ព័ត៌មានក្នុងស្រុក
សមាគមអ្នកសាងសង់កម្ពុជានឹងរៀបចំកម្មវិធីសំណេះសំណាលធុរកិច្ចនៅខែធ្នូខាងមុខនេះ
សមាគមអ្នកសាងសង់កម្ពុជា ឬ CCA នឹងរៀបចំកម្មវិធីសំណេះសំណាលធុរកិច្ចនៅថ្ងៃទី ១៨ ខែធ្នូខាងមុខនេះ ក្នុងគោលបំណងជួយជំរុញសកម្មភាពអាជីវកម្មនៅក្នុងវិស័យសំណង់ បន្ទាប់ពីធ្លាក់ចុះមួយរយៈ ដោយសារការរីករាតត្បាតនៃជំងឺកូវីដ១៩។ ព្រឹត្តិការណ៍នេះនឹងត្រូវរៀបចំឡើងនៅឯសណ្ឋាគារ Dara Airport ដែលនឹងចូលរួមដោយសមាជិក CCA ក្រុមហ៊ុនសំណង់នានា និងក្រុមហ៊ុនសំខាន់ៗពាក់ព័ន្ធដទៃនៅក្នុងវិស័យនេះ។ អ្នកចូលរួមទាំងអស់នឹងធ្វើការចែករំលែកគំនិត បញ្ហាប្រឈម និងជាពិសេសដំណោះស្រាយដើម្បីប្រយុទ្ធប្រឆាំងនឹងវិបត្ដិកូវីដ។ លោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋានរបស់សមាគម បានមានប្រសាសន៍ថា៖ «ព្រឹត្តិការណ៍នេះគឺជាឱកាសដ៏ល្អមួយសម្រាប់ឱ្យអាជីវកម្មអាចភ្ជាប់ទំនាក់ទំនងឡើងវិញ ក្រោយមិនបានជួបគ្នាជិតកន្លះឆ្នាំ»។ “សូមថ្លែងអំណរគុណដល់រដ្ឋាភិបាលដែលបានធ្វើការងារយ៉ាងម្មត់ចត់ក្នុងការគ្រប់គ្រងស្ថានការណ៍ ដែលឥឡូវនេះគឺយើងអាចរៀបចំកម្មវិធីតូចៗដូច្នេះបានហើយ។ កម្មវិធីនេះមិនត្រឹមតែជួយសមាជិកទាំងអស់បង្កើនការលក់ និងពង្រីកបណ្តាញអាជីវកម្មរបស់ពួកគេនោះទេ តែក៏នឹងជួយជម្រុញសេដ្ឋកិច្ចផងដែរ ជាពិសេសក្នុងវិស័យសំណង់» លោកបានបន្ត។ គួរបញ្ជាក់ផងដែរថា សមាគមអ្នកសាងសង់កម្ពុជាជាសមាគមសំណង់ដំបូង និងធំជាងគេបំផុតនៅក្នុងប្រទេសកម្ពុជាដែលមានសមាជិកក្រុមហ៊ុនដែលទាក់ទងនឹងវិស័យសំណង់ជិត២០០ ក្រុមហ៊ុន ។ ជារៀងរាល់ឆ្នាំសមាគមក៏បានរៀបចំពិព័រណ៍សំណង់ធំជាងគេនៅកម្ពុជា ដែលដាក់បង្ហាញផលិតផលទាក់ទងនឹងវិស័យនេះរាប់ពាន់ផលិតផល។ ប៉ុន្តែសម្រាប់ឆ្នាំ ២០២០ នេះ ព្រឹត្តិការណ៍នេះគឺត្រូវបានពន្យារពេលទៅឆ្នាំ ២០២១ ដោយសារវិបត្តិកូវីដ។(អានបន្ថែម) សម្រាប់អ្នកដែលមានចំណាប់អារម្មណ៍ចង់ចូលរួមក្នុងព្រឹត្តិការណ៍នេះសូមទាក់ទងCCA ទូរស័ព្ទ៖ +៨៥៥ ៩៦ ៥៨១ ១៨៦១ អ៊ីមែល៖ ccaforeignaffairs@gmail.com
អានបន្ថែម
ពិព័រណ៍សំណង់ធំបំផុតនៅកម្ពុជាប្រចាំឆ្នាំ ២០២០ ត្រូវបានផ្អាក ដោយពន្យារទៅឆ្នាំ២០២១ វិញ
