ក្រុមហ៊ុនចិន Shenzhen ចង់វិនិយោគលើវិស័យឱសថ និងសុខាភិបាលនៅកម្ពុជា

• 22 ខែ​តុលា 2025
• Uncategorized
• 8 មើល

ក្រុមហ៊ុន Shenzhen Jintong បានបង្ហាញការចាប់អារម្មណ៍ចង់វិនិយោគលើវិស័យឱសថ និងសុខាភិបាលនៅកម្ពុជា ដើម្បីជួយលើកស្ទួយសេដ្ឋកិច្ចជាតិទ្វេភាគី។

នេះបើតាមជំនួបពិភាក្សារវាងឯកឧត្តម ឈាង រ៉ា រដ្ឋមន្រ្តីក្រសួងសុខាភិបាល ជាមួយគណៈប្រតិភូវិនិយោគចិន ដឹកនាំដោយលោក យ៉ង លីវ ប្រធានក្រុមហ៊ុនShenzhen Jintong និងសាស្ត្រាចារ្យ ហ្សាង សូជី ប្រធានផ្នែកវិទ្យាសាស្ត្រ និងស្រាវជ្រាវវេជ្ជសាស្ត្រ កាលថ្ងៃទី១៤ ខែតុលា ឆ្នាំ២០២៥។

នាឱកាសនោះ ប្រធានក្រុមហ៊ុន Shenzhen Jintong បានឱ្យដឹងថា ជំនួបពិភាក្សា មានគោលបំណងសិក្សាស្វែងយល់អំពីបរិបទឱកាសវិនិយោគលើវិស័យឱសថ និងឱកាសវិនិយោគក្នុងវិស័យសុខាភិបាលនៅកម្ពុជា ជាផ្នែកមួយនៃការចូលរួមសហការរវាងរដ្ឋាភិបាលទាំងពីរ និងជួយលើកស្ទួយសេដ្ឋកិច្ចជាតិ។

ជាការឆ្លើយតប ឯកឧត្តមរដ្ឋមន្រ្តីក្រសួងសុខាភិបាល បានលើកឡើងថា ក្រសួងសុខាភិបាលសូមស្វាគមន៍ និងគាំទ្រជានិច្ចដល់កិច្ចសហប្រតិបត្តិការនានា និងការវិនិយោគក្នុងវិស័យសុខាភិបាល ដែលអនុវត្តដោយគោរពតាមនីតិវិធីច្បាប់ និងស្តង់ដារជាតិ និងអន្តរជាតិ ដើម្បីធានាបាននូវគុណភាពសេវាសុខាភិបាល និងសុវត្ថិភាពប្រជាពលរដ្ឋជាចម្បង។

គួររម្លឹកថា ពាក់ព័ន្ធនឹងវិស័យសុខាភិបាលនេះដែរ ក្រុមហ៊ុន Sino Group និងក្រុមហ៊ុន YHS (Cambodia) Food & Beverage Pte Ltd (Yeo’s) ក៏មានគម្រោងសិក្សាលទ្ធភាពក្នុងការរៀបចំបង្កើតគ្លីនិកចល័ត (Mobile Clinic) និងការផ្តល់ជំនួយអាហារូបត្ថម្ភដល់កុមារជាសិស្សានុសិស្សនៅតាមបណ្តាខេត្តនានារបស់ម្ពុជា ដើម្បីចូលរួមក្នុងសកម្មភាពទំនួលខុសត្រូវសង្គមផងដែរ។នេះបើយោងតាមជំនួបពិភាក្សារវាងឯកឧត្តម ស៊ុន ចាន់ថុល ជាមួយក្រុមហ៊ុនទាំងពីរ កាលថ្ងៃទី១៤ ខែតុលា ឆ្នាំ២០២៥៕