ឃ្លាំងស្តុកទំនិញត្រជាក់ថ្មីមួយទៀត នៅកំពង់ផែភ្នំពេញ សម្ពោធដាក់ឱ្យប្រើប្រាស់ជាផ្លូវការ

• 26 ខែ​មករា 2024
• Uncategorized
• 5 មើល

ឃ្លាំងស្តុកទំនិញត្រជាក់ថ្មីមួយ មានទីតាំងស្ថិតនៅក្នុងបរិវេណចំណតផែកុងតឺន័រ LM17 របស់កំពង់ផែស្វយ័តភ្នំពេញ ត្រូវបានសម្ពោធបើកឱ្យប្រើប្រាស់ជាផ្លូវការក្រោមអធិបតីភាពរបស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី២៤ ខែមករា ឆ្នាំ២០២៤។

ឃ្លាំងលើកដាក់ និងស្តុកទំនិញត្រជាក់នេះ ជារបស់ក្រុមហ៊ុន ខ្មែរ ខូល ឆេន (Khmer Cold Chain) មានទីតាំងនៅ ក្នុងកំពង់ផែស្វយ័តភ្នំពេញ ដែលស្ថិតក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។

គួរបញ្ចាក់ថា ឃ្លាំងថ្មីនេះ មានសមត្ថភាពអាចស្តុកទំនិញបាន ៥.៨២៧ម៉ែត្រគូប ជាមួយនឹងកម្រិតសីតុណ្ហភាពចាប់ពី -២២°C ដល់ ១៥°C ដែលអភិវឌ្ឍដោយក្រុមហ៊ុន InfraCo Asia សហការជាមួយកំពង់ផែស្វយ័តភ្នំពេញ ដោយមានការគាំទ្រពីមូលនិធិអភិវឌ្ឍន៍ និង USAID ក្រោមជំនួយឧបត្ថម្ភពី ប្រទេសអង់គ្លេស អូស្ត្រាលី ស្វីស និងហូឡង់។

នាឱកាសនោះដែរ ឯកឧត្តមរដ្ឋមន្ត្រីបានលើកឡើងថា ឃ្លាំងថ្មីនេះ នឹងផ្តល់សេវាស្តុកទំនិញត្រជាក់ ដែលមានតម្លៃសេវាបន្ថែម ស្របតាមស្តង់ដារអន្តរជាតិ ជាពិសេសនឹងជួយឱ្យកំពង់ផែស្វយ័តភ្នំពេញទទួលបាននូវកំណើនបរិមាណកុងតឺន័រឆ្លងកាត់បានរិតតែច្រើន។

ជាងនេះទៅទៀត ឃ្លាំងមួយនេះនឹងចូលរួមលើកកម្ពស់ការអភិវឌ្ឍវិស័យឡូជីស្ទីក និងកំពង់ផែនៅកម្ពុជា រួមទាំងការធ្វើកំណែទម្រង់ធ្វើយ៉ាងណាឱ្យតម្លៃឡូជីស្ទីកកាន់តែមានភាពប្រកួតប្រជែង និងការផ្តល់សេវាកាន់តែមានភាពឆាប់រហ័ស តម្លាភាព និងប្រសិទ្ធភាព។