សមាគមអ្នកសាងសង់កម្ពុជា សម្រេចផ្អាករៀបចំពិព័រណ៍សំណង់ធំបំផុតនៅកម្ពុជាសម្រាប់ឆ្នាំ ២០២០ ដោយកម្មវិធីនេះនឹងលើkទៅធ្វើនៅឆ្នាំ ២០២១ វិញ ក្នុងពេលវេលាសមស្របណាមួយក្រោយកូវីដធូរស្បើយ។ នេះបើយោងតាមសេចក្ដីប្រកាសរបស់ សមាគមអ្នកសាងសង់កម្ពុជាកាលពីថ្មីៗនេះ។ លិខិតដដែល មិនទាន់បញ្ជាក់នៅឡើយទេ ពីកាលបរិច្ឆេទច្បាស់លាស់ ដោយត្រូវរងចាំមើលស្ថានភាពជាក់ស្ដែងនៃជំងឺកូវីដ។ ពិព័រណ៍ឧស្សាហកម្មសំណង់កម្ពុជាគឺជាព្រឹត្តិការណ៍ដែលត្រូវបានធ្វើឡើងរវាងខែវិច្ឆិកា ឬខែធ្នូជារៀងរាល់ឆ្នាំ ដែលនឹងបង្ហាញផលិតផលរាប់ពាន់ពីស្តង់រាប់រយរបស់ក្រុមហ៊ុនក្នុងស្រុក និងអន្តរជាតិ។ ធ្វើឡើងរយៈពេលបីថ្ងៃ ការតាំងពិព័រណ៍នេះ ផ្តល់នូវវេទិកាមួយសម្រាប់ពាណិជ្ជករដើម្បីជួបគ្នា និងស្វែងយល់ពីផលិតផលចុងក្រោយបំផុតដែលមាននៅក្នុងទីផ្សារសំណង់។ លោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋានរបស់សមាគម បានកោតសរសើរពីវិធានការណ៍របស់រដ្ឋាភិបាលក្នុងការទប់ទល់ស្ថានការណ៍ជំងឺកូវិដ១៩ ហើយលោករំពឹងថា ព្រឹត្តិការណ៍នេះនឹងអាចរៀបចំនៅដើមឆ្នាំ ២០២១ ដោយសារសមាគម ត្រូវធានាថាការតាំងពិព័រណ៍នេះត្រូវបានធ្វើឡើងស្របតាមស្តង់ដារដែលបានកំណត់។ លោកថ្លែងថា៖ «យើងអាចពន្យាពេលកាលបរិច្ឆេទនៃការតាំងពិព័រណ៍ពីមួយខែទៅបីខែពីព្រោះយើងត្រូវការពេលវេលាគ្រប់គ្រាន់ដើម្បីរៀបចំព្រឹត្តិការណ៍នេះ។ យើងត្រូវការពេលវេលាទោះបីជារដ្ឋាភិបាលអនុញ្ញាតឲ្យយើងឆាប់ៗក៏យើងត្រូវការពេលវេលាដើម្បីត្រៀមខ្លួនដែរ ដើម្បីស្របតាមស្តង់ដារដែលបានកំណត់»។ លោកបន្តថា ពិព័រណ៍នេះគឺជាផ្នែកមួយនៃកិច្ចខិតខំប្រឹងប្រែងរបស់សមាគមអ្នកសាងសង់កម្ពុជាដើម្បីលើកកម្ពស់ឧស្សាហកម្មសំណង់នៅកម្ពុជា ហើយវានឹងក្លាចជាវេទិកាដើម្បីបង្ហាញពីសក្តានុពលនៃឧស្សាហកម្មសំណង់របស់ប្រទេសដូចជា ចំនួនគម្រោងសំណង់ សម្ភារៈ និងឧបករណ៍ដែលត្រូវការដើម្បីគាំទ្រគម្រោងទាំងនោះ។ លោកបានបន្ថែមថា ការតាំងពិព័រណ៍នេះនឹងរួមចំណែកជាមួយការខិតខំរបស់រដ្ឋាភិបាលក្នុងការស្តារសេដ្ឋកិច្ចឡើងវិញនៅពេលដែលជំងឺកូវិដ១៩មានភាពធូរស្រាល ឬពិភពលោកបង្កើតវ៉ាក់សាំងបានសម្រេច។
អានបន្ថែម
គ្រុបតេឡេក្រាមថ្មីនឹងជួយផ្សព្វផ្សាយកិច្ចការងាររបស់សមាជិកសមាគមអ្នកសាងសង់
