អ្នកអភិវឌ្ឍន៍ថៃចាប់ផ្តើមលក់គម្រោងឡើងវិញក្រោយពីអ្នកទិញមិនអាចបង់ប្រាក់បន្ត

• 7 ខែ​តុលា 2019
• ព័ត៌មានសំណង់
• 6 មើល

ក្រុមហ៊ុនអភិវឌ្ឍន៍ជាច្រើននៅប្រទេសថៃ បាននិងកំពុងចាប់ផ្តើមលក់គម្រោងលំនៅដ្ឋានរបស់ខ្លួនឡើងវិញ បន្ទាប់ពីអតិថិជនរបស់ពួកគេ មិនអាចបន្តបង់ប្រាក់ដែលនៅសេសសល់ដោយសារតែការរឹតត្បិតទៅលើសមាមាត្រនៃដែនកំណត់តម្លៃប្រាក់កម្ចី LTV កំណត់ដោយរដ្ឋាភិបាលថៃ។

យោងតាមការស្ទង់មតិជាតិ ដែលបានរាយការណ៍ដោយសារព័ត៌មាន The Nation កាលពីចុងខែកញ្ញា បានបង្ហាញថា គម្រោងដែលត្រូវបានលក់ទៅឲ្យអតិថិជនដំបូងម្តងរួចទៅហើយ ឥឡូវនេះ គឺត្រូវបានដាក់លក់សារជាថ្មី ពីព្រោះធនាគារបដិសេធមិនផ្តល់ប្រាក់កម្ចីដល់អតិថិជនទាំងនោះ។

តាមការរាយការណ៍ដដែល ក្រុមហ៊ុន Ananda Development Plc គឺស្ថិតក្នុងចំណោមក្រុមហ៊ុនដែលធ្វើការដាក់លក់យូនីតខុនដូរបស់ខ្លួនក្នុងតម្លៃចន្លោះពី ១,២៩ លានបាត (ប្រមាណជា ៤២,១៧៦ ដុល្លារអាមេរិក) និង ២៥,៩ លានបាតក្នុងមួយយូនីត (ប្រមាណជា ៨៤៦,៧៩២ ដុល្លារអាមេរិក) ។ ភាគច្រើននៃយូនីតខុនដូទាំងនេះ គឺត្រូវបានលក់ម្តងរួចទៅហើយ។

ស្រដៀងគ្នានេះដែរ ក្រុមហ៊ុន Park Land Charan-Pinklow ក៏បាននិងកំពុងធ្វើការផ្តល់ជូននូវការលក់យូនីតខុនដូរបស់ខ្លួនក្នុងតម្លៃចាប់ពី ២,២៧ លានបាត (ប្រមាណ ៨៨,២៧៥ ដុល្លារអាមេរិក) ក្នុងមួយយូនីត។

ថ្លែងប្រាប់សារព័ត៌មានខាងលើ លោក Kessara Thanyalakpark នាយកប្រតិបត្តិរងនៃក្រុមហ៊ុន Sena Development Plc បានមានប្រសាសន៍ថា ប្រមាណជា ២០ ភាគរយនៃអតិថិជនរបស់ក្រុមហ៊ុនដែលបានស្នើសុំប្រាក់កម្ចីត្រូវបានធនាគារធ្វើការច្រានចោល ដែលនេះ គឺបានបង្ខំឲ្យក្រុមហ៊ុនដាច់ចិត្តធ្វើការដាក់គម្រោងលក់ម្តងទៀត។

យោងតាមប្រភពដដែល តម្លៃយូនីតខុនដូដែលដាក់លក់ម្តងទៀតនេះ គឺនឹងទាបជាងតម្លៃក្នុងទីផ្សារ ដោយសារអតិថិជនដំបូងបានទូទាត់ប្រាក់កក់ដំបូងម្តងរួចមកហើយ។

សមាមាត្រនៃដែនកំណត់តម្លៃប្រាក់កម្ចី LTV ត្រូវបានរឹតបន្តឹងនៅពេលធនាគារថៃបារម្ភថាអាចនឹងមានប្រាក់កម្ចីមិនល្អនៅក្នុងវិស័យអចលនទ្រព្យ។

• អត្ថបទវិភាគ
• ចំណេះដឹង និង បទពិសោធន៍
• Analysis
• អត្ថបទវិភាគ
• Knowledge and Key Success
• ចំណេះដឹង និង បទពិសោធន៍