ជប៉ុនជួយកម្ពុជាតាមរយៈកម្ចីជិត $៣០០លាន ដើម្បីពង្រីកប្រព័ន្ធទឹកស្អាត និងចែកចាយអគ្គិសនី

• 13 ខែ​តុលា 2025
• ព័ត៌មានក្នុងស្រុក
• 5 មើល

រាជរដ្ឋាភិបាលជប៉ុន បានសម្រេចផ្តល់កម្ចីសម្បទានជិត ៣០០លានដុល្លារ ដល់កម្ពុជា សម្រាប់អនុវត្តគម្រោងចំនួន ២ ពាក់ព័ន្ធនឹងគម្រោងពង្រីកប្រព័ន្ធទឹកស្អាត និងចែកចាយអគ្គិសនីនៅក្នុងរាជធានីភ្នំពេញ។

ពិធីចុះហត្ថលេខាលើលិខិតប្តូរសារ និងឯកសារពាក់ព័ន្ធ ស្តីពីការផ្តល់ឥណទានសម្បទានប្រាក់យ៉េនរបស់រដ្ឋាភិបាលជប៉ុន ក្រោមជំនួយអភិវឌ្ឍន៍ផ្លូវការ សម្រាប់គម្រោងចំនួន២ បានធ្វើឡើងដោយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និង លោក UENO Atsushi ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំកម្ពុជា នៅថ្ងៃទី៨ តុលា ឆ្នាំ២០២៥។

យោងតាមសេចក្ដីប្រកាសក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា ជំនួយអភិវឌ្ឍន៍ផ្លូវការ សម្រាប់គម្រោងចំនួន២ ដូចជា៖ទី១. សម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ ទឹកប្រាក់ចំនួន ២១.៥២៦.០០០.០០០ យ៉េន (ប្រមាណ ១៤៣.៥ លានដុល្លារ អាម៉េរិក) និងទី២. សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីក្នុង រាជធានីភ្នំពេញ (ដំណាក់កាលទី៣) ទឹកប្រាក់ចំនួន ២២.៩១១.០០០.០០០ យ៉េន (ប្រមាណ ១៥២.៧ លានដុល្លារ អាម៉េរិក)។

ក្រសួង បានបញ្ជាក់បន្ថែមថា ការបន្តផ្តល់ជំនួយហិរញ្ញវត្ថុនេះ បញ្ជាក់ពីការប្តេជ្ញាចិត្តយ៉ាងមុតមាំរបស់ជប៉ុន ក្នុងការជំរុញការអភិវឌ្ឍសង្គម-សេដ្ឋកិច្ចរបស់កម្ពុជា និងពង្រឹងបន្ថែមទៀតនូវភាពជាដៃគូយុទ្ធសាស្ត្រ គ្រប់ជ្រុងជ្រោយរវាងប្រទេសទាំងពីរ។

នៅពេលដែលប្រទេសកម្ពុជាបន្តរីកចម្រើន ការគាំទ្រផ្នែកហិរញ្ញវត្ថុពីប្រទេសជប៉ុននេះនឹងជួយធានាថា សេវាកម្មសំខាន់ៗដូចជាទឹក និងអគ្គិសនីអាចបំពេញតម្រូវការរបស់ប្រជាជននៅទីក្រុងរបស់ខ្លួន ដែលជាជំហានដ៏សំខាន់មួយឆ្ពោះទៅរកការអភិវឌ្ឍន៍ប្រកបដោយចីរភាពនៅក្នុងតំបន់៕

• infrastructure development