English 
ខ្មែរ 
រដ្ឋគ្រោងជ្រើសរើសទីតាំងមួយក្នុងក្រុងព្រះសីហនុដើម្បីរៀបចំជាវិថីម្ហូបអាហារមានស្ដង់ដារ (Street Food)
រដ្ឋបាលខេត្តព្រះសីហនុ កំពុងសិក្សាជ្រើសរើសទីតាំងបរិវេណសួនមហោស្រពចាស់ ក្នុងសង្កាត់លេខ២ ក្រុងព្រះសីហនុ ដើម្បីរៀបចំជាវិថីម្ហូបអាហារ Street Food ថ្មីមួយកន្លែង ក្នុងគោលបំណងដើម្បីលើកសោភណភាពក្រុង និងជម្រុញវិស័យទេសចរណ៍។
ថ្លែងក្នុងកិច្ចប្រជុំកាលពីថ្ងៃទី២០ ខែមករា ឆ្នាំ២០២១ អភិបាលខេត្តព្រះសីហនុ ឯកឧត្តម គួច ចំរើន យល់ឃើញថា៖ «ការរៀបចំសេវាកម្មស្តង់ដារ Street Food នេះ នឹងអាចទាក់ទាញភ្ញៀវទេសចរជាច្រើន ហើយក៏ជាកន្លែងទទួលទានអាហារដែលមានសុវត្ថិភាពមួយ នៅក្រុងព្រះសីហនុផងដែរ» ។
ឯកឧត្តមបានបន្ថែមថា៖ «អ្នកដែលត្រូវបានអនុញ្ញាតឱ្យលក់ដូរ តម្រូវឱ្យអនុវត្តតាមស្តង់ដារសេវាកម្មវិថីលក់ម្ហូបអាហារ ដែលកំណត់ច្បាស់លាស់ ដើម្បីធានាគុណភាព សុវត្ថិភាព និងតម្លៃសមរម្យអាចទទួលយកបាន»។
គួររំលឹកផងដែរថា កាលពីថ្មីៗ រដ្ឋាភិបាលសម្រេចចំណាយទុនប្រមាណ ១០០លានដុល្លារ បន្ថែមទៀតសាងសង់ផ្លូវ ១១ខ្សែ នៅខេត្តព្រះសីហនុ ដែលនេះជាសមិទ្ធិផលបន្ថែមពីលើគម្រោងផ្លូវ ៣៤ ខ្សែ ដែលទើបតែសាងសង់រួច។ (អានបន្ថែម)
លើសពីនេះ ខេត្តព្រះសីហនុ ក៏កំពុងមានគម្រោងធំជាច្រើនទៀត ដូចជាផ្លូវល្បឿនលឿន កំពង់ផែ ព្រលានយន្តហោះអន្តរជាតិ អាងប្រព្រឹត្តកម្មទឹកកខ្វក់ និងទីលានចាក់សម្រាមជាដើម ដែលនឹងបង្ហាញខ្លួនជាបន្តបន្ទាប់។ (អានបន្ថែម)