ហេតុអ្វីរុស្សី និងចិន សម្រុកទិញអចលនទ្រព្យនៅថៃក្នុងកាលៈទេសៈនេះ? កម្ពុជាគួររៀនសូត្រអ្វីខ្លះ?
ក្នុងរយៈពេល ៩ ខែដំបូងនៃឆ្នាំ ២០២២នេះ ចិនបានទិញខុនដូនៅប្រទេសថៃ សរុបជាង ៣.៥០០ យូនីត ដែលមានតម្លៃជិត ១៨ពាន់លានដុល្លារ ។ នេះបើយោងតាមមជ្ឈមណ្ឌលព័ត៌មានអចលនទ្រព្យ REIC ។
តួលេខនេះស្មើនឹង ៤៩% នៃចំនួនយូនីតដែលបានផ្ទេរទៅឱ្យជនបរទេសទាំងអស់ ដែលធ្វើឱ្យចិនក្លាយជាអ្នកទិញខុនដូបរទេសច្រើនជាងគេក្នុងប្រទេសថៃ។ ថៃក៏រំពឹងថានឹងមានភ្ញៀវទេសចរចិនយ៉ាងតិច ៥លាននាក់នៅឆ្នាំ២០២៣ ដែលក្នុងនោះនឹងមានអ្នកទិញអចលនទ្រព្យជាច្រើនផងដែរ។
ប្រភពដដែលបានបង្ហាញថា អ្នកទិញអចលនទ្រព្យបរទេសលំដាប់ទៅ២ នៅប្រទេសថៃ គឺជនជាតិរុស្ស៊ី។ ប្រមាណ ៤០% នៃខុនដូដែលគ្រប់គ្រងដោយបរទេសនៅកោះភូកេត ត្រូវបានកាន់កាប់ដោយជនជាតិរុស្ស៊ីដែលមានតម្លៃសរុប ៨៨០លានបាត ស្មើនឹងប្រមាណជា ២៦លានដុល្លារ។
ជាក់ស្ដែង ជនជាតិចិន និងរុស្សី គឺជាវិនិយោគិនអចលនទ្រព្យក្នុងប្រទេសថៃតាំងពីមុនកូវីដ-១៩ មកម្លេះ ជាពិសេសនៅទីក្រុងធំៗដូចជា បាងកក ភូកេត ប៉ាតាយ៉ា និងឈៀងម៉ៃ។
ប៉ុន្តែ ដោយសារតែភាពមិនប្រាកដប្រជាក្រោយវិបត្តិកូវីដ១៩ វិបត្តិសេដ្ឋកិច្ចលោក និងសង្គ្រាមរុស្ស៊ី-អ៊ុយក្រែន ធ្វើឱ្យក្រុមទាំង២ សម្រុកមកទិញអចលនទ្រព្យកាន់តែច្រើនឡើងនៅក្នុងប្រទេសនេះ។
ហេតុអ្វី? ហើយកម្ពុជាអាចរៀនសូត្រអ្វីពីលំហូរវិនិយោគិននេះ?
