ទីផ្សារការិយាល័យរបស់ទីក្រុងសេអ៊ូលបញ្ច្រាសនិន្នាការសកល៖ មានអត្រាកាន់កាប់ជាង ៩៨% ខណៈនៅប្រទេសភាគច្រើនមានការថយចុះ

• 28 ខែ​វិច្ឆិកា 2023
• Uncategorized @km
• 6 មើល

ខណៈដែលទីផ្សារអគារការិយាល័យគ្រប់ទីកន្លែងក្នុងពិភពលោក ប្រឈមនឹងការធ្លាក់ចុះ បែរជាទីផ្សារការិយាល័យរបស់ទីក្រុងសេអ៊ូល បន្តឈរនៅលើភាពជោគជ័យយ៉ាងរឹងមាំ ដែលមានអត្រាកាន់កាប់ដ៏គួរឱ្យចាប់អារម្មណ៍ជាង ៩៨% សម្រាប់ការិយាល័យកម្រិត A រួមជាមួយនឹងការកើនឡើងគួរឱ្យកត់សម្គាល់នៃការជួល ១៥% បើប្រៀបធៀបទៅនឹងឆ្នាំមុន នេះបើយោងតាមការសិក្សារបស់ Bloomberg ចុះផ្សាយកាលពីថ្ងៃទី ១៥ ខែ វិច្ឆិកា ឆ្នាំ ២០២៣​នេះ។

ការដណ្តើមជួលបន្ទប់ការិយាល័យរវាងអតិថិជនមួយករណី នាពេលថ្មីៗនេះនៅក្នុងអគារ Parnas Tower ដ៏មានកិត្យានុភាព ក្នុងសង្កាត់ Gangnam ដែលមានក្រុមហ៊ុនរាប់សិបទាំងក្នុងស្រុក និងក្រៅស្រុក ដេញថ្លៃគ្នាចង់បានកន្លែងការិយាល័យមួយកន្លែងនោះ គឺជាសក្ខីកម្មបញ្ជាក់យ៉ាងច្បាស់ពីកំណើននៃតម្រូវការការិយល័យ ខណៈតម្លៃមានការកើនឡើងខ្លាំងនៅប្រទេសកូរ៉េ។

យោងតាមលោក Y J Choi ប្រធានផ្នែកជួលនៅក្រុមហ៊ុន Cushman & Wakefield Korea សក្ដានុពលទីផ្សារ (សម្រាប់អគារការិយាល័យ) គឺជារឿងថ្មីមិនធ្លាប់មាន ដោយសារអ្នកជួល ជាពិសេសអ្នកដែលត្រូវការកន្លែងទូលាយច្រើន សុខចិត្តជួលអគារយកតែម្តងទោះបីជាមានការដំឡើងតម្លៃពី ៣០% ទៅ ៤០%ក្តី។ នេះគឺដោយសារតែខ្វះខាតជម្រើស។ លក្ខខណ្ឌបែបនេះ ផ្ទុយស្រឡះជាមួយនឹងទីផ្សារសហរដ្ឋអាមេរិក និងប្រទេសផ្សេងទៀត ដែលទីផ្សារការិយាល័យ មានការកាត់បន្ថយការកាន់កាប់ និងការធ្លាក់ថ្លៃ។”

សេណារីយ៉ូដ៏វិសេសវិសាលនៅក្នុងទីក្រុងសេអ៊ូលនេះ អាចត្រូវបានគេសន្មត់ថា កើតឡើងដោយសារកត្តារួមបញ្ចូលគ្នាជាច្រើនរួមទាំងសក្ដានុពលនៃតម្រូវការផ្គត់ផ្គង់ “ចំណូលចិត្តវប្បធម៌” និងភាពធន់នៃសេដ្ឋកិច្ចរបស់ប្រទេសកូរ៉េទាំងមូលតែម្តង។ គិតត្រឹមត្រីមាសទី៣ នេះ ទីផ្សារអគារការិយាល័យក្នុងទីក្រុងសេអ៊ូលមានអត្រាកន្លែងទំនេរ (មិនទាន់មានការកាន់កាប់) ត្រឹមតែ ១,៧%ប៉ុណ្ណោះ ដែលតួលេខនេះគឺល្អប្រសើរខ្លាំងណាស់គឺដាច់ឆ្ងាយបើធៀបនឹងអត្រាកន្លែងទំនេរ របស់ប្រទេសអាស៊ីទាំងមូល គឺមានរហូតដល់ទៅ ១៩%ឯណោះ។