សមាគមអ្នកសាងសង់កម្ពុជា ឬ CCA បានបង្កើតគ្រុបតេឡេក្រាមថ្មីមួយ ក្នុងគោលបំណង ជួយផ្សព្វផ្សាយកិច្ចការងារ និងអាជីវកម្មរបស់សមាជិក ជាពិសេសក្នុងអំឡុងពេលកូវីដ។ លោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋាន សមាគមអ្នកសាងសង់កម្ពុជា បានមានប្រសាសន៍ថា ក្នុងអំឡុងពេលនៃការរាតត្បាតនៃជំងឺកូវីដ១៩ នេះ សមាគមកំពុង ព្យាយាមធ្វើយ៉ាងណាដើម្បីជួយសមាជិករបស់ខ្លួនតាមរយៈការបង្កើតគ្រុបតេឡេក្រាមនេះ។ លោក ជីវ ស៊ីវផេង បានឱ្យដឹងថា៖ «គ្រុបនេះអនុញ្ញាតឲ្យសមាជិកនីមួយៗអាចផ្ញើព័ត៌មានអំពីក្រុមហ៊ុនខ្លួន ឬព័ត៌មានអំពីផលិតផលនានា។ ក្រោយពីប្រមូលព័ត៌មានក្រោមទម្រង់ជា វីដេអូ អត្ថបទ ខិតបណ្ណផ្សព្វផ្សាយនានា សមាគមនឹងធ្វើការពិនិត្យព័ត៌មានទាំងនោះ រួចនឹងចែកចាយបន្ត»។ លោក បន្តថា៖ «សមាគមនឹងផ្សព្វផ្សាយព័ត៌មានទំាងនោះនៅលើបណ្តាញសង្គមដូចជា ទំព័រហ្វេសប៊ុករបស់ សមាគម យូធ្យូប និងតេឡេក្រាមជាដើម ដើម្បីអាចឱ្យព័ត៌មានទាំងនោះ ទៅដល់អតិថិជន កាន់តែច្រើន»។ លោក ស៊ីវផេង បានបន្តថា សមាគមក៏នឹងផ្តល់ព័ត៌មានទាក់ទងនឹងគម្រោងសាងសង់នានាដល់សមាជិករបស់ខ្លួនផងដែរ ដូចនេះ ពួកគាត់អាចទាក់ទងទៅកាន់ម្ចាស់គម្រោងផ្ទាល់ដើម្បីជជែក និងផ្សព្វផ្សាយផលិតផលរបស់ខ្លួន។ គ្រុបនេះ គឺសម្រាប់សមាជិករបស់សមាគមអ្នកសាងសង់កម្ពុជាប៉ុណ្ណោះ។ គួរបញ្ជាក់ផងដែរថា សមាគមមានសមាជិកប្រមាណជា ១៤១ ក្រុមហ៊ុនទំាងក្នុងនិងក្រៅស្រុក ដែលរួមមានក្រុមហ៊ុនសាងសង់ ក្រុមហ៊ុនអភិវឌ្ឍន៍ […]
អានបន្ថែម
សមាគមអ្នកសាងសង់កម្ពុជា ស្នើឱ្យរដ្ឋកាត់បន្ថយនីតិវិធីស្មុគស្មាញក្នុងការសុំសិទ្ធិសាងសង់
សមាគមអ្នកសាងសង់កម្ពុជា និងស្ថាប័នឯកជននានាៗ ក្នុងវិស័យសំណង់ និងអចលនទ្រព្យ បានស្នើសុំឱ្យរដ្ឋាភិបាលជួយកាត់បន្ថយនីតិវិធីស្មុគស្មាញ និងមិនចាំបាច់មួយចំនួនក្នុងការសុំសិទ្ធិសាងសង់ ដើម្បីទាក់ទាញអ្នកវិនិយោគថ្មី ក៏ដូចជាជំរុញបរិយាកាសធុរកិច្ចនៅកម្ពុជាឱ្យកាន់តែប្រសើរឡើង។ សំណើនេះធ្វើឡើងក្នុងកិច្ចប្រជុំរវាង ក្រសួងសេដ្ឋកិច្ច និងហិរញ្ញវត្ថុ ជាមួយនឹងសមាគមអ្នកសាងសង់កម្ពុជា និងក្រុមហ៊ុនអ្នកអភិវឌ្ឍធំៗមួយចំនួន កាលពីព្រឹកថ្ងៃទី ២២ កញ្ញា កន្លងមកនេះ។ កិច្ចប្រជុំនេះធ្វើឡើងក្រោយ ធនាគារពិភពលោក (World Bank) បានចាត់លំដាប់បរិយាកាសធុរកិច្ចនៅកម្ពុជាឆ្នាំ ២០២០ ថានៅលំដាប់ទី ១៤៤ ក្នុងចំណោម១៩០ ប្រទេស ។ ចំណែកឯ ការស្នើសុំសិទ្ធិសាងសង់វិញ កម្ពុជាស្ថិតនៅលំដាប់ទី ១៧៨ ពោលគឺការស្នើសុំគឺមានភាពស្មុគស្មាញខ្លាំងពេក