ត្រឹមឆ្នាំ២០២៤ នៅកម្ពុជាមានឥណទានទិញផ្ទះផ្តល់ដោយធនាគារជាង ៦,៧៨ពាន់លានដុល្លារ កើន១២.៥%

• 7 ខែ​មីនា 2025
• Uncategorized @km
• 7 មើល

របាយការណ៍ពីធនាគារជាតិនៃកម្ពុជាបានបង្ហាញថា ឥណទានផ្តល់ដោយគ្រឹះស្ថានធនាគារសម្រាប់កម្ចីទិញផ្ទះជាកម្មសិទ្ធិផ្ទាល់ខ្លួន មានចំនួន ៦,៧៨ ពាន់​លានដុល្លារ គិតត្រឹមឆ្នាំ២០២៤ ឬស្មើនឹង ១២.៥%​ នៃទំហំឥណទានសរុប ៥៤,៣ ពាន់លានដុល្លារ។​

បើតាមរបាយការណ៍ខាងលើ ឥណទានផ្តល់សម្រាប់សកម្មភាពជួញដូរអចលនទ្រព្យមាន ១១,៦% និងវិស័យសំណង់ ៩,៧% ឬស្មើនឹង ៦,២៩ ពាន់លានដុល្លារ និង ៥,២៦ ពាន់លានដុល្លារ រៀងគ្នា។​

ដោយឡែក ឥណទានផ្តល់ដោយគ្រឹះស្ថានមីក្រូហិរញ្ញវត្ថុ ទៅលើសកម្មភាពសំណង់មានទំហំ ៣៥៥លានដុល្លារ ឬស្នើនឹង ៦,៧% នៃទំហំឥណទានសរុប ៥,៣ពាន់លានដុល្លារ។

ធនាគារជាតិនៃកម្ពុជាលើកឡើងក្នុងរបាយការណ៍ដដែលថា វិស័យសំណង់បន្តមានកំណើនទាបត្រឹម ០,៥%​ ក្នុងឆ្នាំ២០២៤ ធៀបនឹងឆ្នាំ២០២៣ មានកំណើន ០,៨% ដែលគាំទ្រជាចម្បងដោយគម្រោងសំណង់សាធារណៈសំខាន់ៗ ដូចជា ផ្លូវ ស្ពាន និងអាកាសយានដ្ឋាន។ ការនាំចូលសម្ភារៈ និងបរិក្ខារសំណង់ បន្តកើនឡើង ៣៣.២% ធៀបនឹងឆ្នាំ២០២៣ ដែលមានកំណើន ៤,៦%។​

សម្រាប់វិស័យអចលនទ្រព្យ មានកំណើនបន្តិចត្រឹម ០,២ភាគរយ ក្នុងឆ្នាំ២០២៤ (-0.៦ ភាគរយ ក្នុងឆ្នាំ២០២៣)។ សកម្មភាពលក់ខុនដូរបានកើនឡើង ៣៥,៥ភាគរយ ខណៈសកម្មភាពលក់លំនៅដ្ឋាន (ផ្ទះល្វែង និងវិឡាភ្លោះនិងទោល) ថយចុះ -១២,៥ ភាគរយ។​

ក្នុងឆ្នាំ២០២៤ សន្ទស្សន៍ថ្លៃលំនៅដ្ឋានកម្ពុជា (RPPI) ដែលជាការវាស់វែងអតិផរណាថ្លៃលំនៅដ្ឋាននៅកម្ពុជា ជាមធ្យម ថយចុះក្នុងអត្រា -០,២ភាគរយ ធៀបនឹងឆ្នាំ២០២៣ ក្នុងនោះសន្ទស្សន៍ថ្លៃលំនៅដ្ឋាននៅរាជធានីភ្នំពេញ និងតាមបណ្តាខេត្តជាមធ្យមថយចុះ -១,៨ភាគរយ និង -១,៦ភាគរយ រៀងគ្នា៕

• សេដ្ឋកិច្ច និងហិរញ្ញវត្ថុ
• Bank and finance
• NBC