English 
ខ្មែរ 
សំណើបង្កើតគណៈកម្មាធិការចម្រុះគ្រប់គ្រងសំណង់សម្រាប់កម្ពុជា
សមាគមគ្រប់គ្រងសំណង់កូរ៉េ (CMAK) បានជួយដល់កម្ពុជាដើម្បីអនុវត្តប្រព័ន្ធគ្រប់គ្រងសំណង់ (CM) ក្នុងគោលបំណងដើម្បីលើកកម្ពស់គុណភាពសំណង់សម្រាប់អគារនាពេលអនាគតនៅកម្ពុជា។ ដើម្បីធានាឲ្យមានភាពប្រសើរឡើងនៃប្រព័ន្ធគ្រប់គ្រងសំណង់(CM)យ៉ាងមានប្រសិទ្ធិភាព CMAK បានស្នើបង្កើតគណៈកម្មាធិការរួមមួយដែលមានឈ្មោះថា គណៈកម្មាធិការសហប្រតិបត្តិការផ្នែកសំណង់កម្ពុជា-កូរ៉េ ដោយមានសមាសភាពនៃអង្គភាពមកពីវិស័យឯកជន និងវិស័យសាធារណៈនៃប្រទេសទាំងពីរ។
ពង្រាងសេចក្តីបង្កើតគណៈកម្មាធិការចម្រុះដែលស្នើឡើងដោយ CMAK ដែលទស្សនាវដ្តីសំណង់ និងអចលនទ្រព្យទទួលបាននៅពាក់កណ្តាលខែកុម្ភៈ បានបញ្ជាក់ថា គណៈកម្មាធិការនេះគឺចាំបាច់ដើម្បីគាំទ្រដល់សកម្មភាពសម្រាប់ភាពប្រសើរឡើងនៃការគ្រប់គ្រងសំណង់ប្រកបដោយប្រសិទ្ធិភាព សកម្មភាពបណ្តុះបណ្តាលបុគ្គលិកសំណង់ និងផ្នែកបច្ចេកវិទ្យា ព្រមទាំងបង្កើតនូវក្រុមហ៊ុនសម្ព័ន្ធអាជីវកម្ម និងដៃគូយុទ្ធសាស្ត្រនៅក្នុងប្រទេសកម្ពុជា។
គណៈកម្មាធិការនេះក៏នឹងធ្វើការសិក្សាស្រាវជ្រាវលើគម្រោងសាងសង់ថ្មីៗរបស់ក្រុមហ៊ុនសម្ព័ន្ធអាជីវកម្ម ឬដៃគូយុទ្ធសាស្ត្រ ដែលមានសក្តានុពលដើម្បីអនុវត្តប្រព័ន្ធ CM នេះ។ ភារកិច្ចចុងក្រោយ គឺអនុវត្តគម្រោងនានាដែលបង្កើតឡើងដោយគណៈកម្មាធិការចម្រុះនេះ និងដែលទាក់ទងទៅនិងការអភិវឌ្ឍឧស្សាហកម្មសំណង់នៅកម្ពុជា។
សមាគមគ្រប់គ្រងសំណង់កូរ៉េ (CMAK) ដែលត្រូវបានបង្កើតឡើងនៅក្នុងឆ្នាំ ១៩៩៧ និងដែលមានអ្នកម៉ៅការជាង ១៧០ នៅប្រទេសកូរ៉េខាងត្បូង បានចុះហត្ថលេខាលើអនុស្សរណៈយោគយល់គ្នាជាមួយនិងក្រសួងរៀបចំដែនដី នគរូបនីយកម្ម និងសំណង់ (MLMUPC) ក្នុងឆ្នាំ ២០១៤ ដើម្បីជួយរៀបចំកូដសំណង់របស់កម្ពុជា ដើម្បីនាំយកសេវាប្រព័ន្ធគ្រប់គ្រងសំណង់មកកាន់ប្រទេសកម្ពុជា។
នៅឆ្នាំដដែលនេះដែរ CMAK ក៏បានចុះហត្ថលេខាលើកិច្ចព្រមព្រៀងស្រដៀងគ្នាជាមួយសមាគមអ្នកសាងសង់កម្ពុជា (CCA) ដែលមានសមាជិកក្រុមហ៊ុនរកស៊ីទទួលទានទាក់ទងនឹងវិស័យសំណង់ជាង ១០០ក្រុមហ៊ុន។ ដោយសារតែគណៈកម្មាធិការចម្រុះដែលបានស្នើឡើងខាងលើមានគោលបំណងចម្បងឲ្យស្ថាប័នទាំងពីរនេះចូលជាសមាជិក ក្រសួងរៀបចំដែនដីនគរូបនីយកម្ម និងសំណង់ កំពុងរង់ចាំយោបល់ពីសមាគមអ្នកសាងសង់កម្ពុជា ទាក់ទងនឹងពង្រាងកិច្ចព្រមព្រៀង មុនពេលផ្តល់ចម្លើយតបទៅកាន់ភាគីកូរ៉េ។