មុនសង្រ្គាមរុស្ស៊ី-អ៊ុយក្រែន ប្រទេសប៊ុលហ្គារី និងអាល្លឺម៉ង់ គឺជាគោលដៅទិញអចលនទ្រព្យសម្រាប់ជនជាតិរុស្ស៊ី។ ប៉ុន្តែ បច្ចុប្បន្ន តំបន់មជ្ឈិមបូព៌ា ទួរគី និងអាស៊ីអាគ្នេយ៍ គឺជាទីតាំង៣ ដែលរុស្សីសម្រុកទិញអចលនទ្រព្យ។
យោងតាមសារព័ត៌មាន Al Jazeera ក្រោយសង្រ្គាមរុស្ស៊ី- អ៊ុយក្រែន ថៃបានក្លាយជាជម្រកសុវត្ថិភាពសម្រាប់ពលរដ្ឋរុស្ស៊ី។ ជនជាតិរុស្សីចាប់ផ្ដើម ខ្លាច និងធុញទ្រាន់នឹងភាពមិននឹងនរនៅក្នុងប្រទេសខ្លួន និងអឺរ៉ុប។ ការវិនិយោគនៅទីតាំងថ្មី ហើយបង្កើតជាផ្ទះទី២ គឺវិធីសាស្ត្របន្ធូរបន្ថយហានិភ័យ។
តម្លៃដែលទាបជាងតម្លៃនៅប្រទេសរបស់ពួកគេ ក៏ជាកត្តាជំរុញមួយ។ ជាក់ស្ដែង រុស្សីអាចប្រើលុយត្រឹម ៥.០០០.០០០ដុល្លារ ដើម្បីទិញអចលនទ្រព្យដ៏ប្រណីតមួយនៅជាប់មាត់សមុទ្រថៃ។ ពូកគេអាចមានក្ដីសុខជាមួយធម្មជាតិរបស់កោះភូកេតដែលមានឆ្នេរដ៏ស្រស់ស្អាត និងសង្គមដែលទំនើបមួយ ជាជាងធុញទ្រាន់នឹងសង្គ្រាមនៅប្រទេសរបស់ខ្លួន។
ក្រៅពីរុស្សី ចិនក៏ងាកមកទិញអចលនទ្រព្យនៅប្រទេសថៃដែរ ក៏ព្រោះតែហេតុផលស្រដៀងៗគ្នានេះ។ សារពត៌មាន Reuters បានសម្ភាសន៍ពលរដ្ឋចិនមួយចំនួនដែលបានទិញអចលនទ្រព្យនៅក្នុងប្រទេសថៃ។
ជនជាតិចិនគិតថា ការវិនិយោគលើការទិញលំនៅដ្ឋាននៅបរទេស គឺជាសំណាញ់សុវត្ថិភាព ក្រោយពួកគេរៀនមេរៀនពីវិបត្តិកូវីដ និងជាការបញ្ចៀសហានិភ័យសេដ្ឋកិច្ចនៅក្នុងប្រទេសរបស់ពួកគេ។ ជនជាតិចិន ចាប់ផ្ដើមមានការតក់ស្លុតចំពោះការគោលនយោបាយក្នុងស្រុកដែតឹងរ៉ឹង ផ្ដាច់ការ និងពិសេសគឺអាចដាក់ចេញដោយគ្មានការរំពឹងទុក ដូចជាការបិទខ្ទប់ភ្លាមៗជាដើម ។
លើសពីនេះ តម្លៃអចលនទ្រព្យទាប ភាពបត់បែននៃកត្តាសង្គមដែលស្រួលរស់របស់ប្រទេសថៃ សាលារៀនអន្តរជាតិល្អៗ ប្រព័ន្ធសុខាភិបាលគុណភាពខ្ពស់ ក៏ដូចជាភាពសម្បូរបែបនៃវិស័យទេសចរណ៍ និងបដិសណ្ឋារកិច្ចរបស់ប្រទេសថៃ ក៏ជាកត្តាទាក់ទាញអ្នកវិនិយោគចិនកាន់តែច្រើនមកកាន់ប្រទេសថៃផងដែរ។
រដ្ឋាភិបាលថៃផ្ទាល់ ក៏បានដាក់ចេញនូវគោលនយោបាយថ្មីៗ ទាក់ទងនឹងការវិនិយោគខ្នាតធំ ហើយទទួលបានទិដ្ឋការរស់នៅរយៈពេល១០ ឆ្នាំ ឬការសុំសញ្ជាតិតាមរយៈការវិនិយោគជាដើម។ នេះកឺការបង្កើតភាពងាយស្រួលមួយបន្ថែមទៀត សម្រាប់វិនិយោគិនក្រៅប្រទេសដែលមានទុនខ្ពស់។
