ត្រឹមខែតុលា ឆ្នាំ២០២៤ កម្ចីធនាគារសម្រាប់វិស័យសំណង់ និងអចលនទ្រព្យនៅកម្ពុជាកើនដល់ជាង $២០ពាន់លាន

• 7 ខែ​មករា 2025
• Uncategorized
• 5 មើល

គិតត្រឹមខែតុលា ឆ្នាំ២០២៤ គ្រឹះស្ថានធនាគារ និងហិរញ្ញវត្ថុ បានផ្តល់ឥណទានទៅក្នុងវិស័យសំណង់ និងអចលនទ្រព្យមានចំនួន ៨១.៧៤៨ពាន់លានរៀល (ស្មើនឹង ២០,១ពាន់លានដុល្លារ) កើន ១៥,៧៤% ធៀបនឹងឆ្នាំមុន។ នេះបើតាមរបាយការណ៍ចេញដោយធនាគារជាតិកម្ពុជា កាលពីពេលថ្មីៗនេះ។

តាមរបាយការណ៍ខាងលើបានបង្ហាញថា ឥណទានក្នុងវិស័យសំណង់បានកើនដល់ ២៩.១៩៩ពាន់លានរៀល ឬស្មើនឹង ៧,១៨ពាន់លានដុល្លារ កើន៣៣,៣%, រីឯឥណទានក្នុងការទិញផ្ទះជាកម្មសិទ្ធិផ្ទាល់ខ្លួនមានចំនួន ២៧.៦៨៦ពានលានរៀល ឬស្មើនឹង ៦,៩ពាន់លានដុល្លារ ថយចុះ ៣,៩% និងចុងក្រោយ ឥណទានក្នុងវិស័យអចលនទ្រព្យមានចំនួន ២៤.៨៦៣ពាន់លានរៀល ឬស្មើនឹង ៦,១១ពាន់លានដុល្លារ កើនឡើង១៧,៨%​ ធៀបនឹងឆ្នាំមុន។

យ៉ាងណាមិញ គិតត្រឹមខែតុលា ឆ្នាំ២០២៤ ដដែល គ្រឹះស្ថានធនាគារ និងហិរញ្ញវត្ថុ បានធ្វើការផ្តល់កម្ចីសរុបដល់គ្រប់វិស័យសេដ្ឋកិច្ចក្នុងប្រទេសកម្ពុជា គិតជាទឹកប្រាក់មានចំនួន ២៤៧.៦៣១ពាន់លានរៀល ឬស្មើនឹង ៦០,៩០ពាន់លានដុល្លារ កើនឡើង ២,២% ធៀបនឹងឆ្នាំមុន។

ក្រៅពីវិស័យសំណង់និងអចនលទ្រព្យ នៅមានវិស័យសំខាន់ៗមួយចំនួនទៀតដែលទទួលបានឥណទានពីគ្រឹះស្ថានធនាគារ និងហិរញ្ញវត្ថុ ក្នុងនោះរួមមាន៖ ឥណទានទៅកាន់វិស័យជួញដូរដុំ និងរាយ ចំនួន ៦០.៩២៦ពាន់លានរៀល, កសិកម្ម ២៣.៧៥៩ពាន់លានរៀល, សេវាកម្ម ១៩.៥៨៦ពាន់លានរៀល, កម្មន្តសាល ១០.៣៦៧ពាន់លានរៀល, អង្គភាពគ្រួសារចំនួន ២.៥៩១ពាន់លានរៀល និងវិស័យផ្សេងៗចំនួន ៤៨.៦៥៤ពាន់លានរៀល។

ពាន់ព័ន្ធឥណទានក្នុងវិស័យអចលនទ្រព្យនេះដែរ កន្លងទៅថ្មីៗនេះ អ្នកជំនាញ បានបង្ហាញការព្រួយបារម្ភ ដែលស្ថានភាពនេះបានបញ្ជាក់ពីភាពតានតឹងផ្នែកហិរញ្ញវត្ថុទាំងម្ចាស់ផ្ទះ និងអ្នកអភិវឌ្ឍន៍។

អ្នកជំនាញបានអំពាវនាវឱ្យមានការខិតខំប្រឹងប្រែងរួមគ្នាដើម្បីបង្កើតដំណោះស្រាយដែលអាចជួយសម្រាលបន្ទុកបុគ្គល និងលើកកម្ពស់បរិយាកាសសេដ្ឋកិច្ចឱ្យមានសុខភាពល្អប្រសើរឡើងវិញ។ (អានបន្ថែម)

នៅពេលដែលទិដ្ឋភាពសេដ្ឋកិច្ចរបស់ប្រទេសកម្ពុជាបន្តវិវឌ្ឍទៅមុខ វិស័យសំណង់ និងអចលនវត្ថុបានត្រៀមខ្លួនជាស្រេចដើម្បីដើរតួនាទីយ៉ាងសំខាន់ក្នុងការរៀបចំអនាគតហិរញ្ញវត្ថុរបស់ប្រទេសជាតិ។ រង់ចាំការអាប់ដេតបន្ថែមទៀត នៅពេលដែលយើងតាមដានការអភិវឌ្ឍន៍ទាំងនេះយ៉ាងដិតដល់។

• Bank and finance