ក្រុមហ៊ុនចិន China Minsheng Stone ចង់បោះទុនវិនិយោគកែច្នៃថ្មម៉ាបសិប្បនិម្មិតនៅកម្ពុជា

31 ខែមីនា 2025
Uncategorized
4 មើល

ក្រុមហ៊ុន China Minsheng Stone Industry Group មកពីប្រទេសចិន មានបំណងបណ្តាក់ទុនវិនិយោគកែច្នៃថ្មម៉ាប និងផលិតថ្មម៉ាបសិប្បនិម្មិតនៅកម្ពុជា។ នេះបើតាមជំនួបរវាងឯកឧត្តម ជា វុទ្ធី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោក ម៉ាយ ជាំងទ្បុង (Mai Jianglong) អនុប្រធានក្រុមហ៊ុន China Minsheng Stone Industry Group កាលពីថ្ងៃទី២៨ ខែមីនា ឆ្នាំ២០២៥។

ជាការឆ្លើយតប ឯកឧត្តម ជា វុទ្ធី បានសម្តែងនូវការស្វាគមន៍ និងគាំទ្រគម្រោងវិនិយោគរបស់ក្រុមហ៊ុននៅកម្ពុជា និងបានជម្រាបជូនក្រុមហ៊ុនពីបរិស្ថានវិនិយោគនៅកម្ពុជាដែលពោរពេញដោយភាពអំណោយផលពិសេស របបលើកទឹកចិត្តវិនិយោគ និងវិធានការគាំទ្រនានារបស់រាជរដ្ឋាភិបាលដែលបានបន្តដាក់ចេញសំដៅធ្វើឱ្យបរិយាកាសវិនិយោគ និងធុរកិច្ចនៅកម្ពុជាកាន់តែប្រសើរទ្បើង និងកាន់តែមានភាពទាក់ទាញ។

ទន្ទឹមនឹងនេះ ឯកឧត្តមអគ្គលេខាធិការ បានលើកទឹកចិត្តឱ្យក្រុមហ៊ុនរួសរាន់សម្រេចចិត្តក្នុងការបណ្តាក់ទុនវិនិយោគដើម្បីឆាប់ទទួលបានផលចំណេញ និងបានជំរុញឱ្យក្រុមហ៊ុនខិតខំប្រើប្រាស់វត្ថុធាតុដើមក្នុងស្រុកក្នុងខ្សែច្រវាក់ផលិតកម្មរបស់ខ្លួនឱ្យអស់សមត្ថភាពដើម្បីចូលរួមបង្កើតតម្លៃបន្ថែម។

គួរបញ្ជាក់ថា ក្រៅពីវិស័យថ្មម៉ាប គិតមកទល់បច្ចុប្បន្ន កម្ពុជាមានក្រុមហ៊ុនធ្វើអាជីវកម្មថ្មអារទូទាំងប្រទេសចំនួន ៦៨ ក្រុមហ៊ុន ស្មើនឹង ៩០គម្រោង ស្ថិតក្នុងខេត្តចំនួន ១១។ ក្នុងចំណោមនោះ ខេត្តក្រចេះនាំមុខគេ ដែលមានរោងចក្រកែច្នៃថ្មអាចំនួន ២២ក្រុមហ៊ុន ស្មើ ២៧គម្រោង គ្របដណ្តប់លើផ្ទៃដីប្រមាណ ២.០៦៥ ហិកតា។ (អានបន្ថែម)

ការវិនិយោគដោយក្រុមហ៊ុន China Minsheng Stone នេះជាការបោះជំហានដ៏សំខាន់មួយឆ្ពោះទៅមុខសម្រាប់ឧស្សាហកម្មថ្មម៉ាបនៅកម្ពុជា ហើយត្រូវបានគេរំពឹងថានឹងជួយជំរុញដល់ការអភិវឌ្ឍសេដ្ឋកិច្ចរបស់ប្រទេស។