កត្តាវប្បធម៌បានជះឥទ្ធិពលដល់តម្រូវការការិយាល័យបែបនេះ គឺជារឿងមិនអាចនឹកស្មានដល់សម្រាប់ម្ចាស់អគារនៅសហរដ្ឋអាមេរិក និងនៅបណ្តាប្រទេសផ្សេងទៀត ដែលនៅតាមអគារការិយាល័យនានា គេកំពុងឃើញអ្នកជួលកាត់បន្ថយកន្លែងជួល ឬរើចេញ ដោយសារបុគ្គលិកស្ទាក់ស្ទើរក្នុងការចង់វិលត្រឡប់មកធ្វើការនៅក្នុងការិយាល័យវិញ។ ម្យ៉ាងទៀត ម្ចាស់អចលនៈទ្រព្យ កំពុងជួបការលំបាកជាមួយអត្រាការប្រាក់ខ្ពស់ពីធនគារ ដែលដាក់សម្ពាធដោយវិបត្តិសេដ្ឋកិច្ច។ ជាលទ្ធផលតម្លៃការិយាល័យនៅសហរដ្ឋអាមេរិក គឺនៅតែជាប់គាំង ហើយទីផ្សារអចលនទ្រព្យពាណិជ្ជកម្មនេះ ប្រឈមមុខនឹងការបន្តធ្លាក់ចុះយ៉ាងហោចណាស់ប្រាំបួនខែទៀត នេះបើយោងតាមការស្ទង់មតិថ្មីៗនេះដែលធ្វើឡើងដោយ Bloomberg។

នាយកផ្នែកស្រាវជ្រាវរបស់ CBRE ប្រចាំប្រទេសកូរ៉េ លោក Claire Choi កត់សម្គាល់ថា “កង្វះខាតការិយាល័យនៅទីក្រុងសេអ៊ូល (តម្រូវការខ្ពស់ការផ្គត់ផ្គង់ទាប) កើតមានឡើងតាំងតែពីឆ្នាំ ២០២១មកម្ល៉េះ។ ហើយគេរំពឹងថានឹងបន្តរហូតដល់ឆ្នាំ ២០២៥ ដែលកត្តានេះ ជំរុញឱ្យតម្លៃជួលកើនឡើងប្រមាណ ១៥% នៅឆ្នាំ ២០២៣។

ការរឹតបន្តឹងលើការអភិវឌ្ឍឡើងវិញដែលជាវិធានការដោយរដ្ឋាភិបាល និងការរំខានដែលបណ្តាលមកពីជំងឺរាតត្បាត បានរួមចំណែកដល់ការខ្វះខាតការផ្គត់ផ្គង់នេះ។ ទន្ទឹមនឹងនេះ តម្រូវការអគារការិយាល័យមានភាពនឹងនរ ត្រូវបានទ្រទ្រង់ដោយកត្តាសេដ្ឋកិច្ចក្នុងស្រុកដ៏រឹងមាំរបស់កូរ៉េខាងត្បូងផ្ទាល់តែម្តង ដែលបានបង្ហាញពីកំណើនពេញមួយជំនាន់នៃសម័យកាលជំងឺរាតត្បាត ហើយជន្ទល់សេដ្ឋកិច្ចដ៏រឹងមាំរបស់កូរ៉េនេះ គឺដោយសារទីផ្សារក្រៅប្រទេសដ៏រឹងមាំសម្រាប់ស្រូបយកផលិតផលរបស់ខ្លួនជាប្រភេទផលិតផលមិនប៉ះពាល់ខ្លាំងដោយវិបត្តិសាកល  ក្នុងនោះរួមមានការនាំចេញបន្ទះមីក្រូឈីប និងរថយន្ត។

លោក Calvin Chou សហប្រធានផ្នែកវិនិយោគ និងជាប្រធានផ្នែកអចលនទ្រព្យ Invesco ប្រចាំតំបន់អាស៊ីប៉ាស៊ីហ្វិក ទទួលស្គាល់ទីក្រុងសេអ៊ូលថាជា “ទីផ្សារការិយាល័យដែលដំណើរការខ្លាំងបំផុតក្នុងពិភពលោកក្នុងរយៈពេលពីរឆ្នាំចុងក្រោយនេះ”៕