CMAK បានផ្ញើសៀវភៅណែនាំស្តីពីប្រព័ន្ធគ្រប់គ្រងសំណង់ ដែលផ្អែកលើការអនុវត្តរបស់ប្រទេសកូរ៉េ មកកាន់ភាគីកម្ពុជា ដើម្បីជួយភាគីកម្ពុជាក្នុងការបង្កើតនូវប្រកាសស្តីពីប្រព័ន្ធគ្រប់គ្រងសំណង់ ដែលត្រូវនឹងបរិបទប្រទេសកម្ពុជា ហើយដែលប្រកាសនេះត្រូវបានរំពឹងថានឹងបញ្ចប់នៅចុងឆ្នាំនេះ។
នៅពេលដែលរដ្ឋាភិបាលអនុម័តច្បាប់នេះ អាគារនៅក្នុងប្រទេសកម្ពុជាជាពិសេសគម្រោងថ្មីៗ នឹងត្រូវអនុវត្តតាមប្រព័ន្ធគ្រប់គ្រងសំណង់ ដើម្បីបង្កើនគុណភាពសំណង់ ព្រមទាំងសន្សំសំចៃចំណាយសាងសង់។ អ្វីដែលគួរឲ្យចាប់អារម្មណ៍នោះ គឺថាការអនុវត្តន៍នូវប្រព័ន្ធគ្រប់គ្រងសំណង់នឹងអាចបង្កើតឲ្យមាននូវក្រុមហ៊ុនដែលអាចរកប្រាក់ចំណូលតាមរយៈការផ្តល់សេវាគ្រប់គ្រងសំណង់ទៅកាន់គម្រោងនានានៅទូទាំងប្រទេស។
លោក Lee Soo Hyun សាស្ត្រាចារ្យនៃមហាវិទ្យាល័យវិស្វកម្មនៅសាកលវិទ្យាល័យជាតិសេអ៊ូល និងជាតំណាងរបស់ CMAK បានលើកឡើងថា ការប្រើប្រាស់ប្រព័ន្ធគ្រប់គ្រងការសាងសង់បានត្រឹមត្រូវ អាចសន្សំសំចៃចំណាយសាងសង់ ពេលវេលា ព្រមទាំងធានាគុណភាព និងសុវត្ថិភាព និងជួយគ្រប់គ្រងហានិភ័យនៃសំណង់ទៀតផង ប៉ុន្តែវាគឺជាការលំបាកក្នុងការអនុវត្តវិធីសាស្ត្រសាងសង់របស់ប្រទេសកូរ៉េខាងត្បូងនៅកម្ពុជា ព្រោះប្រទេសកម្ពុជាមិនទាន់មានច្បាប់សាងសង់ដែលល្អនៅឡើយ។
ប្រព័ន្ធ CM នេះក៏នឹងប៉ះពាល់ដល់ច្បាប់សាងសង់ដែលរង់ចាំការអនុម័តជាយូរមកហើយ ដែលមន្ត្រីក្រសួងរៀបចំដែនដី នគរូបនីយកម្ម និងសំណង់ គិតថានឹងត្រូវបានយកទៅអនុម័តនៅក្នុងរដ្ឋាភិបាលនីតិកាលទី ៥ នៃរដ្ឋសភានេះ។ អ្នកនៅក្នុងឧស្សាហកម្មនេះ សង្ឃឹមថាច្បាប់នេះនឹងអាចដោះស្រាយបញ្ហានានាដែលទាក់ទងទៅនឹងឧស្សាហកម្មសំណង់។
ថ្លែងនៅក្នុងកិច្ចប្រជុំតាមដានជាមួយនឹង CMAK និង CCA ឯកឧត្តម អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានស្វាគមន៍ជំនួយ និងការប្តេជ្ញាចិត្តរបស់ CMAK ក្នុងការបញ្ចប់ការងារពង្រាងប្រកាសស្តីពីការគ្រប់គ្រងសំណង់នៅចុងឆ្នាំនេះ ក្នុងគោលបំណងដើម្បីដាក់អនុវត្តវានៅក្នុងឆ្នាំ ២០១៧ ខាងមុខនេះ។