ADB៖ ការវិនិយោគផ្ទាល់ពីបរទេសមកកម្ពុជាកើន ៦,១% នៅដើមឆ្នាំ២០២៥ ចំពេលការទម្លាក់ការព្យាករណ៍សេដ្ឋកិច្ចមកត្រឹម៤,៩%!

• 9 ខែ​តុលា 2025
• Uncategorized
• 15 មើល

ធនាគារអភិវឌ្ឍន៍អាស៊ី (ADB) បានឱ្យដឹងថា ប្រទេសកម្ពុជាបានទាក់ទាញការវិនិយោគផ្ទាល់ពីបរទេសចំនួន ១ពាន់លានដុល្លារ ក្នុងកំឡុងត្រីមាសទី១ ឆ្នាំ២០២៥ ពោលគឺកើនឡើង ៦,១% ពីមួយឆ្នាំទៅមួយឆ្នាំ។

តាមរយៈរបាយការណ៍ចុងក្រោយរបស់ ADB ក៏បានលើកឡើងពីភាពប្រសើរឡើងនូវទុនបម្រុងអន្តរជាតិសរុប (GIR) ដែលបានកើនឡើងដល់ ២៤,៨ពាន់លានដុល្លារ គិតត្រឹមពាក់កណ្តាលឆ្នាំ២០២៥ ធៀបនឹងឆ្នាំ២០២៤ ដែលមានត្រឹមតែ ២២,៥ពាន់លានដុល្លារ។ ADB បានបន្តថា ទុនបម្រុងទាំងនេះ គ្រប់គ្រាន់សម្រាប់គ្របដណ្តប់លើការនាំចូលបានរយៈពេលប្រមាណ ៧-៨ខែ ផងដែរ។

ទោះបីជាមានសន្ទុះវិជ្ជមានក្នុងការវិនិយោគ និងទុនបំរុងក៏ដោយ ADB បានព្រមានថា ទស្សនវិស័យរបស់កម្ពុជាក៏នឹងប្រឈមនឹងហានិភ័យច្រើន ក្នុងនោះរួមមាន៖ កំណើនសេដ្ឋកិច្ចពិភពលោកនៅមានការយឺតយ៉ាវ ភាពតានតឹងតាមព្រំដែនជាមួយប្រទេសថៃនៅបន្តអូសបន្លាយ គោលនយោបាយពាណិជ្ជកម្មមិនច្បាស់លាស់ និងការកើនឡើងកម្រិតបំណុលឯកជន។

គួររំលឹកទៀតថា ក្នុងរបាយការណ៍ដដែលនេះ ADB ក៏បានបញ្ជាក់ពីការកែសម្រួលការព្យាករណ៍កំណើនសេដ្ឋកិច្ចរបស់កម្ពុជាដែលធ្លាក់ចុះពី ៦,១% ទៅ ៤,៩% សម្រាប់ឆ្នាំ២០២៥ និងពី ៦,២% ទៅ ៥% សម្រាប់ឆ្នាំ២០២៦ ដោយលើកឡើងពីតម្រូវការខាងក្រៅដែលនៅទន់ខ្សោយ និងមានភាពមិនប្រាកដប្រជាជាសកល។ (អានបន្ថែម)

• Investment and Funding
• Economic and finance