កាលបរិច្ឆេទបើក 7-Eleven នៅភ្នំពេញ ពន្យារពេលទៅចុងឆ្នាំ

• 23 ខែ​សីហា 2021
• Uncategorized
• 13 មើល

កាលបរិច្ឆេទបើក 7-Eleven ដំបូងបង្អស់នៅកម្ពុជាត្រូវបានពន្យារពេលទៅចុងឆ្នាំនេះ ដោយសារការកើនឡើងនៃការឆ្លងក្នុងសហគមន៍។ នេះបើយោងតាមការឱ្យដឹងពីលោក Kriengchai Boonpoapichart ប្រធានផ្នែកហិរញ្ញវត្ថុរបស់ក្រុមហ៊ុន CP All ប្រទេសថៃ ។

ក្រុមហ៊ុន CP All (Cambodia) Plc ដែលជាក្រុមហ៊ុនគ្រប់គ្រងផ្សារនេះ ធ្លាប់បានបញ្ជាក់ថា សាខាដំបូងនៅកម្ពុជា នឹងបើកជាផ្លូវការនៅក្នុងអំឡុងខែមិថុនា ឬ កក្កដា ឆ្នាំ២០២១ នៅត្រង់ទីតាំងស្ថានីយប្រេង PTT ព្រែកព្នៅ។ ប៉ុន្តែជាក់ស្ដែង មិនទាន់ឃើញមានហាងណាមួយបើកទ្វារនៅទីតាំងត្រង់នោះទេ។ (អានបន្ថែម)

ទាក់ទិននឹងរឿងនេះ លោក Kriengchai Boonpoapichart បានប្រាប់គេហទំព័រព័ត៌មានក្នុងស្រុករបស់ប្រទេសថៃ efinancethai.com កាលពីសប្តាហ៍មុនថា ផែនការបើកហាងនៅកម្ពុជានៅតែបន្តដដែល គ្រាន់តែយឺតយ៉ាងបន្តិច តែនឹងបើកមុនសាខានៅប្រទេសឡាវ ។

លោកបានបន្ថែមថា៖ «ដោយសារប្រទេសជិតខាង [កម្ពុជានិងឡាវ] កំពុងតែមានវិបត្តិកូវីដ១៩ ដូច្នេះ ក្រុមហ៊ុននៅតែបន្តធ្វើការងាររៀបចំសិន ដោយរំពឹងថាអាចនឹងបើកនៅចុងឆ្នាំនេះ»។

គួរបញ្ជាក់ថា អាជីវកម្ម 7-Eleven នៅប្រទេសថៃ ក៏រងផលប៉ះពាល់ពីកូវីដ -១៩ ដែរ ប៉ុន្តែក្រុមហ៊ុនប្ដេជានឹងធ្វើយ៉ាងណាឱ្យប្រសើរឡើងនៅកន្លះឆ្នាំចុងក្រោយនេះ ដោយមិនមានផែនការកាត់បន្ថយបុគ្គលិកឡើយ។

នៅឆមាសទី១ នៃឆ្នាំ ២០២១ CPAll បានបើកសាខាថ្មី ៣១១ នៅប្រទេសថៃ ជាមួយនឹងគ្រោងពង្រីកបន្ថែមជាច្រើនទៀតទៅអនាគត។

• ការវិនិយោគ និងមូលធន
• ធុរកិច្ច និងទីផ្សារ
• Investment and Funding
• Business and Market
• ការវិនិយោគ និងមូលធន
• ធុរកិច្ច និងទីផ្សារ