩០មកម្ល៉េះ។ ក្នុងន័យនេះ រដ្ឋាភិបាលកំពុងយកចិត្តយ៉ាងខ្លាំងលើការអភិវឌ្ឍន៍ប៉ូលសេដ្ឋកិច្ចទី២ ខេត្តព្រះសីហនុនេះ បន្ទាប់ពីប៉ូលសេដ្ឋកិច្ចទី១ភ្នំពេញ។
គួរបញ្ជាក់ផងដែរថា ខេត្តព្រះសីហនុ គឺជាខេត្តដែលមានសក្តានុពលបំផុតមួយ ដែលក្នុងរយៈពេលប៉ុន្មានឆ្នាំចុងក្រោយនេះ ខេត្តមួយនេះ បានទាក់ទាញគម្រោងវិនិយោគយ៉ាងច្រើនសន្ធឹកសន្ធាប់ ហើយគិតមកដល់បច្ចុប្បន្ន មានអគារខ្ពស់ៗបាននិងកំពុងសាងសង់ព្រោងព្រៀតប្រមាណជាជាង ៨០០អគារក្នុងខេត្តព្រះសីហនុ។