ក្រុមហ៊ុន VINCI ចង់ពង្រីកការវិនិយោគបន្ថែមនៅកម្ពុជា ដោយផ្តោតលើវិស័យថាមពលស្អាត និងទឹកស្អាត

• 14 ខែ​កក្កដា 2025
• Uncategorized
• 5 មើល

ក្រុមហ៊ុន VINCI Airports បានបង្ហាញពីចំណាប់អារម្មណ៍ចង់ពង្រីកការវិនិយោគបន្ថែមនៅកម្ពុជា ដោយផ្តោតលើវិស័យថាមពលស្អាត និងទឹកស្អាត ដើម្បីរួមចំណែកក្នុងការអភិវឌ្ឍសេដ្ឋកិច្ចប្រទេសកម្ពុជា។ នេះបើយោងតាមជំនួបពិភាក្សារវាងសម្តេចនាយករដ្ឋមន្ត្រី ហ៊ុន ម៉ាណែត ជាមួយលោក Nicolas NOTEBAERT ប្រធានក្រុមហ៊ុន VINCI Airports និងជាប្រធានក្រុមប្រឹក្សាភិបាលក្រុមហ៊ុន SCA នៅថ្ងៃទី១០ ខែកក្កដា ឆ្នាំ២០២៥។

នាឱកាសនោះ លោកប្រធានក្រុមហ៊ុន VINCI បានលើកឡើងថា ក្រុមហ៊ុនរបស់លោកមានចំណាប់អារម្មណ៍ចង់ពង្រីកការវិនិយោគរបស់ខ្លួនលើវិស័យផ្សេងៗទៀត ដូចជា វិស័យថាមពលស្អាត និងទឹកស្អាត នៅកម្ពុជា ដែលក្រុមហ៊ុនរំពឹងថានឹងអាចចូលរួមជាមួយរាជរដ្ឋាភិបាល ក្នុងការអភិវឌ្ឍសង្គម-សេដ្ឋកិច្ចដែលជាការវិនិយោគ ឈ្នះ ឈ្នះ រវាងរាជរដ្ឋាភិបាល និងវិស័យឯកជន។

ជាការឆ្លើយតប សម្ដេចនាយករដ្ឋមន្ត្រីបានវាយតម្លៃខ្ពស់ចំពោះភាពជោគជ័យនៃអាជីវកម្មរបស់ក្រុមហ៊ុន VINCI Airports នៅកម្ពុជានាពេលកន្លងមក ដែលបានរួមចំណែកយ៉ាងខ្លាំងដល់ការជំរុញកំណើនសេដ្ឋកិច្ចជាតិ និងជាពិសេសបានរួមចំណែកដល់ការជំរុញកំណើនភ្ញៀវទេសចរអន្តរជាតិមកកម្ពុជា។

សម្តេចនាយករដ្ឋមន្ត្រី ក៏បានបង្ហាញការគាំទ្រយ៉ាងខ្លាំងចំពោះបំណងចង់ពង្រីកវិនិយោគបន្ថែមលើវិស័យផ្សេងៗរបស់ក្រុមហ៊ុន ខណៈសម្ដេច ក៏បានលើកទឹកចិត្តឱ្យក្រុមហ៊ុនបន្តទំនាក់ទំនងឱ្យបានជាប់លាប់ជាមួយក្រសួងស្ថាប័នពាក់ព័ន្ធរបស់កម្ពុជា ហើយរាជរដ្ឋាភិបាលបានត្រៀមខ្លួនរួចជាស្រេច ក្នុងការគាំទ្រចំពោះការវិនិយោគរបស់ក្រុមហ៊ុននៅកម្ពុជា។

គួរបញ្ជាក់ថា តាមរយៈជំនួបពិភាក្សាខាងលើ តំណាងក្រុមហ៊ុន VINCI Airports ក៏បានបញ្ជាក់ពីការកើនឡើងគួរឱ្យកត់សម្គាល់នៃចំនួនអ្នកធ្វើដំណើរតាមយន្តហោះ ដែលក្នុងរយៈពេល ៣០ឆ្នាំ កន្លងមកនេះ ចំនួនអ្នកធ្វើដំណើរមានការកើនឡើងប្រមាណជា ៤០ដង បើប្រៀបធៀបទៅនឹងឆ្នាំ១៩៩៥។ ដំណើរការ និងប្រតិបត្តិការអាជីវកម្មរបស់ក្រុមហ៊ុន VINCI Airports បច្ចុប្បន្នក្រុមហ៊ុនកំពុងតែមមាញឹក ដើម្បីត្រៀមលក្ខណៈ ខណៈពេលដែលអាកាសយានដ្ឋានអន្តរជាតិតេជោ គ្រោងនឹងដាក់ឱ្យដំណើរការនាពេលឆាប់ៗខាងមុខនេះ៕ (អានបន្ថែម)

• Investments