គម្រោងធំៗ ២ នៅកម្ពុជា ក្រោមជំនួយរបស់ជប៉ុន ឈ្នះពានអន្តរជាតិនៅប្រទេសជប៉ុន

• 10 ខែ​កញ្ញា 2024
• Uncategorized
• 5 មើល

គម្រោងធំៗចំនួន ០២ នៅកម្ពុជា ស្ថិតក្រោមជំនួយរបស់ជប៉ុន ទទួលបានជ័យលាភី ក្នុងពិធីប្រគល់ពានរង្វាន់អន្តរជាតិលើគម្រោង​សាង​សង់របស់ជប៉ុនលើកទី៧ (The 7th Construction International Awards Ceremony) នៅប្រទេសជប៉ុន។

កម្មវិធីពិសេសនេះ មានការអញ្ជើញចូលរួមពី ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្ម ក្រោម​អធិបតីភាពឯកឧត្តម សៃតូ តេស៊ូអូ (SAITO Tetsuo) រដ្ឋមន្រ្តីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍​ជប៉ុន នៅថ្ងៃទី០៥ ខែកញ្ញា ឆ្នាំ២០២៤។

តាមរយៈជំនួយហិរញ្ញប្បទានឥតសំណងរបស់ប្រទេសជប៉ុន គម្រោងដែលកម្ពុជាបានទទួលជ័យលាភីនោះ គឺ៖

• ទី១-គម្រោងស្តារ​ឡើងវិញស្ពានមិត្តភាពកម្ពុជា-ជប៉ុន (ស្ពានជ្រោយចង្វារទី១) ដែលសាងសង់ និងអនុវត្តគម្រោងដោយ ក្រុមហ៊ុនជប៉ុន OBAYASHI Corporation និងក្រុមហ៊ុន Central Consultant Inc.។ (អានបន្ថែម)
• ទី២-គម្រោងធ្វើឱ្យប្រសើរឡើងលើដំណើរការអភិវឌ្ឍន៍ហេដ្ឋា​រចនាសម្ព័ន្ធតាមរយៈប្រព័ន្ធបច្ចេកវិទ្យា DX និងឧបករណ៍ដ្រូន ដែលអនុវត្តគម្រោងដោយ ក្រុមហ៊ុនជប៉ុន SkymatiX Inc.។

ថ្លែងក្នុងពិធីប្រគល់ពានរង្វាន់នោះ ឯកឧត្តមឯកអគ្គរាជទូតកម្ពុជា បានសំដែងនូវការអបអរសាទរដល់ក្រុមហ៊ុនជប៉ុនទាំង ៣ ដែល​បាន​​អនុវត្ត​គម្រោងសាងសង់ហេដ្ឋារចនាសម្ព័ន្ធនៅកម្ពុជា រហូតបញ្ចប់ដោយជោគជ័យ និងទទួលបានជ័យលាភីដ៏វិសេសវិសាល​នេះ។

ទន្ទឹមនឹងនេះដែរ ឯកឧត្តម បានថ្លែងអំណរគុណដល់ប្រទេសជប៉ុន ក្នុងការផ្តល់ជំនួយអភិវឌ្ឍន៍ដល់កម្ពុជា ជាពិសេសលើការអភិវឌ្ឍន៍ហេដ្ឋារចនាសម្ព័ន្ធ រួមមាន៖ ស្ពានគីហ្សូណា ខេត្តកំពង់ចាម ស្ពាន ត្សូបាសា(Tsubasa ,ស្ពានអ្នកលឿង) ខេត្តព្រៃវែង ស្ពាននៅលើផ្លូវជាតិលេខ ៦ គម្រោងស្តារឡើងវិញស្ពាននានា​ក្នុងខេត្ត​ក្រចេះ និងព្រៃវែង ព្រមទាំងគម្រោងស្តារឡើងវិញនូវផ្លូវជាតិលេខ១ លេខ៥ លេខ៦ និងផ្លូវជាតិលេខ៧ ។ល។

សូមជម្រាបថា រង្វាន់ជ័យលាភីលើគម្រោងសាងសង់ហេដ្ឋារចនាសម្ព័ន្ធ ត្រូវបានបែងចែកជា ៤ ប្រភេទផ្សេងៗគ្នា ៖

• ទី១- “Award of Excellence” បានទៅលើគម្រោងសាងសង់ស្ពាននៅប្រទេសហៃទី ។
• ទី២- “Construction Project Category” បានលើគម្រោងសាងសង់របស់ជប៉ុន នៅប្រទេសឥណ្ឌា កម្ពុជា ថៃ និងឥណ្ឌូនេស៊ី។
• ទី៣- “SMEs Category” បានលើគម្រោងសាងសង់របស់ជប៉ុន នៅប្រទេសស្រីលង្កា ចិន ថៃ កេនយ៉ា កម្ពុជា និងឥណ្ឌូនេស៊ី និង
• ទី៤- “Pioneering Activity Category” បានលើគម្រោងសាងសង់របស់ជប៉ុន នៅប្រទេសថៃ នេប៉ាល់ ហលីពីន តៃវ៉ាន់ និងសហរដ្ឋ​អាមេរិក។

• Property Awards