ក្រុមហ៊ុន១មកពីអាមេរិកប្រកាស ជ្រើសយកកម្ពុជាធ្វើជាមជ្ឈមណ្ឌលផលិតកម្មគោលរបស់ខ្លួន

• 6 ខែ​ឧសភា 2025
• Uncategorized
• 5 មើល

នៅក្នុងការអភិវឌ្ឍន៍ដ៏សំខាន់សម្រាប់សេដ្ឋកិច្ចរបស់ប្រទេសកម្ពុជា ក្រុមហ៊ុន Montana Fly Co., Ltd. ដែលជាក្រុមហ៊ុនផលិតឧបករណ៍នេសាទដ៏ល្បីមួយរបស់សហរដ្ឋអាមេរិក បានកំណត់ជ្រើសយកប្រទេសកម្ពុជាធ្វើជាមជ្ឈមណ្ឌល់ផលិតកម្មចម្បងរបស់ខ្លួនសម្រាប់នាំចេញទៅទីផ្សារពិភពលោក។ ការប្រកាសនេះធ្វើឡើងក្នុងជំនួបរវាងឯកឧត្តមទេសរដ្ឋមន្ត្រី ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោក Adam Trina នាយកប្រតិបត្តិក្រុមហ៊ុន នៅថ្ងៃទី៥ ខែឧសភា ឆ្នាំ២០២៤។

ក្នុងកិច្ចប្រជុំនេះ ក្រុមហ៊ុន Montana Fly តាមរយៈក្រុមហ៊ុនបុត្រសម្ព័ន្ធស្ថិតក្រោមការគ្រប់គ្រងរបស់ខ្លួន១០០% គឺក្រុមហ៊ុន Fishing Fly Cambodia Co., Ltd. បានប្តេជ្ញាចិត្តថា នឹងបន្តពង្រីកការវិនិយោគរបស់ខ្លួននៅកម្ពុជា និងយកកម្ពុជាធ្វើជាមូលដ្ឋានផលិតកម្មសកល សម្រាប់ផ្គត់ផ្គង់ទៅទីផ្សារពិភពលោក។ ការសម្រេចចិត្តរបស់ក្រុមហ៊ុននាឱកាសនេះ ត្រូវបានជះឥទ្ធិពលដោយកត្តាអំណោយផលជាច្រើននៅក្នុងប្រទេសកម្ពុជា រួមទាំងគោលនយោបាយគាំទ្រអាជីវកម្មរបស់រដ្ឋាភិបាលកម្ពុជាដែលអនុញ្ញាតឱ្យវិនិយោគិនបរទេសមានភាពជាម្ចាស់ ១០០% នៃសហគ្រាសរបស់ពួកគេ។ លើសពីនេះទៀត ការវិនិយោគដែលកំពុងបន្តនៅក្នុងហេដ្ឋារចនាសម្ព័ន្ធដឹកជញ្ជូន និងកម្លាំងពលកម្មដែលមានជំនាញ និងអាចសម្របខ្លួនបានដោយស្ទាត់ជំនាញនូវភាសាអង់គ្លេស ដែលនេះជាការរួមចំណែកដល់ការផ្លាស់ប្តូរយុទ្ធសាស្ត្រមួយនេះ។

Montana Fly ត្រូវបានគេទទួលស្គាល់ថាជាក្រុមហ៊ុនផលិតឧបករណ៍នេសាទ និងនុយ ដ៏ធំបំផុតរបស់ពិភពលោក ដោយផ្គត់ផ្គង់ផលិតផលរបស់ខ្លួនទៅកាន់ទីផ្សារនៅអាមេរិកខាងជើង និងសហភាពអឺរ៉ុប។ បច្ចុប្បន្ន ក្រុមហ៊ុនមានបុគ្គលិកប្រមាណ ៦៥០នាក់ នៅក្នុងប្រទេសកម្ពុជា ហើយប្តេជ្ញាពង្រីកសមត្ថភាពផលិតកម្មរបស់ខ្លួនបន្ថែមទៀតនៅក្នុងប្រទេសមួយនេះ។

គំនិតផ្តួចផ្តើមនេះត្រូវបានគេរំពឹងថានឹងជំរុញការងារក្នុងស្រុក និងពង្រឹងវត្តមានរបស់កម្ពុជានៅក្នុងឧស្សាហកម្មនេសាទពិភពលោក ដោយពង្រឹងកេរ្តិ៍ឈ្មោះរបស់ប្រទេសជាគោលដៅទាក់ទាញបំផុតសម្រាប់ការវិនិយោគពីបរទេស។