រដ្ឋកំពុងត្រៀមដាក់ស្នើភ្នំមួយនៅខេត្តព្រះវិហារ ឱ្យទៅជាបេតិកភណ្ឌពិភពលោករបស់ UNESCO

• 1 ខែ​កុម្ភៈ 2021
• ព័ត៌មានក្នុងស្រុក
• 4 មើល

អន្តរក្រសួង កំពុងត្រៀមស្នើទៅអង្គការយូណេស្កូ ដើម្បីដាក់ភ្នំត្បែងនៅព្រះវិហារ ឱ្យទៅជាតំបន់បេតិកភណ្ឌពិភពលោក។ នេះបើយោងលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ក្នុងឱកាសចុះពិនិត្យទីតាំងកាលពីថ្ងៃទី ២៩ – ៣១ ខែមករា កន្លងមកនេះ។

លោក ភក្ត្រា បានឱ្យដឹងថា៖ «ក្រោយចុះសិក្សាយ៉ាងលម្អិត តំបន់បេតិកភណ្ឌធម្មជាតិភ្នំត្បែងនេះ គឺជាទីតាំងដែលរដ្ឋជ្រើស ក្នុងចំណោមទីតាំង ៣ ផ្សេងទៀត រួមមានព្រែកកាំពី ព្រែកប្រសព្វ និងតំបន់ត្មាតប៉ើយ»។

លោកបន្តថា៖ «មូលហេតុដែលអ្នកជំនាញជ្រើសរើសភ្នំត្បែងនេះ ដោយសារតែ ទីនេះជាកន្លែងទីសក្ការៈ សម្បូរដោយជីវចម្រុះ និងជាតំបន់ទេសចរណ៍មានសក្កានុពល»។

បើយោងតាមប្រភពដដែល មកទល់បច្ចុប្បន្ន ក្រុមអ្នកបច្ចេកទេសបានចងក្រងនូវឯកសារមួយចំនួនរួចហើយ និងកំពុងតែបន្តបន្ថែមទៀត ដើម្បីឱ្យគ្រប់ជ្រុងជ្រោយ មុនដាក់ទៅយូណេស្កូ។

គួរបញ្ជាក់ផងដែរថា តំបន់បេតិកភណ្ឌធម្មជាតិភ្នំត្បែង បានបង្កើតឡើងកាលពីថ្ងៃទី១៣ ខែកញ្ញា ឆ្នាំ២០១៦។ តំបន់នេះមានទេសភាពស្រស់ស្អាត និងសម្បូរដោយជីវចម្រុះ ដោយគ្របដណ្ដប់លើផ្ទៃដីប្រមាណ ២ម៉ឺន ៥ពាន់ហិកតា ពោលគឺស្ថិតនៅជាប់ស្រុក ៤ គឺស្រុកសង្គមថ្មី ស្រុករវៀង ស្រុកគូលែន និងក្រុងព្រះវិហារ។