វិនិយោគផ្ទាល់បរទេសកើន ៩,៦% នៅឆមាសទី១ ខណៈអចលនទ្រព្យ និងសំណង់រួមចំណែក ១៥,៩%

• 27 ខែ​វិច្ឆិកា 2021
• Uncategorized
• 6 មើល

គិតត្រឹមឆមាសទី ១ នៃឆ្នាំ ២០២១ នេះកម្ពុជាមានគម្រោងវិនិយោគផ្ទាល់ពីបរទេសសរុប ៣៩ប៊ីលានដុល្លារ ដែលកើនឡើង ៩,៦% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមស្ថិតិចេញផ្សាយដោយធនាគារជាតិនៃកម្ពុជា កាលពីថ្ងៃទី ២៧ វិច្ឆិកា នេះ។

ក្នុងនោះ វិស័យអចលនទ្រព្យស្ថិតក្នុងលំដាប់ទី ៣ ពោលគឺ រួមចំណែក ១២,២% នៃទុនសរុប ដែលស្មើនឹងជាង ៤,៧ប៊ីលានដុល្លារ។ ដោយឡែក វិស័យសំណង់រួមចំណែក ៣,៧% ឬស្មើនឹងទុន១,៤ប៊ីលានដុល្លារ។

របាយការណ៍បញ្ជាក់ថា ប្រទេសចិនជាប្រភពនៃការវិនិយោគផ្ទាល់ពីបរទេសធំជាងគេរបស់កម្ពុជា ដែលមានទុនវិនិយោគសរុប ១៧,៣ប៊ីលានដុល្លារ ឬតំណាង ៤៤,២% នៃទុនវិនិយោគសរុប។

ប្រទេសកូរ៉េខាងត្បូង ស្ថិតក្នុងលំដាប់ទី២ ដែលមានគម្រោងវិនិយោគចុះបញ្ជីមានតម្លៃសរុប ៤,១ប៊ីលានដុល្លារ តាមពីក្រោយដោយវៀតណាម និងសិង្ហបុរី ដែលមានទុនវិនិយោគសរុប ២,៥ប៊ីលានដុល្លារ និង២,៤ប៊ីលានដុល្លារ រៀងគ្នា។

ប្រទេសដទៃទៀត មានដូចជាប្រទេសជប៉ុន ២,៣ប៊ីលានដុល្លារ ម៉ាឡេស៊ី ១,៨ប៊ីលានដុល្លារ ប្រទេសថៃ ១,៨លានដុល្លារ អង់គ្លេស ១,៣ប៊ីលានដុល្លារ កាណាដា ១ ប៊ីលានដុល្លារ និងសហរដ្ឋអាមេរិក ០,៨ប៊ីលានដុល្លារ។

លំហូរវិនិយោគនេះគ្របដណ្តប់លើវិស័យកសិកម្ម កម្មន្តសាល ហិរញ្ញវត្ថុ សណ្ឋាគារនិងរមណីយដ្ឋាន សំណង់ វារីអគ្គិសនី និងអចលនទ្រព្យ ជាដើម។

វិស័យហិរញ្ញវត្ថុ ទទួលបានសមាមាត្រនៃវិនិយោគផ្ទាល់ពីបរទេសច្រើនជាងគេ ២១,៩% ឬ ស្មើនឹងប្រមាណ ៨,៥ប៊ីលានដុល្លារ តាមពីក្រោយដោយ វិស័យកម្មន្តសាល ២០,៩% ស្មើនឹងប្រមាណ ៧,៨ប៊ីលានដុល្លារ។

• អត្ថបទវិភាគ
• Analysis
• អត្ថបទវិភាគ
• Economy and Finance