ជប៉ុនជួយ CMAC ជិត $១១លាន ជំរុញសកម្មភាពដោះមីន និងសង់សារមន្ទីរមីន នៅសៀមរាប

• 21 ខែ​មីនា 2025
• Uncategorized @km
• 6 មើល

រដ្ឋាភិបាលជប៉ុន បានសម្រេចផ្តល់ជំនួយសរុបចំនួន ១.៤៦៦លានយ៉េន ប្រមាណជិត១១លានដុល្លារ ដល់កម្ពុជា ដើម្បីគាំទ្រអង្គភាព CMAC លើគម្រោងចំនួន២។

នេះបើតាមការចុះហត្ថលេខាលើលិខិតប្ដូរសារ និងឯកសារពាក់ព័ន្ធសម្រាប់គម្រោងហិរញ្ញប្បទានឥតសំណងនេះ រវាងឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្ដីក្រសួងការបរទេសនិងសហប្រតិបត្តិការអន្ដរជាតិ និងឯកឧត្តម UENO Astushi ឯកអគ្គរដ្ឋទូតជប៉ុនប្រចាំកម្ពុជា នៅថ្ងៃទី២០ ខែមីនា ឆ្នាំ២០២៥។

គម្រោងទាំង២នោះរួមមាន៖​

• គម្រោងទី១​ ជាគម្រោងពង្រឹងសមត្ថភាពអង្គភាព CMAC លើកិច្ចសហប្រតិបត្តិការត្បូង-ត្បូងក្រោមគម្រោងកម្មវិធីអភិវឌ្ឍន៍សេដ្ឋកិច្ច និងសង្គម (Strengthening CMAC’s Capacity on the South-South Cooperation Training under the Economic and Social Development Programme”។​ គម្រោងនេះមានថវិកាសរុបចំនួន ១.១៦៦លានយ៉េន ប្រមាណជាង៨,៤លានដុល្លារ ដែលត្រូវប្រើប្រាស់ដើម្បីទិញសម្ភារៈបច្ចេកទេសរួមមាន គ្រឿងចក្រកម្ទេចមីន ម៉ាស៊ីនរាវមីន និងរថយន្តជាដើម ដើម្បីលើកកម្ពស់សម្ភារបច្ចេកទេសនៃកិច្ចសហប្រតិបត្តិការផង និងសម្រាប់បម្រើកិច្ចការហ្វឹកហ្វឺនអ្នកជំនាញសកម្មភាពមីនទាំងក្នុងតំបន់ និងអន្តរជាតិ។
• គម្រោងទី២៖ ការបំពេញបន្ថែមហិរញ្ញប្បទានឥតសំណងចំនួន ៣០០លានយ៉េន ប្រមាណជាង ២លានដុល្លារ សម្រាប់គាំទ្រគម្រោងសាងសង់អគារហ្វឹកហ្វឺន និងអគារផ្សព្វផ្សាយអប់រំយល់ដឹងពីសង្គ្រាម (សារមន្ទីរតេជោសន្ដិភាព) នៃមជ្ឈមណ្ឌលសកម្មភាពកំចាត់មីនកម្ពុជា។ រហូតមកដល់បច្ចុប្បន្ន ហិរញ្ញប្បទានឥតសំណងក្នុងគម្រោងនេះ​ បានកើនដល់ចំនួន ២.៧៥១លានយ៉េន ស្មើនឹងប្រមាណជិត ២០លានដុល្លារ។

គួរបញ្ជាក់ថា CMAC នឹងសាងសង់សារមន្ទីរប្រវត្តិសាស្ត្រ​មួយ មានរូបរាងជាគ្រាប់មីនប្រឆាំងមនុស្ស (anti-per​so​n​al​ land mine shape) និងធំជាងគេលើពិភពលោក​ ដែលជាធាតុរឹងក្នុងការរចនាសំណង់សិល្បះនៃសារមន្ទីរ។

សារមន្ទីរដ៏ធំមួយនេះ ស្ថិតក្នុងនៅឃុំត្រពាំងធំ​ ស្រុកប្រាសាទបាគង ខេត្តសៀមរាប ដែលការសាងសង់អាចនឹងប្រើរយៈពេល ៣ឆ្នាំ និងមានទំហំ ៥២ម×៥២ម កំពស់១៧ម៉ែត្រ​ បូកសំណង់ខាងក្រៅអាគារមួយចំនួនទៀត។ (អានបន្ថែម)

កញ្ចប់ថវិកាដ៏ធំនេះបញ្ជាក់ពីការប្តេជ្ញាចិត្តរបស់ប្រទេសជប៉ុនក្នុងការគាំទ្រកិច្ចខិតខំប្រឹងប្រែងដែលកំពុងបន្តរបស់កម្ពុជាក្នុងការបោសសម្អាតមីន និងការអប់រំអំពីគ្រោះថ្នាក់នៃគ្រាប់មីន រួមចំណែកដល់អនាគតប្រកបដោយសុវត្ថិភាព និងសុខដុមរមនាសម្រាប់ប្រជាជនកម្ពុជា។