បើប្រៀបធៀបទៅនឹងប្រទេសផ្សេងៗទៀត។ របាយការណ៍នេះ ក៏បានឱ្យដឹងទៀតថា នីតិវិធីស្នើសុំសិទ្ធិសាងសង់នៅកម្ពុជាមានរហូតដល់ទៅ ២០ដំណាក់កាល ដោយនឹងត្រូវចំណាយពេលសរុប ៦៥២ថ្ងៃ (ជិត ២ឆ្នាំ) និងចំណាយថវិកាជាមធ្យមជាង ៨ លានរៀល ដែលនេះគឺរាប់តែចំណាយផ្លូវការតែប៉ុណ្ណោះ។ ជាការឆ្លើយតប តំណាងប្រធានសមាគមអ្នកសាងសង់កម្ពុជា លោក ឆាស៍ វ៉ាន់ បានឱ្យដឹងថា របាយការណ៍របស់ធនាគារពិភពលោក គឺអាចមិនមានតម្លាភាពទាំងស្រុងទេ ដោយសារការប្រមូលទិន្នន័យអាចនឹងមានភាពលម្អៀង។ […]
អានបន្ថែម
ទោះទុនវិនិយោគសំណង់កើនឡើងក្ដី តែគម្រោងជាច្រើនពន្យារការបើកការដ្ឋានដោយសារកូវីដ
ក្រសួងរៀបចំដែនដី នគរូបនីយកម្ម និងសំណង់បានអនុម័តគម្រោងសាងសង់ចំនួនជាង ២៥០០គម្រោងក្នុងរយៈពេល ៦ ខែដំបូងនៃឆ្នាំនេះ ដែលមានតម្លៃវិនិយោគប្រមាណ ៣,៨ ពាន់លានដុល្លារអាមេរិក។ ប៉ុន្តែដោយសារការប៉ះពាល់នៃជំងឺរាតត្បាតកូវីដ១៩ ម្ចាស់គម្រោងដែលទទួលបានលិខិតអនុញ្ញាតសាងសង់ភាគច្រើន ពន្យារការបើកការដ្ឋាន ហើយកំពុងរង់ចាំឱ្យវិបត្តិកូវីដស្ងប់សិន នេះបើតាមលោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋាន សមាគមអ្នកសាងសង់កម្ពុជា។ លោក ជីវ ស៊ីវផេង បានមានប្រសាសន៍ថា៖ «យើងសង្ឃឹមថាក្រុមហ៊ុនដែលទទួលបានលិខិតអនុញ្ញាតឱ្យសាងសង់ អាចចាប់ផ្តើមសាងសង់ នៅពេលដែលជំងឺរាតត្បាតកូវីដអាចគ្រប់គ្រងបាន»។ លោកបន្តថា មានក្រុមហ៊ុនជាច្រើនទាំងក្នុងស្រុក និងអន្តរជាតិបានស្នើសុំលិខិតអនុញ្ញាតសាងសង់នៅទូទាំងប្រទេស ជាពិសេសនៅខេត្តព្រះសីហនុ ដែលជាហេតុធ្វើឱ្យតួលេខចំនួនគម្រោង និងទុនវិនិយោគកើន។ ប៉ុន្តែជាក់ស្ដែង ចំនួនគម្រោងដែលបើកការដ្ឋានគឺថមថយ។ លោកពន្យល់ថា ម្ចាស់គម្រោងមានសិទ្ធិពន្យារការបើកការដ្ឋាន ដោយសារតែបើយោងតាមច្បាប់ ការលិខិតអនុញ្ញាតសាងសង់មានសុពលភាពរយៈពេលមួយឆ្នាំ។ លោក ជីវ ស៊ីវផេង បានមានប្រសាសន៍ទៀតថា៖ «អ្នកអភិវឌ្ឍគឺព្រួយបារម្ភអំពីកូវីដនោះហើយជាមូលហេតុដែលពួកគេមិនមានសកម្មភាពច្រើន ដែលនេះគឺជារឿងគួរឱ្យបារម្ភដែរ។ ប៉ុន្តែប្រហែលជាបន្ទាប់ពីស្ថានការកូវីដប្រសើរឡើងអ្នកអភិវឌ្ឍន៌នឹងចាប់ផ្តើមសាងសង់»។
អានបន្ថែម
សមាគមអ្នកសាងសង់បន្តសហការជាមួយដៃគូអន្តរជាតិ ដើម្បីស្ដារវិស័យសំណង់ពីវិបត្តិកូវីដ
