WB ៖វិស័យសំណង់និងអចលនទ្រព្យ ទំនងនឹងមិនងើបឡើងវិញទេឆាប់ៗនេះទេ

• 10 ខែ​ធ្នូ 2021
• Uncategorized
• 6 មើល

វិស័យសំណង់ និងអចលនទ្រព្យនៅកម្ពុជានៅតែស្ថិតក្រោមសម្ពាធដែលកើតចេញពីវិបត្តិកូវីដ ហើយទំនងនឹងមិនទាន់ងើបឡើងវិញខ្លាំងទេ ក្នុងពេលឆាប់ៗខាងមុខនេះ បើទោះបីជាការព្យាករណ៍កំណើនសេដ្ឋកិច្ចឆ្នាំ ២០២២ មានដល់ ៤,៥% ក្ដី។ នេះបើយោងតាមរបាយការណ៍របស់ធនាគារពិភពលោកចេញផ្សាយនៅថ្ងៃទី ៩ ខែធ្នូ។

របាយការណ៍បន្ដថា គម្រោងអភិវឌ្ឍន៍ពាណិជ្ជកម្ម និងខូនដុធំៗ បានបន្តរងផលប៉ះពាល់ខ្លាំងពីការបាត់វិនិយោគិនបរទេស។ លើសពីនេះ ការផ្គត់ផ្គង់ក៏លើសតម្រូវការ ដោយសារតែការផ្ទុះខ្លាំងនៃវិស័យនេះមុនវិបត្តិកូវីដ។ ជាក់ស្ដែង គម្រោងជាច្រើនត្រូវបានពន្យារពេលបញ្ចប់ការសាងសង់ទៅឆ្នាំក្រោយ។

ការធ្លាក់ចុះនេះគឺបណ្តាលមកពីកត្តាដូចជា ការរំខាននៃខ្សែសង្វាក់ផ្គត់ផ្គង់សំណង់ កង្វះពលករ បញ្ហារំហូរសាច់ប្រាក់ និងការលក់យឺតជាងការរំពឹងទុក។ ប៉ុន្តែឃើញថា អចលនទ្រព្យលំនៅឋានតម្លៃទាប និងតម្លៃសមរម្យ គឺនៅតែមានភាពរឹងមាំ។

ដូចគ្នាដែរ សម្រាប់វិស័យសំណង់ ក្នុងរយៈពេល ៩ខែដំបូង នៃឆ្នាំ ២០២១ ទាំងទុនវិនិយោគ និងទំហំសំណង់ បានថមថយ ២៤,៨% និង ១៧,១% រៀងៗគ្នា បើធៀបនឹងឆ្នាំមុន។

ធនាគារពិភពលោកបន្តថា អ្វីដែលគួរឱ្យបារម្ភជាងនេះទៀតគឺ បើវិបត្តិនេះបន្ដយូរ វានឹងជះឥទ្ធិពលអវិជ្ជមានដល់ហិរញ្ញវត្ថុរបស់អ្នកអភិវឌ្ឍក្នុងស្រុក ហើយក៏នឹងបន្តបង្កហានិភ័យដល់វិស័យហិរញ្ញវត្ថុទាំងមូល។

លើសពីនេះ ទោះបីជារដ្ឋមានវិធានការជួយសម្រួលក្ដី តែវានឹងអាចជួយឧស្សាហកម្មនេះ បានក្នុងរយៈពេលខ្លីប៉ុណ្ណោះ។

ជាចុងក្រោយ ធនាគារពិភពលោកថា ការបើកប្រទេសគឺជាសញ្ញាវិជ្ជមាន ប៉ុន្តែការបើកប្រទេសមិនមែនជាការធានា១០០% ថានឹងមានរំហូរវិនិយោគពីបរទេសចូលមកភ្លាមៗទេ ព្រោះវាអាស្រ័យលើសេដ្ឋកិច្ចរបស់ប្រទេសទាំងនោះដែរ។

ដូច្នេះ បើគ្មានរំហូរលុយពីបរទេសចូលមកទេ វិស័យសំណង់ និងអចលនទ្រព្យ នឹងមិនងើបឡើងវិញខ្លាំងឡើយ ព្រោះតម្រូវការក្នុងស្រុកគឺទាប និងមិនគ្រប់គ្រាន់សម្រាប់ទ្រទ្រង់ទីផ្សារនោះទេ។

• អត្ថបទវិភាគ
• Analysis
• អត្ថបទវិភាគ
• Economy and Finance