លោក Mesak Chunharakchot ប្រធានសមាគមអចលនទ្រព្យថៃបាននិយាយថា៖ «ជនជាតិចិនកំពុងទិញផ្ទះ បញ្ជូនកូនទៅសាលាអន្តរជាតិ និងឲ្យឪពុកម្តាយមកស្នាក់នៅប្រទេសថៃដើម្បីមើលថែចៅៗ»។
ភ្នាក់ងារអចលនទ្រព្យចិនលោក Owen Zhu បាននិយាយថាអាកប្បកិរិយារបស់អ្នកទិញចិនបានផ្លាស់ប្តូរហើយ បន្ទាប់ពីវិបត្តិ ។ ពេលនេះ ចិនទិញផ្ទះនៅថៃដើម្បីរស់នៅ មិនមែនទិញទុកចោលសម្រាប់វិនិយោគដូចមុននោះទេ។
លោកបានបន្ថែមថា ទឹកប្រាក់ ២៩០,០០០ដុល្លារ អាចទិញផ្ទះសាមញ្ញមួយនៅក្នុងទីក្រុងធម្មតាៗមួយនៃប្រទេសចិន ប៉ុន្តែអាចទិញអាផាតមិនប្រណីតមួយនៅកណ្តាលទីក្រុងបាងកក។ ដូច្នេះ ជនជាតិចិនខ្លះនឹងលក់ផ្ទះមួយក្នុងប្រទេសចិន ហើយទិញអចលនទ្រព្យនៅប្រទេសថៃសម្រាប់ចូលនិវត្តន៍។
តើកម្ពុជាអាចរៀនអ្វីខ្លះពីរឿងនេះ?
គោលនយោបាយលើកទឹកចិត្ត គឺជាពាក្យគន្លឹះដែលភាគីពាក់ព័ន្ធក្នុងទីផ្សារអចលនទ្រព្យកម្ពុជាអាចរៀនសូត្របាន។ កត្តាតម្លៃ ទីតាំង គុណភាពសំណង់ និងសក្ដានុពលចំណញ គឺមិនគ្រប់គ្រាន់ទៀតទេ ដើម្បីទាក់ទាញអ្នកវិនិយោគថ្មីៗ។
ដោយសារភាពមិនច្បាស់លាស់ក្នុងសង្គម មនុស្សត្រូវការមានអារម្មណ៍សុវត្ថិភាព ហើយកន្លែងដែលពួកគេសម្រេចចិត្តទិញអចលនទ្រព្យ ត្រូវតែផ្តល់លក្ខខណ្ឌគ្រប់គ្រាន់សម្រាប់ពួកគេដើម្បីសាងសង់ផ្ទះទី ២។
ស្ថេរភាពសង្គម គុណភាពនៃជីវិត លទ្ធភាពទទួលបានការអប់រំប្រកបដោយគុណភាព ប្រព័ន្ធសុខាភិបាលស្ដង់ដារ ច្បាប់និងបទប្បញ្ញត្តិដែលច្បាស់លាស់ ការលើកទឹកចិត្តលើទិដ្ឋាការ របៀបរស់នៅដែលអាចបត់បែនបាន និងភាពសម្បូរបែបនៃវិស័យទេសចរណ៍ និងបដិសណ្ឋារកិច្ច គឺជាអ្វីដែលអ្នកវិនិយោគត្រូវការ។ កម្ពុជាត្រូវកសាងទំនុកចិត្តបន្ថែមទៀតលើអ្នកវិនិយោគ។
លំហូរនៃការវិនិយោគពីបរទេសក្នុងវិស័យអចលនទ្រព្យ អាចនឹងមានភាពងាយស្រួលដូចមុនសម័យកូវីដ-១៩ នោះទេ ប៉ុន្តែជាមួយនឹងយន្តការថ្មី និងចំគន្លឹះ កម្ពុជាអាចទាក់ទាញអ្នកវិនិយោគប្រកបដោយគុណភាព និងនិរន្តរភាពជាងមុន។
មិនត្រឹមតែប្រទេសថៃទេ វៀតណាម និងប្រទេសជិតខាងផ្សេងទៀតក៏កំពុងត្រៀមខ្លួនសម្រាប់យុគសម័យថ្មីនៃការវិនិយោគអចលនទ្រព្យនេះដែរ។
- Video Advertisement -
English 
ខ្មែរ 
