English 
ខ្មែរ 
ឧទ្យានឧស្សាហកម្មមិត្តភាពបង្កើតស្តង់ដារថ្មី
Le Urban Eco Park មិនត្រឹមតែជាទីក្រុងរណបដែលមានលក្ខណៈអេកូឡូស៊ីប៉ុណ្ណោះទេ ប៉ុន្តែថែមទាំងជាការអភិវឌ្ឍចម្រុះដំបូងគេ ដែលមានតំបន់ឧស្សាហកម្ម បណ្តុំលំនៅដ្ឋាន អគារការិយាល័យពាណិជ្ជកម្ម ហាងលក់ទំនិញរាយ និងតំបន់លំហែរីករាយ រួមបញ្ចូលគ្នានៅក្នុងទីកន្លែងតែមួយ ។
គម្រោងអភិវឌ្ឍនេះមានទីតាំងស្ថិតនៅតាមបណ្តោយផ្លូវជាតិលេខ ៣ នៅឃុំ អន្លង់រមៀត ស្រុកកណ្តាលស្ទឹង ខេត្តកណ្តាល ដោយចំណាយពេលធ្វើដំណើរត្រឹមតែ ១៥នាទី ប៉ុណ្ណោះ ពីអាកាសយានដ្ឋានអន្តរជាតិភ្នំពេញ ហើយត្រូវបានសាងសង់ឡើងនៅលើផ្ទៃដីទំហំ ១៨ ហិកតា ដោយមួយយូនីតអាចមានទំហំរហូតដល់ទៅ ១០០.០០០ ម៉ែតការ៉េ សម្រាប់ការជួល ឬទិញ។
ការអភិវឌ្ឍន៍ចម្រុះនេះ ត្រូវបានបែងចែកជាអចលនទ្រព្យចំនួនបីប្រភេទផ្សេងគ្នាគឺ រោងចក្រ អគារពាណិជ្ជកម្ម និងលំនៅដ្ឋាន ដែលធ្វើឲ្យប្រសើរឡើងដោយលក្ខណៈបៃតងសម្រាប់ការរស់នៅ និងបរិស្ថានការងារប្រកបដោយនិរន្តរភាព។
នៅក្នុងបណ្តុំលំនៅឋាន ឧទ្យាននេះមានអាផាតមិនផ្តល់សេវាចំនួន ៦៤ ហាងពាណិជ្ជកម្មចំនួន ១១ ដោយការសាងសង់គ្រោងនឹងបញ្ចប់នៅពាក់កណ្តាលឆ្នាំ ២០១៧។ យូនីតទាំងនេះមានការកាន់កាប់ដោយសេរី ដោយគ្មានការដាក់កម្រិតសម្រាប់អ្នកទិញជាជនបរទេស ដែលតម្លៃចាប់ផ្តើមពី ៤៨.៥០០ដុល្លារ។
ការអភិវឌ្ឍនេះក៏នឹងផ្តល់ជូននូវបទពិសោធន៍លក់រាយថ្មីៗដូចជា “Eco Park Mall” ដែលជាការរួមបញ្ចូលគ្នារវាងផ្ទះពាណិជ្ជកម្ម និងផ្ទះលក់រាយ ផ្សារទំនើប ព្រមទាំងហាងម្ហូបអាហារ និងភេសជ្ជៈ នៅក្នុងតំបន់ពាណិជ្ជកម្ម និងលំនៅដ្ឋានដែលមានការប្រើប្រាស់ចម្រុះ។
គម្រោងអភិវឌ្ឍនេះក៏នឹងផ្ដល់ជូនអ្នកស្នាក់នៅនូវទីតាំងពាណិជ្ជកម្មជាច្រើន ដូចជា ធនាគារ ហាងទំនិញ ភោជនីយដ្ឋាន បារ ឱសថស្ថាន និងកន្លែងមើលថែទាំកុមារ។
ចំពោះតំបន់ឧស្សាហកម្មវិញ មានរោងចក្រចំនួន ១១ ហើយបានប្តេជ្ញាចិត្តក្នុងការផ្តល់នូវថាមពលប្រកបដោយប្រសិទ្ធិភាពសម្រាប់និយោជក ដើម្បីកាត់បន្ថយការចំណាយប្រតិបត្ដិការ ដោយបង្កើតជាបរិស្ថានការងារប្រកបដោយផាសុកភាពសម្រាប់កម្មករ ព្រមទាំងសុវត្ថិភាព និងសន្តិសុខ។
