Evergrande ប្ដេជ្ញានឹងបញ្ចប់គម្រោង ៣៩០០០ យូនីត ក្នុងខែធ្នូ ទោះវិបត្តិបំណុលកំពុងក្ដៅគគុក

• 28 ខែ​ធ្នូ 2021
• ព័ត៌មានអចលនទ្រព្យ
• 9 មើល

ក្រុមហ៊ុន Evergrande Group បានប្តេជ្ញាថានឹងពន្លឿនការងារសាងសង់គម្រោងនានា ក្នុងទិសដៅបញ្ចប់ឱ្យបាន ៣៩០០០ យូនីត ត្រឹមខែធ្នូ ឆ្នាំនេះ បើទោះបីក្រុមហ៊ុនកំពុងជួបវិបត្តិបំណុលក្ដៅគគុក និងខកខានមិនបានសងប្រាក់ទៅម្ចាស់បំណុលកាលពីដើមខែធ្នូ កន្លងមកនេះក៏ដោយ។

យោងតាម CNN ប្រធានក្រុមហ៊ុន Evergrande លោក Hui Ka Yan បាននិយាយនៅក្នុងកិច្ចប្រជុំកាលពីថ្ងៃទី ២៦ ធ្នូ នេះថា៖ «គ្មាននរណាម្នាក់នៅ Evergrande នឹងត្រូវ “ដេកផ្ទះ ឬបោះបង់” ទេ ដោយជំរុញឱ្យបុគ្គលិកតស៊ូទាំងយប់ទាំងថ្ងៃដើម្បីជំរុញការលក់ និងសងបំណុល»។

លោក Hui បន្ដថា ៖ «ក្រុមហ៊ុនចាប់ផ្តើមការងារសំណង់ឡើងវិញយ៉ាងសកម្ម ដោយគ្រោងនឹងបញ្ចប់ ១១៥ គម្រោង ឬស្មើនឹង ៣៩ ០០០ យូនីត ត្រឹមចុងខែធ្នូនេះ»។

ការប្ដេជ្ញានេះ គឺបន្ទាប់ពីនិយ័តករអចលនទ្រព្យកំពូលរបស់ប្រទេសចិនព្រមានថា រដ្ឋាភិបាលនឹងចាត់វិធានការក្ដៅលើហានិភ័យដែលបណ្តាលមកពីការបញ្ចប់គម្រោងយឺតជាងកាលកំណត់។

Evergrande គឺជាអ្នកអភិវឌ្ឍន៍អចលនទ្រព្យដែលជំពាក់បំណុលច្រើនជាងគេបំផុតរបស់ពិភពលោកដែលមានបំណុលច្រើនជាង ៣០០ ពាន់លានដុល្លារ។

នៅដើមខែធ្នូ ក្រុមហ៊ុន Fitch Rating បានទម្លាក់ចំណាត់ថ្នាក់ក្រុមហ៊ុននេះទៅជា ” restricted default ” មានន័យថាជាក្រុមហ៊ុនដែលបានបរាជ័យក្នុងការបំពេញកាតព្វកិច្ចហិរញ្ញវត្ថុរបស់ខ្លួន ឬនិយាយឱ្យងាយយល់គឺខកខានការសងប្រាក់ដល់ម្ចាស់បំណុលកម្រិតធ្ងន់។

• ធុរកិច្ច និងទីផ្សារ
• ធុរកិច្ច និងទីផ្សារ