គិតត្រឹមត្រីមាសទី២ ឆ្នាំ២០២៥ រដ្ឋ​ចុះកិច្ចព្រមព្រៀងឥណទានសម្បទានថ្មី សរុប ១៩៦លានដុល្លារ

• 8 ខែ​កញ្ញា 2025
• Uncategorized
• 10 មើល

គិតត្រឹមត្រីមាសទី២ ឆ្នាំ២០២៥ រាជរដ្ឋាភិបាល បានចុះកិច្ចព្រមព្រៀងឥណទានសម្បទានថ្មី ជាមួយដៃគូអភិវឌ្ឍ នានាសរុបចំនួន ១៩៦​លានដុល្លារ។​

នេះយោងតាមរបាយការណ៍ពីក្រសួងសេដ្ឋកិច្ច និងហិរញ្ញវត្ថុ កិច្ចព្រមព្រៀងឥណទានថ្មី ជាមួយ ដៃគូអភិវឌ្ឍនានា សមមូលនឹង ១៤២,៣១ លានអេសដេអ៊ែ ស្មើនឹងប្រមាណ ៧% នៃពិតានដែលច្បាប់អនុញ្ញាត (២.០០០ លានអេសាងអ៊ែ)។កិច្ចព្រមព្រៀងឥណទានថ្មី ត្រូវបានធ្វើឡើងក្រោម ក្របខ័ណ្ឌពហុភាគី ១០០%។

បើធៀបនឹងរយៈពេល ដូចគ្នាកាលពីឆ្នាំមុន ការចុះកិច្ចព្រមព្រៀងឥណទានសម្បទានថ្មីនៅក្នុងឆមាសទី១ ឆ្នាំ២០២៥ នេះមានការថយចុះ ប្រមាណ ៣៧%។

បើតាមក្រសួងសេដ្ឋកិច្ច និងហិរញ្ញវត្ថុ ​​​ ឥណទានទាំងនេះ សុទ្ធសឹងជាឥណទានមានកម្រិតសម្បទានខ្ពស់ ដោយមានធាតុអំណោយផលជាមធ្យមប្រមាណ ៣៦%។

ក្រសួងសេដ្ឋកិច្ច និងហិរញ្ញវត្ថុ បានលើកឡើងថា៖ “គោលដៅនៃការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទាន ក្នុងវិស័យអាទិភាពរបស់រាជរដ្ឋាភិបាល សំដៅរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម”។​

បើតាមរបាយការណ៍ដដែល គិតត្រឹមត្រីមាសទី២ កម្ពុជាមានសន្និធិបំណុលសាធារណៈសរុបចំនួន ១២,៦៧ប៊ីលានដុល្លារអាមេរិក។​

នៅពេលដែលប្រទេសកម្ពុជាស្វែងរកបញ្ហាប្រឈមផ្នែកហិរញ្ញវត្ថុទាំងនេះ រដ្ឋាភិបាលនៅតែផ្តោតលើការបង្កើនភាពជាដៃគូអន្តរជាតិ ដើម្បីជំរុញវឌ្ឍនភាពសេដ្ឋកិច្ច និងដោះស្រាយតម្រូវការអភិវឌ្ឍន៍សំខាន់ៗ។

• Investment and Funding