រដ្ឋកំណត់យកឃុំចំនួន៥ ក្នុងស្រុកបសេដ្ឋ ដាក់ជាគោលដៅអនុវត្តគម្រោងកសិកម្មបែបទំនើបថ្មី

6 ខែសីហា 2025
ព័ត៌មានក្នុងស្រុក
4 មើល

អាជ្ញាធរខេត្តកំពង់ស្ពឺបានកំណត់យក ឃុំចំនួន៥ ស្ថិតក្នុងស្រុកបសេដ្ឋ ដាក់ជាគោលដៅសម្រាប់អនុវត្តគម្រោងកសិកម្មស្ងួត-សើម(AWD) ដែលនេះគឺជាប្រព័ន្ធកសិកម្មប្រើបច្ចេកវិទ្យាទំនើបថ្មីរបស់ក្រុមហ៊ុនThanks Carbon Inc និងអង្គការសម្ព័ន្ធភាពដៃគូ ដើម្បីការអភិវឌ្ឍតាមបែបប្រជាធិបតេយ្យ(សម្ព័ន្ធភាពCPDD)។

នេះបើតាមការលើកឡើងរបស់ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ ក្នុងពិធីចុះអនុស្សារណ:នៃការយោគយល់គ្នា(MOU) រវាងក្រុមហ៊ុន Thanks Carbon Inc., និងអង្គការ( CPDD) នៅថ្ងៃទី៥ ខែសីហា ឆ្នាំ២០២៥។

នាឱកាសនោះ ឯកឧត្តមអភិបាលខេត្ត បានលើកឡើងថា មន្ទីរកសិកម្មខេត្ត បានចុះ MoU ជាមួយក្រុមហ៊ុនThanks Carbon Inc. និងអង្គការ CPDD ដើម្បីបង្ហាញអំពីទស្សនទាន និងគោលដៅគម្រោងស្ងួត-សើម (AWD) ក្នុងការស្វែងរកកិច្ចសហការសម្រាប់ការអនុវត្តគម្រោងស្ងួត-សើម ដើម្បីរួមចំណែកក្នុងការផ្សាភ្ជាប់ គាំទ្រផ្នែកច្បាប់ គោលនយោបាយ និងបទដ្ឋានគតិយុត្តិរបស់រដ្ឋាភិបាលកម្ពុជា សំដៅលើកកម្ពស់ជីវភាពរស់នៅរបស់ប្រជាកសិករឱ្យកាន់តែប្រសើរឡើងថែមទៀត។

ទន្ទឹមគ្នានេះ ឯកឧត្តមបន្តថា តាមរយៈគម្រោងនេះ ក៏ជាគម្រោងមួយដែលនឹងឈានឆ្ពោះទៅរកដំណាក់កាលថ្មីដែលផ្តោតលើប្រពលវប្បកម្ម ពោលគឺពឹងផ្អែកជាសំខាន់លើការប្រើប្រាស់បច្ចេកទេសទំនើប បច្ចេកវិទ្យាថ្មី កសិកម្មវៃឆ្លាត ការស្រាវជ្រាវ និងការអភិវឌ្ឍយន្តូបនីយកម្មផងដែរ។

កំពង់ស្ពឺត្រូវបានគេទទួលស្គាល់ថា ជាខេត្តមានវិស័យកសិកម្មរឹងមាំ ជាពិសេសក្នុងការដាំដុះដំណាំស្រូវ ដែលអាចផលិតបានជាងមួយលានតោនក្នុងមួយឆ្នាំៗ ដើម្បីឆ្លើយតបនឹងតម្រូវការទីផ្សារ។ យ៉ាងណាមិញ ឃុំទំាង៥ ដែលត្រូវបានជ្រើសរើសសម្រាប់គម្រោង AWD រួមមាន៖ ពោធិម្រាល ឃុំនិទាន ឃុំពោធិចំរើន ឃុំពោធិអង្រ្កង និងឃុំព្រះខែ។

គំនិតផ្តួចផ្តើមនេះត្រូវបានគេរំពឹងថាមិនត្រឹមតែលើកកម្ពស់ទិន្នផលកសិកម្មប៉ុណ្ណោះទេ ប៉ុន្តែថែមទាំងលើកកម្ពស់ការអនុវត្តកសិកម្មប្រកបដោយនិរន្តរភាព និងលើកកំពស់គុណភាពជីវិតសរុបសម្រាប់កសិករក្នុងស្រុកផងដែរ។ នៅពេលដែលគម្រោងនេះលេចចេញជារូបរាង វានឹងក្លាយជាឧទាហរណ៍ដ៏ជោគជ័យមួយអំពីរបៀបដែលការច្នៃប្រឌិតអាចជះឥទ្ធិពលជាវិជ្ជមានដល់សហគមន៍កសិកម្មបែបប្រពៃណីក្នុងប្រទេសកម្ពុជា៕