ទោះបីបច្ចុប្បន្នមានការអនុវត្តគម្លាតសង្គមដែលបណ្តាលមកពីវីរ៉ុសកូវីដ១៩យ៉ាងណាក្តី សមាគមអ្នកសាងសង់នៅកម្ពុជា (CCA) ក៏នៅតែបន្តកិច្ចសហប្រតិបត្តិការ ជាមួយសមាគមអន្តរជាតិ និងពិភាក្សាអំពីផលប៉ះពាល់នៃជំងឺរាតត្បាតនេះមកលើឧស្សាហកម្មសំណង់ផងដែរ។ លោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋាន សមាគមអ្នកសាងសង់កម្ពុជា បានមានប្រសាសន៍ថា សមាគមបានចូលរួមប្រជុំតាមអ៊ិនធឺរណែត ជាមួយសហព័ន្ធអ្នកសាងសង់អាស៊ាន ឬ ASEAN Constructors Federation (ACF) និង សហព័ន្ធអន្តរជាតិនៃសមាគមអ្នកសាងសង់អាស៊ី និងប៉ាស៊ីហ្វិកខាងលិច (IFAWPCA)។ IFAWPCA ត្រូវបានបង្កើតឡើងក្នុងឆ្នាំ ១៩៥៦ ដើម្បីលើកកម្ពស់វឌ្ឍនភាពសង្គម និង សេដ្ឋកិច្ចតាមរយៈការអភិវឌ្ឍន៍វិស័យសំណង់ហើយបច្ចុប្បន្នមានសមាជិកចំនួន ១៩ ប្រទេស។ សហព័ន្ធអ្នកសាងសង់អាស៊ាន តំណាងឱ្យក្រុមហ៊ុនឯកជនធ្វើអាជីវកម្មពាក់ព័ន្ធនឹងការសាង សង់នៅទូទាំងតំបន់អាស៊ីអាគ្នេយ៍រួមមាន កម្ពុជា ឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី ថៃ វៀតណាម និងមីយ៉ាន់ម៉ា។ លោកជីវ ស៊ីវផេង បានមានប្រសាសន៍ថា ប្រទេសនីមួយៗ បង្ហាញពីទស្សនៈរបស់ខ្លួនទៅលើ ស្ថានភាពឧស្សាហកម្មសំណង់ និងផលប៉ះពាល់ដែលបង្កឡើងដោយជំងឺរាតត្បាតកូវីដ១៩ ។ លោកបន្តថា សមាគមក៏នឹងពិភាក្សាអំពីការអភិវឌ្ឍនៃវិស័យសំណង់ និងរបៀបដែលរដ្ឋាភិបាលនៅក្នុងប្រទេសនីមួយៗ ជួយដល់ឧស្សាហកម្មនេះក្នុងកំឡុងពេលមានវិបត្តិ។
អានបន្ថែម
វត្តមាននៃកម្មវិធីពិព័រណ៍សំណង់ធំបំផុតនៅកម្ពុជាឆ្នាំ២០២០ មិនមានការផ្លាស់ប្តូរទេ
ការតាំងពិព័រណ៍សំណង់ធំបំផុតប្រចាំឆ្នាំនៅកម្ពុជា ដែលរៀបចំឡើងដោយសមាគមអ្នកសាងសង់កម្ពុជា គឺមិនទាន់អាចបញ្ជាក់បានទេថា តើនឹងអាចប្រព្រឹត្តិឡើងទៅតាមផែនការគ្រោងទុក ឬក៏ត្រូវពន្យាពេលទៅថ្ងៃណាមួយខាងមុខ ខណៈដែលវិធានការគម្លាតសង្គមនៅតែបន្តអនុវត្ត ដើម្បីការពារការរីករាតត្បាតនៃជំងឺកូវីដ១៩។ លោក ជីវ ស៊ីវផេង អ្នកគ្រប់គ្រងទូទៅនៃអគ្គលេខាធិការដ្ឋាន សមាគមអ្នកសាងសង់កម្ពុជា បានប្រាប់ទស្សនាវដ្តីសំណង់ និងអចលនទ្រព្យថា សមាគមគឺកំពុងរង់ចាំមើលការវិវឌ្ឍន៍នៃស្ថានភាពជំងឺកូវីដ១៩ ហើយលោកមិនទាន់អាចបញ្ជាក់ជាផ្លូវការបាននៅឡើយទេ ថាតើព្រឹត្តិការណ៍ដ៏ធំមួយនេះ នឹងត្រូវពន្យារពេលទៅថ្ងៃក្រោយ ឬមួយយ៉ាងណា។ លោកបានមានប្រសាសន៍ថា៖ «យើងនឹងជូនដំណឹងនៅពេលក្រោយប្រហែលជា ៣ ខែមុនពេលកំណត់ [ថ្ងៃទី ៣-៥ ខែធ្នូ ឆ្នាំ ២០២០] ព្រោះឥឡូវនេះយើងកំពុងរង់ចាំមើលថាតើរដ្ឋាភិបាលនឹងអនុញ្ញាតឲ្យមានការជួបជុំនៅពេលខាងមុខឬអត់»។ លោក ស៊ីវផេង សង្ឃឹមថាជំងឺកូវីដ១៩ នឹងប្រសើរឡើងដើម្បីអាជីវកម្មអាចដំណើរការបានដូចធម្មតា។ គួរបញ្ជាក់ថា ជារៀងរាល់ឆ្នាំ សមាគមអ្នកសាងសង់កម្ពុជាតែងរៀបចំពិព័រណ៍ឧស្សាហកម្មសំណង់កម្ពុជា ដែលនឹងបង្ហាញផលិតផលរាប់ពាន់ពីស្តង់របស់ក្រុមហ៊ុនក្នុងស្រុក និងអន្តរជាតិរាប់រយ។ សម្រាប់ឆ្នាំ២០២០ បើគ្មានការពន្យារពេលនោះទេ ការតាំងពិព័រណ៍នឹងត្រូវធ្វើឡើងនៅថ្ងៃទី ៣-៥ ខែធ្នូនៅឯមជ្ឈមណ្ឌលសន្និបាត និងពិព័រណ៍កោះពេជ្យ។ សម្រាប់ព័ត៌មានបន្ថែម ឬ កក់ស្តង់ សូមទាក់ទង កញ្ញាម៉ាណាលេខទូរសព្ទ +855-60-888 944 ឬអ៊ីម៉ែល expo@construction-property.com
អានបន្ថែម
សមាគមអ្នកសាងសង់កម្ពុជាពិភាក្សាបច្ចុប្បន្នភាពវិស័យសំណង់ក្នុងកិច្ចប្រជុំវីដេអូជាមួយIFAWPCA
សមាគមអ្នកសាងសង់កម្ពុជា បានចូលរួមកិច្ចប្រជុំកំពូលពិសេសរបស់សមាគមសហព័ន្ធអន្តរជាតិអ្នកសាងសង់អាស៊ីនិងប៉ាស៊ីហ្វិកខាងលិចឬហៅកាត់ថា (IFAWPCA) តាមរយ:វីដេអូតាមប្រពន្ធ័អ៊ីនធឺណេត ដែលបានធ្វើឡើងកាលពីចុងខែ មិថុនា កន្លងទៅនេះ ដើម្បីពិភាក្សាបច្ចុប្បន្នភាពវិស័យសំណង់នៅកម្ពុជា ក៏ដូចជាផ្លាស់ប្តូរយោបល់គ្នាពីវិធីបត់បែនខ្លួនក្នុងវិបត្តិកូវីដ ។ កិច្ចប្រជុំនេះ អនុញ្ញាតឱ្យសមាជិកនៃសមាគមសហព័ន្ធផ្លាស់ប្តូរបទពិសោធន៍ទាក់ទងនឹងឧស្សាហកម្មសំណង់ជាមួយសមាជិកដទៃទៀតនៃ IFAWPCA ដោយនៅឆ្នាំនេះ IFAWPCA ផ្ដោតទៅលើការពិភាក្សាអំពីស្ថានភាពជំងឺកូវីដនាពេលបច្ចុប្បន្ន។ កិច្ចពិភាក្សានេះ ក៏ពិនិត្យមើលផងដែរអំពីរបៀបដែលសហព័ន្ធអាចសហការរួមគ្នាដើម្បីជួយប្រទេសជាសមាជិក IFAWPCA ក្នុងការគ្រប់គ្រងកិច្ចសន្យា FIDIC ឱ្យកាន់តែប្រសើរឡើង ការផ្លាស់ប្តូរកិច្ចសន្យា FIDIC ដែលអាចធ្វើទៅបានក្នុងស្ថានភាពជំងឺរាតត្បាតនាពេលបច្ចុប្បន្ននេះ ដ៏ដូចជាចែករំលែកជំនាញបច្ចេកទេស។ កាលពីឆ្នាំមុន លោកបណ្ឌិត តាន់មុនីវណ្ណ តំណាងសមាគមអ្នកសាងសង់កម្ពុជា ដែលដឹកនាំដោយ អ្នកឧកញ៉ា ពុង ឃាវ សែបានចូលរួមក្នុងកិច្ចប្រជុំកំពូលរបស់ IFAWPCA នៅប្រទេសប៊ូតង់។ គួរបញ្ជាក់ផងដែរថា សមាគមអ្នកសាងសង់កម្ពុជា