ការវិនិយោគលើវិស័យសំណង់នៅកម្ពុជា នៅមិនទាន់អាចងើបឡើងវិញបាននៅឡើយ ខណៈតួលេខឆ្នាំ ២០២៤ នៅទាបខ្លាំង ធៀបនឹងឆ្នាំមុនៗ

31 ខែតុលា 2024
Uncategorized
5 មើល

បច្ចុប្បន្នភាពនៃវិស័យសំណង់របស់កម្ពុជា នៅមិនទាន់មានកំណើនខ្លាំងឡើងវិញនៅឡើយទេ ជាក់ស្តែងតួលេខនៃចំនួនគម្រោងវិនិយោគដែលត្រូវបានអនុម័តក្នុងឆ្នាំ ២០២៤ នៅមានតិចតួចជាងឆ្នាំ ២០២១ និង២០២៣ ពោលគឺបានធ្លាក់ចុះមកនៅត្រឹមប្រហែល ២១៩០គម្រោង (ក្រោម ៤ពាន់លានដុល្លារ) គិតត្រឹមខែសីហា ឆ្នាំ ២០២៤ ពីចំនួនជិត ៤៨៤១ គម្រោង (ជិត១២ពាន់លានដុល្លារ) ក្នុងឆ្នាំ ២០២០ នេះបើយោងតាមរបាយការណ៍ចុងក្រោយបំផុតរបស់ក្រសួងរៀបចំដែនដី និងនគរូបនីយកម្ម ត្រីមាសទី ៣ ឆ្នាំ ២០២៤ និងបានបង្ហាញដោយ CBRE Research ចុះថ្ងៃទី ១៧ ខែតុលា ឆ្នាំ ២០២៤។

គួររំលឹកថា ចាប់ពីឆ្នាំ ២០១៧ ដល់ឆ្នាំ ២០២៤ ទិដ្ឋភាពនៃការវិនិយោគលើវិស័យសំណង់របស់ប្រទេសកម្ពុជា មានការផ្លាស់ប្តូរជាដំណាក់កាលគួរឱ្យកត់សម្គាល់ផ្សេងៗគ្នា។ រយៈពេលពីឆ្នាំ ២០១៧ ដល់ឆ្នាំ ២០២០ វិស័យនេះ មានការកើនឡើងជាបន្តបន្ទាប់ និងបានឈានដល់កម្រិតខ្ពស់បំផុតក្នុងឆ្នាំ ២០២០ដែលមានចំនួនគម្រោងវិនិយោគរហូតដល់ ៤៨៤១ គម្រោង ស្មើនឹងទំហំទឹកប្រាក់វិនិយោគប្រមាណជិត ១២ ពាន់លានដុល្លារ។ ចំពោះគម្រោងវិនិយោគតាមវិស័យផ្សេងៗវិញ ក្នុងឆ្នាំ ២០២០ មានគម្រោងរហូតដល់ជិត ៤០០០ គម្រោង ក្នុងនោះមានវិស័យលំនៅដ្ឋាន (២៥០០គម្រោង) ហេដ្ឋារចនាសម្ព័ន្ធសាធារណៈ (៧៥០ គម្រោង) និងឧស្សាហកម្ម (៣៥០ គម្រោង)។

