ចិននឹងសាងសង់តំបន់សេដ្ឋកិច្ចពិសេសបៃតងតម្លៃមួយពាន់លានដុល្លារនៅស្វាយរៀង

• 16 ខែ​វិច្ឆិកា 2020
• Uncategorized
• 7 មើល

ក្រុមហ៊ុនចិនគ្រោងនឹងសាងសង់តំបន់សេដ្ឋកិច្ចពិសេសបៃតងទំហំ ៤៥០ហិកតា តម្លៃជាង ១ពាន់លានដុល្លារ នៅក្រុងស្វាយរៀង។ នេះបើយោងតាមសារព័ត៌មាន The Star កាលពីពេលថ្មីៗនេះ។

គម្រោងដ៏ធំសម្បើមនេះ មានទីតាំងស្ថិតនៅប្រមាណ ៤ គីឡូម៉ែត្រពីក្រុងស្វាយរៀង ខាងត្បូងផ្លូវជាតិលេខ១ និងស្ថិតនៅភាគខាងជើងទន្លេវ៉ៃគោ។

កិច្ចព្រមព្រៀងជាដៃគូយុទ្ធសាស្ត្រក្នុងការអភិវឌ្ឍគម្រោងនេះ ត្រូវបានចុះហត្ថលេខាកាលពីថ្ងៃទី ១៣ វិច្ឆិកានេះ រវាងក្រុមហ៊ុនអ្នកអភិវឌ្ឍន៍តំបន់សេដ្ឋកិច្ចពិសេស Qilu និង សមាគមឧស្សាហកម្មការពារបរិស្ថាននៅកម្ពុជា (Epiac)។

កិច្ចព្រមព្រៀងនេះធ្វើឡើង ក្នុងគោលបំណងជួយតម្រង់ទិសឱ្យក្រុមហ៊ុន QiLu ក្នុងការបង្កើតតំបន់សេដ្ឋកិច្ចពិសេសនេះ ក៏ដូចជាស្វាគមន៍វិនិយោគិនបរទេសឱ្យមកវិនិយោគផងដែរ។

ថ្លែងនៅក្នុងពិធីចុះហត្ថលេខានេះ ប្រធានក្រុមហ៊ុន QiLu លោក Xing Baoguo បានមានប្រសាសន៍ថា៖ «តំបន់នេះនឹងត្រូវសាងសង់ជា ៣ដំណាក់កាល។ ដំណាក់កាលទី១ នឹងសាងសង់លើផ្ទៃដី ២១៥ហិកតា ដំណាក់កាលទី២ លើដី ១៤៥ហិកតា និងដំណាក់កាលទី៣ លើដី ៩០ហិកតា។

គម្រោងឧស្សាហកម្មនេះ នឹងត្រូវចែកជា ៦ ផ្នែក រួមមានរោងចក្រសម្លៀកបំពាក់ វាយនភ័ណ្ឌ ផលិតផលឧស្សាហកម្មធុនស្រាល គ្រឿងម៉ាស៊ីន សម្ភារសំណង់ និងសារធាតុគីមីផងដែរ។

គួរបញ្ជាក់ផងដែរ បើយោងតាមប្រភពដដែល គិតត្រឹមដំណាច់ឆ្នាំ២០១៩ មានក្រុមហ៊ុនចំនួន ៤៦៥ កំពុងប្រតិបត្តិការនៅក្នុងតំបន់សេដ្ឋកិច្ចពិសេស ៥៤ នៅកម្ពុជាដែលមានកម្មករជាង ១០០ ០០០ នាក់។

• ការវិនិយោគ និងមូលធន
• ធុរកិច្ច និងទីផ្សារ
• កិច្ចសហប្រតិបត្តិការ និងឱកាស
• Investment and Funding
• Cooperation and networking
• Business and Market
• Economy and Finance
• ការវិនិយោគ និងមូលធន
• ធុរកិច្ច និងទីផ្សារ