បានចូលរួមជាសមាជិក IFAWAPCA កាលពីថ្ងៃទី ៦ ខែកុម្ភះឆ្នាំ ២០១៥ នៅទីក្រុងគូឡាឡាំពួ ក្នុងកិច្ចប្រជុំក្រុមប្រឹក្សាពាក់កណ្តាល IFAWPCA ។ IFAWPCA ត្រូវបានបង្កើតឡើងក្នុងឆ្នាំ ១៩៥៦ ដើម្បីលើកកម្ពស់វឌ្ឍនភាពសង្គម និងសេដ្ឋកិច្ចតាមរយៈការអភិវឌ្ឍន៍វិស័យសំណង់ហើយបច្ចុប្បន្នមានសមាជិកចំនួន ១៩ […]
អានបន្ថែម
សហព័ន្ធអ្នកសាងសង់អាស៊ានពិភាក្សាអំពីវិធីយកឈ្នះវិបត្តិកូវីដក្នុងកិច្ចប្រជុំលើកទី ៤៩
សហព័ន្ធអ្នកសាងសង់អាស៊ាន ឬ ASEAN Constructors Federation (ACF) បានបើកកិច្ចប្រជុំក្រុមប្រឹក្សាលើកទី ៤៩ តាមរយៈការធ្វើសន្និសីទវីដេអូតាមប្រព័ន្ធអ៊ីនធឺណិតកាលពីខែចុងខែ មិថុនា កន្លងមកនេះ ដើម្បីពិភាក្សាអំពីការអភិវឌ្ឍន៍នៃឧស្សាហកម្មសំណង់នៅក្នុងតំបន់ ក៏ដូចជាជួយគ្នារកដំណោះស្រាយ និងវិធីយកឈ្នះវិបត្តិកូវីដ។ កិច្ចប្រជុំក្រុមប្រឹក្សា ACF គឺជាការប្រជុំប្រចាំឆ្នាំដែលផ្តល់ឱកាសដល់សមាជិកនីមួយៗរបស់ខ្លួនរួមមានទាំងសមាគមអ្នកសាងសង់កម្ពុជាដែលតំណាងឱ្យកម្ពុជា ដើម្បីចែករំលែកព័ត៌មានអំពីសក្តានុពលនៃវិស័យសំណង់របស់ប្រទេសនីមួយៗ។ ប្រធានសមាគមអ្នកសាងសង់ម៉ាឡេស៊ីឬហៅកាត់ថា (MBAM) លោក Foo Chek Lee ដែលជាប្រធានទើបតែងតាំងថ្មីរបស់ ACF បានប្រសាសន៍ថា បច្ចុប្បន្ននេះ ឧស្សាហកម្មសំណង់កំពុងប្រឈមនឹងបញ្ហាដែលកើតចេញដោយសារកូវីដ១៩ សង្គ្រាមពាណិជ្ជកម្មពិភពលោក និងបញ្ហាជាច្រើនទៀតដែលរារាំងការរីកចម្រើនរបស់សមាជិក ACF នីមួយៗ។ លោកបានប្រសាសន៍នៅក្នុងសេចក្តីប្រកាសព័ត៌មានថា៖ «ដូច្នេះ យើងគួរធ្វើការជាមួយគ្នានិងចែករំលែកព័ត៌មានអំពីវិធីដើម្បីយកឈ្នះលើគ្រាលំបាកទាំងនេះ»។ លោកបន្តថា ៖ «យើងត្រូវបង្កើនការប្តេជ្ញាចិត្តរបស់យើងចំពោះសាមគ្គីភាពក្នុងការធានាថាសមាជិករបស់យើងដែលមិនសូវមានធនធានអាចសហការ និងមានឱកាសនិងជំនួយបន្ថែមទៀតដើម្បីទទួលយកគម្រោងនានា ហើយក៏ធានាថា ភាគីពាក់ព័ន្ធនៅក្នុងបរិយាកាសការងារសាងសង់ទទួលបានតម្លៃអតិបរមាសម្រាប់ការវិនិយោគរបស់ពួកគេ ដោយការតាមដានស្តង់ដារនៃការអនុវត្តជាក់ស្តែងនៅក្នុងឧស្សាហកម្មនេះ។ យើងគួរឆ្លៀតយកឱកាសនេះធ្វើការជាមួយគ្នាដើម្បីជំរុញ និងផ្សព្វផ្សាយការទិញផលិតផលអាស៊ានមុន» ។ លើសពីនេះទៅទៀត លោក Foo