ក្រុមហ៊ុនបារាំង ស្នើពិនិត្យលទ្ធភាពវិនិយោគលើការផលិតថាមពលអគ្គិសនីចេញពីសំរាម នៅកម្ពុជា

• 19 ខែ​កញ្ញា 2025
• Uncategorized
• 6 មើល

តំណាងក្រុមហ៊ុនបារាំងធំៗប្រមាណ៣០ បានមកប្រទេសកម្ពុជាដើម្បីស្វែងយល់អំពីឱកាសវិនិយោគថ្មីៗ ពិសេសស្នើសុំពិនិត្យលទ្ធភាពវិនិយោគលើគម្រោងថាមពលអគ្គិសនីចេញពីសំរាមសំដៅឈានទៅពង្រឹងភាពជាដៃគូផ្នែកសេដ្ឋកិច្ចរវាងប្រទេសទាំងពីរ។ នេះបើយោងតាមហ្វេសប៊ុករបស់ ស្ថានទូតបារាំងប្រចាំកម្ពុជា និងក្រសួងរ៉ែ និងថាមពល នៅថ្ងៃទី១២ ខែកញ្ញា ឆ្នាំ២០២៥។

ស្ថានទូតបារាំងនៅកម្ពុជា បានឱ្យដឹងថា គណៈប្រតិភូតំណាងក្រុមហ៊ុនបារាំង មកទស្សនកិច្ចកម្ពុជា ក្នុងគោលបំណងដើម្បីពិភាក្សាផ្លាស់ប្តូរយោបល់ស្តីពីចក្ខុវិស័យនៃកិច្ចសហប្រតិបត្តិការ និងកិច្ចសន្យានានានៅក្នុងវិស័យសំខាន់ៗ ដែលក្រុមហ៊ុនបារាំងមានចំណេះ និងជំនាញ ដើម្បីស្វែងយល់ពីលទ្ធភាពនៃការបង្កើតភាពជាដៃគូ សម្រាប់ទំនាក់ទំនងសេដ្ឋកិច្ចជាមួយអាស៊ាន។

ទន្ទឹមគ្នានេះ បើតាមឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានឱ្យដឹងថា ឯកអគ្គរដ្ឋទូតបារាំងថ្មីប្រចាំកម្ពុជា និងក្រុមហ៊ុនបារាំង មកកាន់កម្ពុជា គឺបានស្នើសុំពិនិត្យលទ្ធភាពវិនិយោគគម្រោងថាមពលអគ្គិសនីចេញពីសំរាម អ៊ីដ្រូហ្សែននិងវារីអគ្គិសនី។

គួររំលឹកថា ក្នុងមួយខែសីហា ឆ្នាំ២០២៥នេះ កម្ពុជាបន្តទទួលបានគម្រោងវិនិយោគថ្មីចំនួន៥១ ក្រោមទុនវិនិយោគសរុបរហូត ៦០៨លានដុល្លារ នេះបើយោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា(CDC) កាលថ្ងៃទី៣ ខែកញ្ញា ឆ្នាំ២០២៥។ CDC បន្តថា ក្នុងខែសីហានេះ ប្រភពទុនវិនិយោគដែលឈានមុខគេ រួមមាន៖១. កម្ពុជាមានជិត ៤៦%, ២. ចិនជិត ៤៤%, ៣. សិង្ហបុរីមានជាង ៦%, ៤. អង់គ្លេសមានជិត ៣%, កោះ Caymanមានជិត ២%, ៦. កោះ: British Virgin មានជិត ១% និងជប៉ុនមានជិត ១%៕ (អានបន្ថែម)

• Energy