ជប៉ុនផ្តល់ជំនួយឥតសំណង ដើម្បីសាងសង់ និងធ្វើទំនើបកម្មហេដ្ឋារចនាសម្ព័ន្ធក្នុងខេត្ត ៣

• 2 ខែ​មីនា 2022
• Uncategorized
• 5 មើល

រដ្ឋាភិបាលនៃប្រទេសជប៉ុនបានសម្រេចផ្តល់ថវិកាសរុបជាង ៥២ ម៉ឺនដុល្លារអាមេរិក តាមរយៈគម្រោង KUSANONE សម្រាប់សាងសង់ស្ពាននៅខេត្តកណ្តាល និងក្រចេះ និងប្រព័ន្ធធារាសាស្ត្រក្នុងខេត្តបន្ទាយមានជ័យ។

កិច្ចសន្យាផ្តល់ជំនួយត្រូវបានចុះហត្ថលេខានៅថ្ងៃទី ០១ ខែមីនា ឆ្នាំ ២០២២ រវាងលោក មីកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា និងតំណាងអ្នកទទួលទាំង ៣ គម្រោង។

គម្រោងទី១ គឺសម្រាប់ការសាងសង់ស្ពានបេតុងមួយខ្សែ នៅឃុំលើកដែក ស្រុកកោះធំ ខេត្តកណ្តាល ដែលមានតម្លៃជាង ១២ ម៉ឺនដុល្លារ ដើម្បីផ្តល់ផលប្រយោជន៍ដល់ប្រជាពលរដ្ឋជាង ៧ ០០០ នាក់។

គម្រោងទី២ សាងសង់ស្ពាននៅ ស្រុកចិត្របុរី ខេត្តក្រចេះ មានតម្លៃជាង ១៣ម៉ឺនដុល្លារ ដើម្បីជួយសម្រួលការដឹកជញ្ជូនកសិផល និងការធ្វើដំណើរប្រចាំថ្ងៃរបស់ប្រជាពលរដ្ឋជាង ៣០០០ នាក់។

គម្រោងទី៣ សម្រាប់ការស្តារប្រព័ន្ធធារាសាស្ត្រ ទៀន កាំ ក្នុងខេត្តបន្ទាយមានជ័យដែលមានតម្លៃ២៦ម៉ឺនដុល្លារ។ គម្រោងនេះរំពឹងថានឹងធ្វើឱ្យជីវិតប្រចាំថ្ងៃរបស់មនុស្សជាង ៤៤ ០០០នាក់ ប្រសើរឡើង។

គម្រោង KUSANONE បានចាប់ផ្តើមនៅក្នុងប្រទេសកម្ពុជាក្នុងឆ្នាំ ១៩៩១ ក្នុងគោលបំណងដើម្បីកសាង និងអភិវឌ្ឍប្រទេសកម្ពុជាឡើងវិញនៅកម្រិតមូលដ្ឋាន។ ក្នុងរយៈពេលជាង ៣០ ឆ្នាំ ប្រទេសជប៉ុនបានផ្តល់ជាង ៦៥ លានដុល្លារអាមេរិក ដើម្បីអនុវត្តគម្រោង KUSANONE ចំនួន ៦៦៨ គម្រោង ។

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