ក៏បានណែនាំដល់អ្នកម៉ៅការសំណង់គួរតែពិនិត្យរកវិធីសាស្រ្តថ្មីនៃការធ្វើការងារក្រៅការដ្ឋានសំណង់ សម្រាប់ការគ្រប់គ្រងគម្រោងរបស់ពួកគេឱ្យកាន់តែប្រសើរឡើង។ លោកបានបន្ថែមថា វាមានសារៈសំខាន់បំផុតដែលអ្នកម៉ៅការពិនិត្យរកវិធីសាស្រ្តថ្មីនៃការធ្វើការងារក្រៅការដ្ឋានសំណង់ដែលអាចជួយធ្វើឱ្យប្រសើរឡើងនូវការព្យាករណ៍ និងភាពស្ថិតស្ថេរ។ កិច្ចខិតខំប្រឹងប្រែងនេះ […]
អានបន្ថែម
កិច្ចប្រជុំ ACF នឹងត្រូវផ្អាក ខណៈកម្មវិធីទំនាក់ទំនងធុរកិច្ចរបស់ CCA ក៏អាចនឹងផ្អាកផងដែរ
កិច្ចប្រជុំក្រុមប្រឹក្សាសហព័ន្ធអ្នកសាងសង់អាស៊ាន ឬ ACF Council Meeting ត្រូវបានផ្អាកដើម្បីបង្កាការរីករាលដាលនៃជំងឺឆ្លងសកលកូវីដ១៩ ខណៈនេះដែរសមាគមអ្នកសាង សង់កម្ពុជា ឬ CCA ក៏អាចនឹងមិនបន្តរៀបចំកម្មវិធីទំនាក់ទំនងធុរកិច្ចប្រចាំឆ្នាំរបស់ខ្លួនផងដែរ។ ACF Council Meeting គឺជាកិច្ចប្រជុំរៀងរាល់ឆ្នាំដែលផ្តល់ឱកាសឲ្យសមាជិករបស់ខ្លួនដែលរួមមាន CCA ធ្វើការផ្សព្វផ្សាយអំពីសក្តានុពលនៃវិស័យសំណង់នៅតាមប្រទេសនីមួយៗក្នុងតំបន់អាស៊ីអាគ្នេយ៍។ ក៏ប៉ុន្តែ ដោយសារការរីករាលដាលនៃមេរោគកូវីដ១៩ រិតតែខ្លាំងឡើងៗ នៅទូទាំងសកលលោក ដោយមិនមានការថមថយទាល់តែសោះ ហេតុដូច្នេះកិច្ចប្រជុំដែលគ្រោងនឹងរៀបចំ ឡើងនៅថ្ងៃទី ២៣ ដល់ ២៤ ខែ មីនា ឆ្នាំ ២០២០ ខាងមុខនេះ នៅប្រទេសមីយ៉ានម៉ា នឹងត្រូវផ្អាកជាបណ្តោះអាសន្ន។ ស្របពេលជាមួយគ្នាដែរ ដោយសារភាពមិនច្បាស់លាស់នៃស្ថានភាពនាពេលបច្ចុប្បន្ន និងដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ការរីករាលដាលនៃមេរោគដ៏កាចសាហាវមួយនេះ CCA សម្រេចថានឹងផ្អាកកម្មវិធីមួយចំនួនដូចជា ទំនាក់ទំនងធុរកិច្ចរបស់ខ្លួន ដែលជាទូទៅតែងតែរៀបចំឡើងក្នុងអំឡុងខែមេសា ឬ ឧសភាខាងមុខនេះផងដែរ។ ជារៀងរាល់ឆ្នាំ សមាគមតែងតែរៀបចំកម្មវិធីទំនាក់ទំនងធុរកិច្ចដែល ផ្តល់ឱកាសឲ្យសមាជិករបស់ខ្លួនជួបជុំគ្នាដោយផ្ទាល់ ធ្វើការទំនាក់ទំនង និងស្វែងរកកិច្ចការងារបន្ថែមពីការផ្គត់ផ្គង់ និងតម្រូវការនៃសម្ភារសំណង់ក្នុងទីផ្សារកម្ពុជា។ សមាគមនឹងកំណត់កាលបរិច្ឆេទនៃកម្មវិធីនេះជាថ្មីនៅពេលដ៏សមស្របណាមួយនាពេលខាងមុខនេះ។ សម្រាប់កម្មវិធីពិព័រណ៍ប្រចាំឆ្នាំវិញ សមាគមកំពុងធ្វើការសិក្សាថាត្រូវបន្ត ឬយ៉ាងណា ក៏ប៉ុន្តែប្រសិនបើមានការផ្លាស់ប្តូរ ឬយ៉ាងណានោះ […]
អានបន្ថែម