ការវិភាគលើអត្រាប្រែប្រួលប្រចាំឆ្នាំ

20១៧៖ សរុបគម្រោងចំនួន ២២៥០ ភាគច្រើននាំមុខដោយវិស័យសំណង់បែបលំនៅដ្ឋាន
២០១៨៖ កើនឡើងតិចតួចដល់ប្រហែល ២៥០០ ខណៈវិស័យលំនៅដ្ឋាននៅតែបន្តនាំមុខគេ
ឆ្នាំ ២០១៩៖ មានការហក់ឡើងទៅដល់ប្រមាណ ៤៧៩៣ គម្រោង ដែលបង្ហាញពីការកើនឡើងនៅគ្រប់វិស័យ
២០២០៖ ជាឆ្នាំដែលមានចំនួនគម្រោងច្រើនបំផុត គឺជិត ៥000គម្រោង ដែលជំរុញដោយវិស័យលំនៅឋាន សាធារណៈ និងឧស្សាហកម្ម។
២០២១-២០២២៖ ការធ្លាក់ចុះបានបន្ត ដោយចំនួនសរុបបានធ្លាក់ចុះមកនៅប្រមាណ ២៧០០ និងគម្រោង ១៥០០ រៀងគ្នា។
ឆ្នាំ ២០២៣៖ មានការងើបឡើងវិញតិចតួច មានគម្រោងប្រហែល ៣២០៧ ដែលភាគច្រើនជាគម្រោងសំណង់បែបលំនៅដ្ឋាន និងការវិនិយោគសាធារណៈ។
ឆ្នាំ ២០២៤ (ខែសីហា)៖ ការធ្លាក់ចុះទាបជាងកាលពីឆ្នាំ ២០២៣ ដោយមានគម្រោងចំនួនតែ ២១៩០ ដែលបង្ហាញពីស្ថានភាពទីផ្សារនៅមិនទាន់មានសន្ទុះឡើងវិញនៅឡើយ។

ការអភិវឌ្ឍសំណង់សម្រាប់វិស័យលំនៅឋាននៅតែរក្សាភាពលេចធ្លោ

ពេញមួយរយៈពេលដ៏ច្របូកច្របល់នេះ វិស័យលំនៅឋានគឺជាមូលដ្ឋានគ្រឹះនៃការវិនិយោគលើវិស័យសំណង់របស់ប្រទេសកម្ពុជា ដែលបង្ហាញពីភាពធន់គួរឱ្យកត់សម្គាល់ បើទោះបីជាទីផ្សារ នៅតែមិនទាន់មានភាពអំណោយផលដូចមុនក៏ដោយ។ នៅឆ្នាំ ២០២៤ គម្រោងលំនៅឋាន តំណាងឱ្យប្រហែល ៧៧% នៃការវិនិយោគសរុបដែលបានអនុម័ត ខណៈការវិនិយោគលើវិស័យបែបពាណិជ្ជកម្ម និងទេសចរណ៍នៅតែមានសកម្មភាពតិចតួច បើធៀបនឹងឆ្នាំ ២០១៩ និង២០២០ ចំណែកឯការវិនិយោគលើវិស័យសំណង់សាធារណៈ និងឧស្សាហកម្ម ក៏ចាប់ផ្តើមមានសកម្មភាពខ្លាំងជាងមុន។

វិស័យសំណង់សាធារណៈ ហាក់មិនមានការផ្លាស់ប្តូរច្រើនប៉ុន្មានទេ ត្បិតតួលេខក្នុងឆ្នាំ ២០២០ និង២០២៤ ហាក់មានភាពប្រហាក់ប្រហែលគ្នា ប៉ុន្តែមានចំនួនច្រើនជាងកាលពីឆ្នាំ ២០២១ – ២០២៣។ ទោះយ៉ាងណាក៏ដោយ គម្រោងវិនិយោគលើវិស័យសំណង់ឧស្សាហ៍កម្ម ហាក់មានការកើនឡើងច្រើន ក្នុងឆ្នាំ ២០២៤ ដែលមានប្រមាណជាង ៣០០ គម្រោង កើនឡើងលើសកាលពីឆ្នាំកន្លងទៅ រាប់ចាប់តាំងពីឆ្នាំ ២០២០រៀងមក។ កាលពីកំឡុងឆ្នាំ ២០២០ គម្រោងវិនិយោគលើវិស័យសំណង់ពាណិជ្ជកម្ម មានជិត ១០០០គម្រោង ខណៈឆ្នាំ ២០២៤ មានក្រោម ៥០០ គម្រោង៕