អ្នកស្នាក់នៅ និងអ្នកជំនួញ នឹងទទួលបានអត្ថប្រយោជន៍ពីការចំណាយតិចលើការប្រើប្រាស់ ដោយសារតែការរចនាប្រកបដោយថាមពល និងប្រសិទ្ធភាពរបស់អ្នកអភិវឌ្ឍ ដែលរួមបញ្ចូលនូវប្រព័ន្ធថាមពលពន្លឺព្រះអាទិត្យដែលដើរដោយកំដៅទឹក ការគ្រប់គ្រងភ្លើងបំភ្លឺកម្រិតខ្ពស់ ប្រព័ន្ធច្រកចូលដោយប្រើ keycard និងប្រព័ន្ធប្រព្រឹត្តិកម្មទឹកស្អាតស្តង់ដារសិង្ហបុរី។ ជាមួយគ្នានេះដែរ ៣០ ភាគរយនៃដីនេះ ត្រូវបានបម្រុងទុកសម្រាប់ទេសភាពបៃតង និងសួនកុមារ។
ក្រុមហ៊ុន C.I.A.C. Investment Limited ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Ocean Sky Investment Pte. Ltd បានវិនិយោគទឹកប្រាក់ ៥០ លានដុល្លារអាមេរិក នៅក្នុង Eco Park ហើយក្រុមហ៊ុនអភិវឌ្ឍនេះមានបទពិសោធន៍ជាង ២០ ឆ្នាំក្នុងវិស័យអចលនទ្រព្យ និងការអភិវឌ្ឍឧស្សាហកម្មនៅកម្ពុជា។ ការសាងសង់បានចាប់ផ្តើមនៅឆ្នាំ ២០១៣ ហើយនិងបញ្ចប់នៅឆ្នាំ ២០១៨។
ថ្លែងនៅក្នុងពិធីសម្ពោធគម្រោងនៅថ្ងៃទី ៦ ខែ មិថុនា លោក Kelvin Chau នាយកផ្នែកលក់ និងទីផ្សារ នៃ Le Urban Eco Park បានមានប្រសាសន៍ថា គម្រោងនេះនឹងនាំមកនូវការរស់នៅ និងបរិស្ថានការងារបៃតង និងការរចនាដោយគិតគូរពីនិរន្តរភាពនៃបរិស្ថានដំបូងគេ។
លោកបន្តថា: “… យើងចង់លើកកម្ពស់ និងផ្តួចផ្តើមគំនិតថ្មីដែលមានតែមួយគត់ជាមួយនឹងការអភិរក្សថាមពលនិងនិរន្តភាពយូរអង្វែង ជាអាទិភាពរបស់យើង»។ «យើងចង់ឱ្យបុគ្គលិកធ្វើការនៅក្នុងតំបន់ដែលមានផាសុកភាព ដែលមានន័យថា មានបរិស្ថានស្អាត បៃតង និងមានសុខភាពល្អ។ យើងជឿថាបរិយាកាសការងារល្អនាំឲ្យមានផលិតភាពល្អប្រសើរជាងមុន”។
លោក Chau បានឲ្យដឹងថា ការសម្រេចចិត្តជ្រើសរើសយកដីសម្រាប់ការអភិវឌ្ឍនេះបានផ្តល់នូវអត្ថប្រយោជន៍យ៉ាងច្រើនសំរាប់ប្រជាជន និងអ្នកវិនិយោគ។ ការដែលគម្រោងនេះមានទីតាំងស្ថិតនៅឆ្ងាយពីរាជធានីភ្នំពេញ នឹងជួយសម្រួលដល់ចរាចរណ៍ រួមជាមួយនឹងបរិយាកាសល្អ និងដីមានតម្លៃថោកបើប្រៀបធៀបទៅនឹងដីក្នុងទីក្រុង។
ជាមួយនឹងការរចនាបែបបៃតងរបស់គម្រោងនេះ តំបន់ឧស្សាហកម្មរបស់ Eco Park បានទទួលវិញ្ញាបនប័ត្រ Green Mark Gold Certification ពីអាជ្ញាធរអគារ និងសំណង់ (BCA) ដែលប្រតិបត្តិការក្រោមក្រសួងអភិវឌ្ឍន៍ជាតិរបស់ប្រទេសសិង្ហបុរី។
លោក Alvin Chua ប្រធានផ្នែកអភិវឌ្ឍន៍ធុរកិច្ចរបស់ក្រុមហ៊ុននេះ សង្ឃឹមថា តំបន់នេះនឹងក្លាយទៅជាទីក្រុងរណបថ្មីមួយ ហើយថា អ្នកអភិវឌ្ឍន៍ក៏មានគម្រោងស្រដៀងគ្នានៅក្នុងផ្នែកផ្សេងទៀតនៃប្រទេសកម្ពុជាផងដែរ។
មានការរំពឹងទុកថា គម្រោងនេះនឹងផ្តល់ផលជាវិជ្ជមានលើតម្លៃអចលនទ្រព្យដែលនៅជុំវិញនោះ ព្រមទាំងបង្កើតការងាររាប់ពាន់ផងដែរ។